اجوکے جگ اندر بدھ مت

جنوب اتے جنوب مشرقی ایشیا دا تھیرواد بدھ مت

بھارت

بدھ مت دا اثر بھارت وچ ستویں صدی وچ گھٹ ہون لگا، اتے بارھویں صدی وچ پالا راج دے زوال دے بعد سواۓ شمالی ہمالیہ دے دور پار علاقیاں دے اُکّا ہی مُک گیا۔ انیہویں صدی عیسوی دے اخیر وچ بھارت وچ بدھ مت دی پنر جنمی  تحریک اوس ویلے شروع ہوئی جد سری لنکا دے بودھی گورو اناگرک دھرم پال نے برطانیہ دے عالماں دی مدد نال مہا بودھی سوسائٹی دی بنیاد رکھی۔ اوہناں دا مڈھلا مدعا بھارت وچ بودھی یاترا مرکزاں نوں مڑ کے قائم کرنا سی، اتے اوہناں نوں تمام بودھی گھراں اوپر اجیہے مندر جنہاں وچ بھکشو موجود ہون، تعمیر کرن وچ بوہت کامیابی ہوئی۔
 
۱۹۵۰ دے دہاکے وچ امبد کر نے اچھوت ذات دے لوکاں وچ نوبدھیت دی تحریک چلائی جس توں لکھاں لوکاں نے  ذات پات دے بکھیڑیاں توں بچن لئی بدھ مت نوں اپنا لیا اے۔ پشلے دہاکے وچ شہری متوسط طبقے وچ وی بدھ مت وچ دلچسپی وچ وادھا ہویا اے۔ ایس ویلے بھارت وچ بدھ مت نوں منن والیاں دی نفری لگ بھگ دو فیصد اے۔  

سری لنکا

سری لنکا اودوں توں ہی بدھ مت شکشا دا مرکز رہیا اے جد توں راجہ اشوک دے پُتر مہندر نے اوتھے اوس نوں تیسری صدی عیسوی وچ متعارف کروایا۔ سری لنکا وچ بدھ مت دے ہمیش توں قائم رہن دا اتحاس سب توں لما اے۔ ایتھے جنگ دے دوران اتے سولھویں صدی دے بعد توں جد ایس جزیرے نوں نو آبادی بنا لیا گیا اتے یورپی پرچار کاراں نے ایتھے عیسائیت دا پرچار کیتا، بدھ مت لمے چِر تک زوال پذیر رہیا اے۔  

انیہویں صدی وچ برطانوی عالماں اتے دینی عالماں دی سہائتا نال بدھ مت دا ڈاڈھا پنر جنم ہویا اے، اتے انج سری لنکا دے بدھ مت نوں کدی کدار "پروٹسٹنٹ بدھ مت" آکھیا جاندا اے، جس وچ عالمانہ مطالعہ، عام لوکاں لئی بھکشوواں دی  دھرمی رسماں دی ادائیگی، اتے لوکاں لئی سمادھ اوپر زور دتا جاندا اے۔ ایس دیش نوں ۱۹۴۸ وچ ازادی ملی، اتے اودوں توں بودھی دھرم اتے رہن سہن وچ ڈاڈھی دلچسپی ویکھن وچ آئی ہے۔

 اج سری لنکا دی ۷۰ فیصد ابادی بدھ دھرم نوں مندی اے، جس وچوں زیادہ تر لوکی تھیرواد پنتھ نوں مندے نیں۔۳۰ ورہیاں دی خانہ جنگی دے مغروں ہُن سری لنکا وچ قومی بدھ مت پنگر رہیا اے، جس وچ کُجھ تنظیماں  جویں بودو بالا سینا (بودھی فوج) مسلماناں دے خلاف فساد کر رہیاں نیں اتے اعتدال پسند بودھی موہریاں اوپر حملے کر رہیاں نیں۔  

مئینمار (برما)

اتحاسی پرچول توں پتہ لگا اے کہ برما وچ بدھ مت دی تاریخ دو ہزار سال توں وی پرانی اے، جتھے لگ بھگ ۸۵٪ لوکی اپنے آپ نوں بودھی مندے نیں۔ اوتھے دینی طبقہ وچ سمادھ اتے درس دے وچکار توازن دی لمی ریت پائی جاندی اے، اتے عوام دا ایمان بوہت مضبوط اے۔ برما دا اک ڈاڈھا مشہور بودھی گورو س۔ن۔گوندا اے جو کہ سمادھ دے وپاسن طریقیاں دا استاد اے۔ 

