ذخیرۂ برزن

الیگزینڈر برزن دا بدھ ذخیرۂ برزن

ایس صفحے دے متنی روپ ول کانٹا بدلو ۔ مڈھلی بھال تے جاؤ

مڈھلا > لکھاری > الیگزینڈر برزن دی مختصر جنم ساکھی

الیگزینڈر برزن دی مختصر جنم ساکھی

الیگزینڈر برزن دی مورت الیگزینڈر برزن دا جنم پیٹرسن، نیو جرسی وچ ۱۹۴۴ وچ ہویا۔ ۱۹۶۵ وچ رٹگرز اتے پرنسٹن یونیورسٹیاں دے پوربی دیساں اتے سنسکرتیاں دی جانکاری دے مشترکہ شعبے توں بی-اے دی سند لئی؛ ۱۹۶۷ اتے ۱۹۷۲ وچ ہارورڈ یونیورسٹی دے دوری پوربی زباناں (چینی زبان)، اتے سنسکرت اتے ہند بارے جانکاری دے شعبیاں توں اگڑ پچھڑ ایم-اے اتے پی-ایچ-ڈی دیاں سنداں لئیاں۔ ۱۹۶۹ توں ۱۹۹۸ تیکر اوہ زیادہ تر دھرم شالہ، بھارت وچ ہی رہۓ جتھے شروع وچ اوہ فل برائٹ وظیفے اوپر گئے سان، اوتھے اوہناں نے چاروں تبتی بدھ مت سوچاں دے گورواں کولوں شکشا لئی اتے اوہناں دی نگرانی ہیٹھ بدھ مت اوپر عمل چالو کیتا۔ اوہناں دے اصلی استاد تسنژاب سرکونگ رنپوچے سان جو کہ تقدس مآب دلائی لاما دے نائب استاد اتے مناظرے کرن دے سنگی استاد رہ چکے سان۔ اوہناں نے سرکونگ رنپوچے دے سکتر اتے التھاؤ دے طور تے نو ورہے کم کیتا، اتے کئی جگتائی گیڑیاں وچ اوہناں دے نال سفر کیتا۔ کدے کدار اوہناں نوں تقدس مآب دلائی لاما دے دھرمی التھاؤ دا کم کرن دا موقع وی ملیا۔ 

ڈاکٹر برزن نے، جو کہ تبتی لکھتاں دے ترجمے دے کتاب گھر اتے ذخیریاں دے مڈھ بنن والے رکناں وچ رلت نیں، تبتی فنی اصطلاحواں جیہڑیاں کہ اکثر غلط سمجھیاں جاوندیاں نیں، دا انگریزی وچ ترجمہ کرن لئی نویاں اصطلاحواں گھڑیاں۔ ڈاکٹر برزن نے دوجیاں کئی زباناں دے التھاؤاں نال کم کردیاں ہویاں ایہناں اصولاں مطابق نویاں اصطلاحواں گھڑن اتے مڑ کے اوہناں نوں تکن وچ مدد کیتی۔

۱۹۸۳ توں لے کے ہن تیکر ڈاکٹر برزن نے دنیا دے ۷۰ توں ودھ دیساں دیاں یونیورسٹیاں اتے آشرماں وچ بدھ فلسفہ تے عبادت، نالے تبتی-منگول تاریخ، اتے طب-نجوم وچار دے ون سونّے پکھاں اوپر درس دتا ہے۔ اوہناں دا زیادہ تر سفر پشلے اتے اجوکے اشتراکی دیس، لاطینی امریکہ، افریقہ، وسطی ایشیا، اتے وسطی پورب وچ رہیا۔ اوہناں دیاں کئی چھپیاں ہوئیاں لکھتاں اتے ترجمیاں دے علاوہ اوہناں دے کئی لیکچر اوہناں علاقیاں دی زباناں وچ چھپ چکے نیں۔

ڈاکٹر برزن نے جگتائی پدھر اوپر تبتی-منگول سنسکرتی دے کئی منصوبے جویں چرنوبل دے مارے بماراں لئی روسی ادارہ صحت دی سہائتا نال قائم کیتے ہوۓ تبتی طبی مدد دے پروگرام اوپرکم کیتا۔ اتے ایس توں ودھ منگولیا وچ گیر فاونڈیشن دے بدھ مت دی کتاباں دے عام زبان وچ چھاپن تے کھلارن دے منصوبے اوپر وی کم کیتا۔ ڈاکٹر برزن نے بدھ مت اتے اسلام وچکار گل بات چالو کرن تے اوس نوں ودھاوا دین وچ وی بڑا کردار ادا کیتا۔

۱۹۹۸ وچ ڈاکٹر برزن پچھم نوں مُڑ آۓ تاں جے لکھائی لئی چوکھا چنگا ماحول مل سکے۔ ہن اوہ کدے کدار سفر کردے تے مختلف آشرماں وچ درس دیندے نیں، پر چوکھا وقت اپنی ان چھپی لکھتاں نوں ذخیرہ برزن دی ویب سائٹ لئی تیار کرن وچ لاوندے نیں۔ اج کل اوہ برلن، جرمنی وچ رہندے نیں۔