اک سچائی تے یا کئی سچائیاں تے ایمان

کجھ دھرم اک سچائی نوں مندے نیں تے کجھ کئی سچائیاں تے ایمان رکھدے نیں۔ ایس نکھیڑ دا کویں اُپا کریئے؟

مثال دے طور تے، کجھ لوک دلوں ایس گل تے یقین رکھدے نیں پئی اوہنا دا دھرم ہی سب توں ودیہ اے، صرف اوہو ہی سچا اے تے باقی سارے دھرم جھوٹے نیں۔ پر دھرم اک ذاتی، انفرادی معاملہ اے۔ لہٰذا کسے وی بندے لئی، جس گل تے اودا ایمان اے تے جدے تے اوہ چلدا اے اصل وچ اودے لئی اوہو ہی اکو دھرم اے۔ پر میرے اوہناں بیلیاں نوں (میں ایہ کہنا چاہناں) جیہڑے ایہ سمجھدے نیں کہ سبناں لئی اکو ہی سچا دھرم اے، (میں ایہ کہنا چاہناں) کہ سچ تے ایہ وے کہ دنیا وچ کئی دھرم نیں تے کئی سچائیاں نیں۔ سانوں حقیقت نوں مننا چاہیدا اے۔ ایس لئی، کئی لوکاں تے کئی برادریاں لئی کئی اک دھرماں دا ہونا بالکل ٹھیک اے۔

جیہڑے ایہ سمجھدے نیں کہ اکو ہی سچائی اے تے اکو ہی (سچا) دھرم اے، اوہ اپنے دھرم تے قائم رہن۔ پر دوجے دھرماں دا وی احترام کرو، کیونکہ اوہ میرے بھیناں تے بھراواں نوں بڑا فائدہ پوہنچاندے نیں۔ ایس پاروں، میں سارے دھرم – عیسائی، مسلمان، یہودی، ہندو سب دی شاوش تے سوبھا کرنا واں۔

عیسائی مینوں اک چنگا عیسائی مندے نیں۔ میں کئی عیسائیاں نوں چنگا بدھ متی مننا واں۔ میں عیسائ پنتھ دیاں ساریاں وڈیاں وڈیاں متاں نوں مننا واں – درگذر، درد مندی، رحمدلی، وغیرہ۔ میں علت و معلول نوں دھرم دی بنیاد مننا واں، جد کہ عیسائی رب نوں دھرم دا مڈھ مندے نیں۔ میں اوہنا نوں کہنا واں کہ دھرواس اپراجن تے خالی پن دی شکشا ساڈا اپنا معاملہ اے، تہاڈا نئیں۔ ایدے بارے چنتا نہ کرو۔ پر دوجی شکشا، اوہ جنہاں دا تعلق پیار تے درد مندی نال اے، ساڈے سبناں لئی سانجھیاں نیں۔ ایہ سانجھی شکشا ایکتا دی بنیاد اے۔

Top