۱۹۴۸ وچ جد توں برما نے برطانیہ توں ازادی پراپت کیتی اے فوجی اتے عوامی حکومتاں دونواں نے ہی تھیرواد بدھ مت نوں پنگرن دا موقع دتا اے۔ فوجی اقتدار وچ بدھ مت اوپر ڈاڈھی نظر رکھی گئی اے اتے اوہ مٹھ جنہاں نے ہزاراں باغیاں نوں پناہ دتی اوہناں نوں باقاعدہ تباہ کیتا گیا اے۔ بھکشو عام طور تے فوجی حکومت دے خلاف سیاسی روس وکھالے وچ موہرے رہے نیں، جویں کہ ۸۸۸۸ دی بغاوت اتے ۲۰۰۷ دا زعفران انقلاب۔ 

پشلے دہاکے دے دوران ون سونّے دیش بھگت دھڑے موہرے آۓ نیں جنہاں دا منورتھ بدھ مت دا پنر جنم اتے اسلام دی مخالفت اے۔ ۹۶۹ جتھے دا بھکشو موہری اشین وراتھو جو اپنے آپ نوں"برما دا بن لادن" کہندا اے، نے مسلماناں دی دکاناں دے بائیکاٹ دا اعلان کیتا اے۔ "بدھ مت دی رکھشا" دے بہانے مسجداں اتے مسلمان گھراں اوپر حملے ہوۓ نیں، اتے مسلماناں نے وی جوابی حملے کیتے نیں جس توں مار کٹ وچ وادھا ہویا اے۔

بنگلہ دیش

یارھویں صدی تک بنگلہ دیش دا وڈا دھرم بدھ مت سی۔ اج کل بدھ مت دی نفری اک فیصد توں وی گھٹ اے اتے اوہ بودھی چٹاگانگ دے پہاڑی سلسلہ وچ برما دے نیڑے وسدے نیں۔ 

ڈھاکہ، جو کہ راج دھانی اے، اندر چار بودھی مندر نیں، اتے مشرقی پنڈاں وچ وی بوہت سارے مندر نیں۔ برما نال لاتعلقی دی وجہ توں بدھ مت دے پاٹھ اتے گیان دا درجہ کافی نیواں اے۔

تھائی لینڈ

پنجویں صدی عیسوی توں بدھ مت جنوب مشرقی ایشیا دی راجدھانیاں وچ اپڑیا۔ اوتھے تھیرواد نوں منیا جاندا اے جس وچ لوک دھرم اتے ہندو مت دے ڈوہنگے اثر نال مہایان بدھ مت دے  منن والے پاۓ جاندے نیں۔ سری لنکا اتے برما توں اختلاف کردے ہوۓ اوتھے کدی وی سوانیاں نوں دھرمی منصب داری نصیب نئیں ہوئی۔ دیس دی ۹۵٪ ابادی بدھ مت دی پیرو اے۔

تھائی بھکشو برادری تھائی لینڈ دی بادشاہت دے نمونہ دی عکاسی کردی اے، جس وچ اک وڈا نیتا ہوندا اے جس دے نال وڈیریاں دی پنچائت ہوندی اے جو رسم رواج دی اصلیت قائم رکھن دی ذمہ وار ہوندی اے۔ بعض بھکشو برادریاں جنگلاں وچ رہندیاں نیں اتے بعض پنڈاں وچ۔ لوکی دونواں دا ہی بوہت ستکار اتے ان پانی نال سہائتا کردے نیں۔

جنگلاں دے منگتے بھکشو دور پار دے جنگلاں وچ رہندے نیں اتے سنیاسی اصولاں اوپر سختی نال کار بند ہوندیاں ہویاں ڈوہنگا سمادھ کردے نیں۔ پنڈاں دے بھکشو عموماً دھرمی صحیفے منہ زبانی یاد کردے نیں اتے مقامی لوکاں لئی رسماں ادا کردے نیں۔ تھائی سنسکرتی جو روحاں اوپر ایمان رکھدی اے دے انوسار ایہ بھکشو عام جنتا دی حفاظت لئی اوہناں نوں تعویذ گنڈھا فراہم کردے نیں۔ اوتھے بھکشوواں لئی اک وش ودیالہ وی ہے جس دا مڈھلا مقصد بھکشوواں نوں بودھی صحیفیاں دا کلاسیکی پالی توں اجوکی تھائی وچ ترجمہ کرن دی سرکھشا دینا اے۔

لاؤس

بدھ مت پہلے پہل ستویں صدی عیسوی وچ لاؤس پوہنچیا، اتے ہن۹۰ فیصد ابادی بدھ مت جس وچ مظاہر پرستی وی شامل اے وچ ایمان رکھدی اے۔ اشتراکی راج دے دوران شروع وچ حکمراناں نے شتابی ہی دھرم اوپر ظلم نئیں ڈھایا سغوں بودھی سنگھا نوں اپنے منورتھ پورے کرن لئی استعمال کیتا۔ سمے بیتن دے نال نال بدھ مت بری طراں  زیرِعتاب آیا۔ ۱۹۹۰ دے دہاکہ توں لے کے بدھ مت نے فیر توں جوت پائی اے، جس وچ لاؤس دے زیادہ تر واسیاں  نے بوہت عقیدت دا وکھالا کیتا اے، اتے اکثر مرداں نے کسے آشرم یا مندر وچ باقاعدگی نال جانا شروع کیتا اے بھاویں تھوڑے چِر لئی ہی سہی۔ اکثر گھرانے بھکشوواں نوں بھوجن دیندے نیں، اتے پورن ماشی دی رات نوں مندر جاندے نیں۔

