བྷར་ཛིན་བཤད་མཛོད།

འབུམ་རམས་པ་ཨེ་ལེག་ཛན་ཌར་བྷར་ཛིན་གྱི་ནང་བསྟན་བཤད་མཛོད།

དྲ་ཤོག་དེའི་ནང་གི་ཡིག་ཐོག་ཅི་ཡོད་ལ་ཁ་ཕོད་པ། ཁ་ལོ་བ་གཙོ་བོར་མཆོངས། ཁ་ལོ་བ་གཙོ་བོར་རྒྱུགས།

དྲ་ཤོག་ངོ་གདོང་། > བོད་སོག་ནང་ཆོས་ཀྱི་རྨང་གཞི། > རིམ་པ། ༢། ལམ་རིམ། > རང་གཅེས་འཛིན་སྤོང་ཚུལ་གྱི་བསླབ་བྱ།

རང་གཅེས་འཛིན་སྤོང་ཚུལ་གྱི་བསླབ་བྱ།

དགེ་བཤེས་ངག་དབང་དར་རྒྱས། ཕྱི་ལོ་ ༡༩༧༣ ལོར་རྒྱ་གར་དྷ་རམ་ས་ལར།
ཤར་པ་སྤྲུལ་སྐུས་བོད་ཡིག་ནས་དབྱིན་ཡིག་ཏུ་ཕབ་སྒྱུར་ཞུས།
ཨེ་ལེག་ཛན་ཌར་ བྷར་ཛིན་གྱི་རྩོམ་སྒྲིག་ཅུང་ཟད་ཞུས།
ཨེ་ནེ་ཊི་ ཨན་གྲོ་རུ་(Annette Andrews)གྱིས་འདྲ་བཤུས་རྩོམ་སྒྲིག་བྱས།

རང་གིས་སོ་སོའི་སྒྲིག་གཞི་དང་། ཁྲིམས་ལུགས། རྩ་ཁྲིམས་བཅས་བཟོ་ཞིང་། གལ་ཏེ་གཞན་གྱིས་སོ་སོའི་ཁྲིམས་ལུགས་བཤིག་ན། འཛིན་བཟུང་བྱས་ཏེ་ཁྲིམས་ཆད་གཅོད་ཀྱི་ཡོད། འོན་ཀྱང་གལ་ཏེ་ཁྲིམས་ལུགས་དེ་སོ་སོས་བཤིག་ན། ཆད་པ་གཅོད་ཀྱི་མེད། དགེ་བཤེས་ཤར་ར་བ་་བས། ཇི་སྲིད་རང་གི་སྐྱོན་ཆ་ངོས་འཛིན་མ་ཐུབ་པ་དང་བདག་ནི་རང་གི་དགྲ་ཞིག་ཏུ་མ་མཐོང་ན་དེ་སྲིད་དུ་གོ་ཤེས་ཅན་ཞིག་ནམ་ཡང་མི་ཡོང་ཞེས་གསུངས། ཅི་སྟེ་རང་གི་བསམ་པའི་ཚོར་བ་གལ་ཆེ་ཤོས་སུ་བསམ་ན། མི་སུ་གཅིག་ཀྱང་རང་ལ་མི་འཁོར། ཐ་ན་ཐབས་མཁས་ལྡན་པའི་བླ་མ་ཞིག་གིས་ཀྱང་རང་ཁོ་ན་བསམ་མཁན་མི་ཞིག་ལ་རོགས་བྱེད་མི་ཐུབ། གང་ཡིན་ཟེར་ན། བླ་མའི་བསླབ་བྱ་དང་རང་གཅེས་འཛིན་གཉིས་གདོང་ཐུག་ཤོར་གྱི་ཡོད། བླ་མས་རང་ལ་ཐར་ལམ་སྟོན་པར། ཐོག་མར་རང་ངོས་ནས་རང་གཅེས་འཛིན་གྱི་ཉེས་དམིགས་ཤེས་དགོས། རང་གཅེས་འཛིན་ཡོད་ན་མི་དགེ་བའི་ལས་ཀུན་བྱེད་སྲིད། དེར་བརྟེན་རང་གི་བྱ་སྤྱོད་ཀྱི་ལེགས་ཉེས་དཔྱོད་དགོས། བླ་མས་རང་ལ་རོགས་རམ་བྱེད་མི་ཐུབ་པ་མ་ཟད་སྤྱིར་བཏང་གྲོགས་པོ་ཚོས་ཀྱང་རོགས་བྱེད་མི་ཐུབ། གང་ཡིན་ཟེར་ན། སོ་སོས་ཁོང་ཚོའི་བསླབ་བྱར་ཉན་འཇོག་བྱེད་པའི་བསམ་པའི་སྒོ་བཀག་གི་ཡོད།།