کمبوڈیا

(کمبوڈیا وچ) تیرھویں صدی عیسوی توں تھیرواد بدھ مت سرکاری دھرم رہیا اے، جتھے ۹۵٪ آبادی اج وی بودھی اے۔ ۱۹۷۰ دے دہاکہ وچ خمیر روج بدھ مت نوں پوری طراں تباہ کرن وچ قریب قریب کامیاب ہو گئے سان؛ اتے ۱۹۷۹ تک تقریباً ہر بھکشو یا تے قتل ہوچکیا سی یا اوس نوں دیس نکالا مل گیا سی، اتے سارے مندر اتے کتاب گھر تباہ کیتے جا چکے سان۔
شہزادہ شاہنوک دی بحالی بطور بادشاہ دے مغروں ہولی ہولی پابندیاں چکیاں جان لگیاں، اتے بدھ مت وچ دلچسپی ودھن لگی۔ کمبوڈیا دے لوکی جوتش، علم نجوم اتے علم ارواح وچ پکا ایمان رکھدے نیں، اتے بھکشو حکیم دا فریضہ  ادا کردے نیں۔ بودھی بھکشو کئی اک رسماں وچ حصہ لیندے نیں، نویں جم بالڑ دا نام رکھن توں لے کے شادی بیاہ اتے کفن دفن دی رسماں تک۔

ویت نام

ویت نام وچ بدھ مت دی آمد دو ہزار ورہے پہلاں پہل بھارت راہیں اتے فیر چین دے رستے ہوئی۔ پر پندھرویں صدی دے دوران ایہ دھرم حکمران طبقے وچ غیر مقبول ہون لگا۔ ویہویں صدی دے شروع وچ ایس دی تجدید ہوئی، پر جمہوری دور وچ کیتھولک دی حامی پالیسیاں نے بودھیاں نوں ناراض کیتا۔ ہن صرف سولہ فیصد لوکی بدھ مت دے پیرو کار نیں، پر فیر وی ایہ سب توں وڈا دھرم اے۔ 

ہن سرکار بدھ مت ولوں کافی شانت اے، پر مندراں نوں حکومت دی نگرانی دے بغیر کاروائی دی اجازت نئیں۔

انڈونیشیا اتے ملائیشیا

ایتھے بدھ مت دی آمد دوسری صدی عیسوی دے لگ بھگ بھارت دے تجارتی رستیاں دے راہیں ہوئی۔ لمے چِر تک بدھ مت اتے ہندو مت دی پوجا پندھرویں صدی تک نال و نال ہوندی رہی جد ماجا پاہت نام دے ہندو بدھ راج نوں زوال آیا ۔ ستارھویں صدی دے شروع تیکر اسلام نے ایہناں دھرماں نوں پوری طراں بےدخل کر دتا سی۔

انڈونیشیا دی سرکاری پالیسی 'پنچا شیلا' دے مطابق سرکاری دھرم وچ خدا اوپر ایمان اٹوٹ انگ اے۔ بدھ مت خدا نوں کسے ہستی دا رتبہ نئیں دیندا، سغوں آدی بدھا، یا "پہلا بدھا" دے بیان دی بنا اوپر ایس نوں من دا اے جویں کہ کل چکر دے تنتر وچ ذکر کیتا گیا اے جو کہ بھارت وچ اک ہزار سال پہلاں مقبول ہویا۔ آدی بدھا ساری مخلوق دا سروشتہ مان کرتار اے جو کہ وقت اتے دوجی کمزوریاں توں ازاد اے، اتے بھاویں اک مجسمہ دے طور تے پیش کیتا جاندا اے، پر ایہ کوئی ہستی نئیں اے۔ آدی بدھا ہر ہستی وچ من دی نرول جوتی دے روپ وچ موجود اے۔ ایس بنیاد اوپر بدھ مت نوں اسلام، ہندومت، کنفیوشس مت، کیتھولک دھرم اتے پروٹسٹنٹ دھرم دے نال قبولیت ملی۔

سری لنکا دے بھکشو بالی اتے انڈونیشیا دے بعض علاقیاں وچ تھیرواد بدھ مت دی تجدید دی کوشش کر رہے نیں، بھاویں بوہت چھوٹے پیمانے اوپر ہی سہی۔ بالی دے جو لوکی ایس وچ دلچسپی دا وکھالا کر رہے نیں اوہ بالی دے روائیتی رلے ملے دھرم جو کہ ہندو مت، بدھ مت اتے مقامی روحاں دے دھرم دا اکٹھ اے دے پیروکار نیں۔ انڈونیشیا دے دوجے علاقیاں وچ بودھی لوکی جو ابادی دا تقریباً ۵ فیصد نیں، اوہ انڈونیشیا دے چینی نسل دے لوکاں وچوں نیں۔ ایس دے علاوہ اوتھے کجھ چھوٹے انڈونیشی بودھی فرقے وی نیں جو تھیرواد، چینی اتے تبتی پرتندھ اوپر مشتمل نیں۔

ملائیشیا دی ۲۰ فیصد ابادی بدھ مت نوں من دی اے، اتے ایہ زیادہ تر سمندر پار توں آون والے چینیاں اوپر مشتمل اے۔ ادھی صدی پہلاں بدھ مت وچ دلچسپی گھٹ ہون لگی، تے ۱۹۶۱ وچ بدھ مت دے پرچار لئی بودھی مشنری سوسائیٹی دا قیام عمل وچ آیا۔ پشلے دہاکے وچ بدھ مت پاٹھ وچ زوردار وادھا ویکھن وچ آیا اے، حتیٰ کہ نوجواناں وچ وی۔ ہن اوتھے بےشمار تھیرواد، مہایان اتے وجریان مرکز قائم نیں جنہاں نوں خاصی مالی مدد اتے سہائتا حاصل اے۔

مشرقی ایشیا دا مہایان بدھ مت

عوامی جمہوریۂ چین

بدھ مت نے چین دے پشلے ۲،۰۰۰ ورہیاں دے اتحاس وچ وڈا کردار ادا کیتا اے، اتے چینی بدھ مت نے بدھ مت دے مشرقی ایشیا وچ کھلار وچ ون سونّا کردار ادا کیتا اے۔ تانگ راج (۶۱۸-۹۰۷ صدی عیسوی) دا شروع دا ویلا بدھ مت دا سنہری دور سی جس وچ فنون لطیفہ اتے ادب نوں بوہت ترقی ملی۔

۱۹۶۰ اتے ۱۹۷۰ دے دہاکیاں وچ سنسکرتی انقلاب دے دوران چین دے چوکھے بودھی آشرم تباہ کر دتے گئے، اتے زیادہ تر اُتم  تربیت یافتہ بھکشو، راہباواں اتے ادھیاپک یا تے قتل کر دتے گئے یا قید کر دتے گئے ۔ تبت اتے اندرلے منگولیا وچ بدھ مت نوں ہور وی شدت نال دبایا گیا۔ جویں جویں چین وچ اصلاحواں  ہوئیاں اتے وچار کھلے، تے روائتی دھرماں وچ دلچسپی ودھی۔ نویں مندر تعمیر ہوۓ اتے پرانیاں نوں مرمت کیتا گیا۔ مٹھاں وچ رلت ہون والے زیادہ تر لوکی غریب اتے ان پڑھ دیہاتی سان، اتے شکشا دا گھاٹا رہیا اے۔ بوہت سارے مندر نرے یاتریاں دی دلچسپی دا سامان نیں، جتھے بھکشو نرے ٹکٹ اکٹھے کرن اتے مندر دی رکھوالی دا کم کردے نیں۔ 

اج کل بوہت سارے چینی لوکی بدھ مت وچ دلچسپی وکھا رہے نیں، اچیچ تبتی بودھی نال عقیدت دا وکھالا صاف دِسدا اے۔ اک اندازے دے مطابق بودھی ابادی ۲۰ فیصد اے، اتے سارے چین وچ مندراں دے کھلن دے سمے توں ہی رونق رہندی اے۔ جویں جویں لوکی سَوکھے اتے مصروف ہوندے جا رہے نیں، تے بوہت سارے لوکی پریشانی نوں گھٹ کرن دی خاطر چینی اتے تبتی بدھ مت ول جا رہے نیں۔ بوہت سارے ہان چینی لوکی تبتی بدھ مت وچ خاص دلچسپی دا وکھالا کردے نیں، اُچیچ ایس لئی وی کہ تبتی لاما دی وڈی تعداد چینی زبان وچ درس دیند ے نیں۔

تائیوان، ہانگ کانگ اتے سمندر پار چینی علاقے

 چین توں ماخوذ مشرقی ایشیا دی مہایان بودھی روایئتاں تائیوان اتے ہانگ کانگ وچ پکی طراں قائم نیں۔ تائیوان وچ بھکشو اتے راہباواں دی مضبوط سنیاسی برادری موجود اے جس نوں عام لوکاں دی ڈاڈھی حمائت حاصل اے۔ اوتھے بودھی وش ودیالے اتے سماجی سیوا دے بودھی پروگرام موجود نیں۔ ہانگ کانگ وچ اک ترقی پذیر سنیاسی برادری وی اے۔ ملائیشیا، سنگاپور، انڈونیشیا، تھائی لینڈ اتے فلپائن دی سمندر پار چینی بودھی برادریاں وچ اجیہی رسماں اوپر زور دتا جاندا اے جنہاں نوں پورا کرن نال پُرکھیاں دا بھلا ہووے اتے زندہ حاضر لوکاں دی مالی خوشحالی وچ وادھا ہووے۔ اوتھے ایہو جئے کئی رابطے پاۓ جاندے نیں جنہاں راہیں بودھی پروہت وجد دی حالت وچ گل کردے نیں اتے جنہاں نال عام لوکی شریر دی صحت اتے نفسیاتی سمسیاواں لئی مشورہ کردے نیں۔ چینی تاجر جو کہ ایس "ایشیائی شیر" معیشت دی اصل شکتی نیں بھکشوواں نوں دل کھول کے دان دیندے نیں تاں جے اوہ اوہناں دی مالی کامیابی لئی رسماں پوریاں کرن۔ تائیوان، ہانگ کانگ، سنگاپور اتے ملائیشیا وچ وی تبتی بودھیاں وچ وادھا ہو رہیا اے۔

جنوبی کوریا

بدھ مت تیجی صدی عیسوی وچ چین توں کوریا دے جزیرہ نما وچ داخل ہویا۔ جنوبی کوریا وچ کٹر عیسائی تنظیماں دے ودھدے ہوۓ حملیاں دے باوجود بدھ مت کافی مضبوط اے۔ پشلے دہاکہ وچ ایہناں جتھیاں دی لائی ہوئی اگاں نال  بےشمار بودھی مندر تباہ ہو گئے نیں۔ ۲۳ فیصد ابادی بدھ مت دی پیرو اے۔

جاپان

جاپان وچ بدھ مت کوریا دے رستے پنجویں صدی وچ آیا، اتے اوس نے تیرھویں صدی توں جاپانی سماج اتے سنسکرتی وچ وڈا کردار ادا کیتا اے، اوتھے شادی شدہ  مندری بھکشو پاۓ جاندے نیں اتے شراب پین اوپر وی کوئی پابندی نئیں۔ ایہناں پنڈتاں نے ہولی ہولی ان بیاہتے بھکشواں دی تھاں لے لئی اے۔ رواجاً بعض بودھی روائیتاں بےحد دیش بھگت رہیاں نیں، اوہناں دا کہنا اے کہ جاپان اک بودھی سورگ اے۔ اجوکے دور وچ بعض قیامت دے دہاڑے دے سرپھرے پیروکار وی اپنے آپ نوں بودھی قرار دیندے نیں، حالانکہ اوہناں دا شکیا مونی بدھا دی شکشا نال کوئی خاص  واسطہ نئیں۔

۴۰ فیصد ابادی اپنے آپ نوں بودھی مندی اے، جد کہ زیادہ تر جاپانی بدھ مت دی شکشا نوں پرانے جاپانی دھرم شنتاؤ نال رلاندے نیں۔ جنم اتے شادی بیاہ دی رسماں شنتاؤ دے مطابق ادا کیتی جاندیاں نیں جد کہ کریا کرم دیاں رسماں بودھی پروہت ادا کردے نیں۔

جاپان وچ مندراں دی دیکھ بھال بوہت ودیہ طریقے نال کیتی جاندی اے، یاتریاں اتے حاضری دین والیاں لئی، سغوں بعض ڈاڈھا کاروباری رویہ رکھدے نیں۔ زیادہ تر درس اتے مشق دونویں بوہت کمزور نیں۔ دنیا دی اک بوہت وڈی بودھی تنظیم، سودا گدائی، دی بنیاد جاپان وچ رکھی گئی۔ .

وسطی ایشیا دا مہایان بدھ مت

تبت

بدھ مت تبت وچ ستویں صدی عیسوی وچ آیا۔ کئی صدیاں دے دوران، شاہی خاندان دی سرپرستی اتے دھن دولت والے لوکاں دی مدد نال بدھ مت قبائلی زندگی دے کئی پرتاں وچ رچ بس گیا۔ عوامی جمہوریہ چین دے تبت اوپر قبضہ کرن دے بعد بدھ مت نوں شدت نال دبایا گیا۔ ۱۵۰ آشرماں اتے راہبہ گھراں نوں چھڈ کے باقی  ۶،۵۰۰ مٹھاں نوں تباہ کر دتا گیا، اتے وڈے شکشا وان سنیاسیاں وچوں زیادہ تر یا تے قتل کر دتے گئے یا اوہ جنگی قید خانیاں وچ مر گئے۔ سنسکرتی انقلاب دے مغروں، آشرماں نوں مڑ کے بنان دا کم پرانے بھکشوواں، مقامی لوکاں اتے دیش نکالے تبتیاں دی کوششاں دا نتیجہ اے، جس وچ سرکار نے کل دو یا تن دی تعمیر وچ مدد دتی اے۔

چینی اشتراکی حکومت کسے دھرم نوں نئیں مندی، پر پنج دھرماں نوں "تسلیم" کردی اے جنہاں وچ اک بدھ مت وی اے۔ بھاویں چینی سرکار دھرمی معاملیاں وچ دخل دین توں پرہیز دا دعویٰ کردی اے، پر جد دلائی لاما نے اک تبتی نوخیز منڈے نوں پنچن لاما دا پنر جنمی قرار دتا تے اوہ منڈا اتے اوس دے گھر والے غائب کر دتے گئے۔ ایس دے چھیتی بعد چینی سرکار نے اپنے طور اوپر تلاش شروع کیتی اتے اک ادھا چینی اتے ادھا تبتی منڈا پھڑ کے لے آۓ۔ دلائی لاما دا منتخب شدہ لڑدا آج تک ننیں ملا۔

اج کل ہر آشرم، مٹھ اتے مندر دے اپنے سرکاری کارندے نیں۔ ایہ سفید کپڑیاں وچ کجے پولس دے مرد اتے زنانیاں نیں جو مختلف کماں وچ "مدد" کردے نیں۔ ایس دا اصل مطلب ایہ ہے کہ ایہ لوکی بھکشو برادری اوپر نظر رکھدے نیں اتے اوہناں دی جاسوسی کردے نیں۔ کدی کدار کارندیاں دی ایہ ٹیماں سنیاسی برادری جنی وڈی ہوندیاں نیں۔ سرکاری مداخلت دے علاوہ تبت وچ بودھی لوکاں لئی اک وڈا مسٔلہ قابل استاداں دا گھاٹا اے۔ بھکشو مرد اتے زنانیاں ہور گیان پراپت کرن دی آشا رکھدے نیں پر زیادہ تر استاداں دی سرکھشا محدود اے۔ پشلے دہاکے وچ سرکار نے لہاسا وچ اک بودھی "وش ودیالہ" قائم کیتی۔ ایہ نوجوان تلکوواں لئی تربیتی مدرسہ دا کم دیندی اے جتھے اوہ تبتی بھاشا، خوشخطی، طب، اکو پنکچر اتے کجھ بودھی فلسفہ سکھدے نیں۔ ڈیجیٹل سمے نے عام تبتی نوجواناں نوں بدھ مت دے نیڑے کر دتا اے۔ اوہناں وچوں بوہت سارے ویب چَیٹ اتے ویبو جتھیاں دی رکنیت اختیار کردے نیں اتے انج بودھی شکشا اتے قصے کہانیاں اک دوجے نال ونڈدے نیں۔ بدھ مت دے متعلق ہور ودیا پراپت کرن نوں اک "سچا تبتی" ہون دی علامت منیا جاندا اے۔

مشرقی ترکستان

سنسکرتی انقلاب دے دوران مشرقی ترکستان (زنجیانگ) وچ رہن والے کلمک منگولاں دے زیادہ تر آشرم تباہ کر دتے گئے سان۔ کئییاں  دی ہن نویں سرے توں تعمیر ہو چکی اے پر ایتھے استاداں دے گھاٹے دا مسٔلہ تبت توں وی زیادہ ڈاڈھا اے۔ نویں نوجوان بھکشو ایس دَشا توں بوہت حوصلہ ہارن دا شکار ہوۓ نیں اتے کئی تے چھڈ ہی گئے نیں۔

اندرلا  منگولیا

عوامی جمہوریہ چین دے اثر ہیٹھ  تبت دے بودھی لوکاں دا سب توں مندا حال اندرلے منگولیا وچ سی۔ سنسکرتی انقلاب دے دوران مغربی ادھے علاقے وچ زیادہ تر آشرم تباہ کر دتے گئے۔ مشرقی ادھے حصے وچ، جو کہ پہلے منچوریا دا حصہ سی، بوہت سارے آشرم دوجی جنگ عظیم دے مُکن اوپر سٹالن دے فوجیاں دے ہتھوں تباہ ہو چکے سان جد روسیاں نے شمالی چین نوں جاپانیاں دے قبضہ توں ازاد کران وچ مدد کیتی سی۔ ۷۰۰ آشرماں وچوں صرف ۲۷ بچے سان۔

۱۹۸۰ دے دہاکے توں مندر قائم کرن اتے دوبارہ آشرم تعمیر کرن دی کوششاں جاری نیں، جتھے نہ صرف منگول سغوں ہان چینی وی حاضری دیندے نیں۔

منگولیا

منگولیا وچ ہزاراں دی تعداد وچ آشرم سان جو کہ سب دے سب ۱۹۳۷ وچ سٹالن دے حکم نال یا تے پوری طراں یا جزوی طور تے تباہ کر دتے گئے۔ ۱۹۴۶ وچ اولان باتر وچ اک آشرم بطور نشانی دے کھولیا گیا، اتے ۱۹۷۰ دے دہاکہ وچ بھکشوواں لئی اک پنج سالہ سرکھشا آشرم قائم کیتا گیا۔ ایس دا نصاب بوہت مختصر سی جس وچ کارل مارکس دے وچاراں دی شکشا اوپر بےحد زور دتا گیا سی، جتھے بھکشوواں نوں لوکاں لئی کجھ  رسماں ادا کرن دی اجازت سی۔ ۱۹۹۰ وچ اشتراکیت دے زوال دے بعد دیش نکالے تبتیاں دی مدد نال بدھ مت نے بوہت زور پھڑیا اے۔ بوہت سارے نویں بھکشو سرکھشا لئی بھارت جاندے نیں، اتے ۲۰۰ توں ودھ آشرم سادہ پیمانے اوپر تعمیر کیتے گئے نیں۔

۱۹۹۰ توں بعد منگولیا وچ بدھ مت نوں جو سب توں وڈی سمسیا موہرے آئی اوہ جبری قسم دے مورمن، ایڈونٹسٹ اتے بپتسمی عیسائی پرچاری  لوکاں دا آون سی جیہڑے لوکاں نوں انگریزی پڑھان دے بہانے آوندے نیں۔ اوہ لوکاں دے نیانیاں نوں پیسہ اتے امریکہ وچ شکشا پراپت کرنے وچ مدد مہیا کردے نیں جے اوہ اپنا دھرم بدلی  کر لین، اتے یسوع مسیح اوپر منگولیا دی روز مرہ دی زبان وچ لکھی ہوئی سندر، رنگیلیاں کتاباں مفت ونڈدے نیں۔ زیادہ تر بدھ مندر پیسے دی کمی دی وجہ توں ایہناں لوکاں نال مقابلہ نئیں کر پاندے۔ نوجوان لوکاں دی عیسائیت ول راغب ودھدی ہوئی تعداد نوں سامنے رکھدیاں ہوئیاں بدھ تنظیماں نے لوک بھاشا وچ بدھ مت اوپر جانکاری چھاپ کے، ٹیلیویژن اتے ریڈیو پروگراماں دے راہیں ونڈنی شروع کر دتی اے۔
 

ہُن منگولیا وچ جبری قسم دی دھرمی بدلی کرن اوپر پابندی لا دتی گئی اے۔  سنۂ ۲۰۱۰ وچ، ابادی دا ۵۳ فیصد حصہ بدھ متی سان جد کہ ۱۔۲ فیصد لوکی عیسائی سان۔

جلا وطن تبتی لوک

مڈھلے ایشیا دے بدھ پنتھاں وچوں سب توں زیادہ مضبوط اوہ لوکی نیں جو ۱۹۵۹ دی مقبول عام، چینی فوجی حکومت دے تبت اوپر قبضہ دے خلاف، جوکھم جتن دے بعد توں تقدس مآب دلائی لاما دے نال بھارت وچ دیس نکالے دی دشا وچ وسے ہوۓ نیں۔ اوہناں نے تبت دے زیادہ تر وڈے وڈے آشرم اتے بوہت سارے زنانیاں دے مٹھ دوبارہ چالو کر دتے نیں، اتے اوہناں کول بھکشو گورو، اتے سمادھ کرن والے عالم اتے استاداں دی روائتی سرکھشا دا پورا پربندھ اے۔ اوہناں کول ودیا، پرچول اتے اشاعتی سہولتاں موجود نیں  تاں جے اوہناں راہیں تبتی بودھی پنتھ دے سارے پرتاں نوں محفوظ رکھیا جاوے۔

 جلا وطن تبتیاں نے بھارت دے ہمالی علاقے، نیپال اتے بھوٹان سمیت لداخ اتے سکم دے بدھ مت نوں فیر توں فعال بنان وچ، استاداں اتے روائیتاں نوں فیر زندہ کر کے، بوہت مدد کیتی اے۔

نیپال

بھاویں نیپال دی زیادہ تر ابادی ہندو اے پر فیر وی مہاتما بدھ دی ایس جنم بھومی وچ بودھی سنسکرتی دے ڈوہنگے نشان پاۓ جاندے نیں۔ نسلی سنگھات مثلاً نوار، گورنگ، اتے تمنگ نیپالی بدھ مت دے روائتی روپ دی پوجا کردے نیں۔ بودھی لوکی ابادی دا ۹ فیصد نیں۔

بدھ مت اتے ہندو مت دے ملاپ نوں سامنے رکھدیاں ہوئیاں نیپال اک اجیہا واحد سماج اے جس وچ فرقہ وارانہ انتر نوں آشرماں دی چار دیواری تک ہی محدود رکھیا جاندا اے۔ پشلے۵۰۰ ورہیاں وچ شادی شدہ بھکشو سامنے آۓ نیں، جنہاں دی جدّی ذات اے جو مندراں دے رکھوالے اتے رسماں دے پورا کرن دے موہری بن جاندے نیں۔

روس

روس دے تن روائیتی بودھی علاقے بریاتیا، تُووا اتے کلمیکیا نیں۔ ایہناں علاقیاں وچ سارے آشرم، سواۓ اوہناں تناں دے جو بریاتیا وچ تباہ کیتے گئے، ۱۹۳۰  دے دہاکہ دے اخیر وچ سٹالن نے تباہ کر دتے۔ ۱۹۴۰ دے دہاکے وچ سٹالن نے بریاتیا وچ دو آشرم وکھالے دے طور تے کھول دتے، جنہاں اوپر کے جی بی دی ڈاڈھی نگرانی سی۔ بےچوغہ بھکشو دن دے دوران اپنے جھولے بطور یونیفارم دے رسماں دی ادائگی لئی پا لیندے سان۔ اشتراکیت دے زوال دے بعد تناں صوبیاں وچ وڈے پیمانے اوپر بدھ مت دی تجدید ہوئی اے۔ دیس نکالے تبتیاں نے ادھیاپک بھجواۓ نیں، اتے نویں نوجوان بھکشوواں نوں بدھ آشرماں وچ بھارت وچ سرکھشا لئی گھلیا جاندا اے۔ بریاتیا، تُووا اتے کلمیکیا وچ ۲۰ توں ودھ آشرم قائم کیتے گئے نیں۔

غیر بودھی دیس

بودھی دیساں دے اوپر یورپی قبضے نال اتے عیسائی پرچاریاں اتے عالماں دی مہربانی نال بدھ مت دے متعلق تفصیلی جانکاری انیہویں صدی عیسوی وچ یورپ  پوہنچی۔ ایسے سمے دے لگ بھگ، چینی اتے جاپانی دیس چھڈن والیاں نے شمالی امریکہ وچ مندر تعمیر کیتے۔

بدھ مت دیاں ساریاں قسماں ساری دنیا وچ، روائتی طور تے غیر بودھی ملکاں وچ وی، ملدیاں نیں۔ ایس وچ دو وڈے گروہ رلت نیں: ایشیائی تارکین وطن اتے غیر ایشیائی پیروکار۔ ایشیائی تارکین وطن نے، خصوصاً امریکہ، اسٹریلیا اتے کسے حد تک یورپ وچ وی، اپنی روائت دے مطابق بوہت سارے مندر قائم کیتے نیں۔ ایہناں مندراں دا بنیادی مقصد بھگتی پنتھ نوں اگاں ودھانا اتے تارکین وطن نوں اک اجیہا مرکزدینا اے جس توں اوہ اپنی سنسکرتی پچھان نوں قائم رکھ سکن۔ ایس ویلے امریکہ وچ چالیہ لکھ  توں ودھ بودھی نیں، اتے یورپ وچ ایہ تعداد ویہہ  لکھ  توں ودھ اے۔

ایس ویلے  پوری دنیا وچ، اتے ہر براعظم اوپر، ہر پنتھ دے ہزاراں بودھی "دھرم مرکز" موجود نیں۔ ایہ جو زیادہ تر تبتی، زین اتے تھیرواد پنتھ دے مرکز نیں ایہناں وچ غیر ایشیائی لوکی آوندے نیں جتھے سمادھ، سکھیا اتے رسماں نوں پورا کرن  اوپر زور دتا جاندا اے۔ استاداں وچ مغربی لوکی اتے ایشیائی نسل دے بودھی دونویں ہی رلت نیں۔ مرکزاں  دی سب توں وڈی تعداد امریکہ، فرانس اتے جرمنی وچ اے۔ بعض سنجیدہ چیلے ڈوہنگی سرکھشا لین لئی ایشیا جاندے نیں۔ ہور نالے، دنیا بھر وچ کئی وش ودیالیاں وچ بدھ مت دی شکشا دے مرکز قائم نیں، اتے بدھ مت اتے دوجے دھرماں، سائنس، نفسیات اتے طِب دے وچکار گل بات تے وچار ونڈ دا سلسلہ ودھدا جا رہیا اے۔ تقدس مآب دلائی لاما نے ایس سلسلہ وچ وڈا کردار ادا کیتا اے۔  

Top