ང་ཚོར་རང་གཅེས་འཛིན་གྱི་སྐྱོན་ཆ་ཡོད་པ་ཚང་མས་ཁས་ལེན་བྱེད་དགོས། སངས་རྒྱས་ཉག་ཅིག་ལ་དེའི་སྐྱོན་གྱི་དྲི་མ་མེད། དེར་བརྟེན་སྐྱོན་དེ་ངོས་བཟུང་སྟེ་སྤོང་ཐབས་བྱེད་དགོས། མ་མཐར་རང་གཅེས་འཛིན་ལྡན་པ་ཤེས་ན་ཡར་རྒྱས་འགྲོ་བར་ཕན་ཐོགས་ཤིན་ཏུ་ཆེ། གཞན་གྱིས་རང་ལ་སྐྱོན་འཛུགས་བྱེད་སྐབས། དེ་དག་ཚང་མ་རང་རྒྱུད་ཀྱི་རང་གཅེས་འཛིན་གྱི་ལན་པ་རེད་ཅེས་རྒྱུན་དུ་བསམ་དགོས། རང་ངོས་ནས་དེ་ངོས་འཛིན་མ་ཐུབ་ན་ཁོང་ཁྲོའི་རྒྱུར་འགྲོ་གི་ཡོད། གལ་ཏེ་རང་གི་རྐང་པར་ཚེར་མ་ཞིག་ཟུག་སྐབས་ཁོང་ཁྲོ་བྱས་ཏེ་ཚེར་མ་ལ་ཕར་བཞུས་ན། གྱོང་སུ་ལ་ཕོག་གི་རེད། ད་ལྟ་ང་ཚོས་སྐྱོན་འཛུགས་དང་མི་བདེ་བ་ཕྲན་བུར་བཟོད་མི་ཐུབ་ན། ངན་སོང་གི་སྡུག་བསྔལ་ལ་ཇི་ལྟར་བཟོད་ནུས།

དགེ་བཤེས་སྤྱན་མངའ་བའི་ཞལ་ནས། ང་ཚོས་ངེས་པར་དུ་བཟོད་པ་ལྟ་བུ་དམིགས་ཡུལ་བཟུང་དགོས་་དེ་ལྟར་བྱུང་ན་གཞན་གྱིས་སྐྱོན་བརྗོད་བྱས་ཀྱང་། དམིགས་ཡུལ་བརྟན་པོ་ཡོད་པས་ཅི་ཡང་མི་གནོད། ཅི་སྟེ་ཐོག་མར་དམིགས་ཡུལ་མེད་ན། མདའ་ནམ་ཡང་མི་འཕེན། ཤོད་སྲོལ་ཞིག་ལ་ཞགས་ཐག་ནང་སྐེ་རྐྱོང་ཟེར་གྱི་ཡོད། སོ་སོའི་ངོས་ནས་ནོར་འཁྲུལ་གང་ཡང་མ་བྱས་ནའང་གཞན་གྱི་སྐྱོན་འཛུགས་བྱས་ན་དེ་ནི་སྐྱེ་བ་སྔོན་མར་རང་ངོས་ནས་གཞན་ལ་མཐོང་ཆུང་བྱས་པའི་འབྲས་བུར་ངེས། དཔེར་ན། ཐེངས་ཤིག་སངས་རྒྱས་ཀྱི་སློབ་མ་དགྲ་བཅོམ་པ་ཞིག་གིས་སྡོམ་པ་གསུམ་དང་འབྲེལ་བའི་ཉོན་མོངས་ཐམས་ཅད་བཅོམ་ནའང་། མི་འགའ་ཞིག་གིས་དགྲ་བཅོམ་པ་དེས་སྡོམ་པ་སྲུང་གི་མི་འདུག་ཅེས་བཤད་དེ་ཁོ་རང་ལ་དཔང་པོ་རྫུན་མ་བྱས། དེ་ལ་སངས་རྒྱས་ཐུགས་ཕམ་ནས་དགྲ་བཅོམ་པ་དེས་སྡོམ་པ་གཏོང་མི་སྲིད་ཅེས་གསུངས་པ་དང་། སླར་ཡང་སངས་རྒྱས་ཀྱི་ཞལ་ནས། ཉམས་རྟོགས་ཕུལ་དུ་ཕྱིན་པའི་གང་ཟག་གིས་སྡོམ་པ་སྲུང་གི་མི་འདུག་ཅེས་སྐྱོན་འཛུགས་བྱེད་མཁན་རྣམས་ནང་པར་མི་བརྩི་བ་མ་ཟད་ནང་པར་སྡིགས་ར་སྐུལ་མཁན་ཞིག་ཏུ་བརྩི་གི་ཡིན་ཞེས་གསུངས། གཞན་རྣམས་ཀྱིས་དགྲ་བཅོམ་པར་དེ་འདྲའི་སྐྱོན་འཛུགས་བྱེད་དོན་ཅི་ལགས་སམ་ཞེས་དྲི་བ་ཕུལ། དེ་ལ་སངས་རྒྱས་ཀྱིས་དེའི་རྐྱེན་ནི་དགྲ་བཅོམ་པ་དེས་རང་གི་སྐྱེ་བ་སྔོན་མའི་སྐབས་ངག་འཁྱལ་དང་སྐུར་འདེབས་ཀྱི་ལས་བསགས་པ་དང་རྒྱལ་པོའི་ཆུང་མ་རྒྱང་འབུད་གཏོང་བའི་རྐྱེན་བྱས་སྟབས། དེ་དག་གི་འབྲས་བུ་ཡིན་ཞེས་ལན་གནང་།

སྐྱོན་འཛུགས་བྱེད་པ་དང་། ངག་འཁྱལ་སྨྲ་བ། གཞན་ལ་སྐྱོན་འདོགས་བྱེད་པ་རྣམས་ལ་མི་དགེ་བའི་སྟོབས་ཤིན་ཏུ་ཆེ། གང་ཡིན་ཞེ་ན། དེ་དག་གིས་རང་གི་ཉམས་ལེན་ལ་ཕན་མི་ཐོགས་པ་མ་ཟད་གཞན་ལ་གནོད་པ་བྱེད་ཅིང་མགོ་རྙོག་གི་རྐྱེན་བྱེད། སངས་རྒྱས་པའི་གང་ཟག་འབའ་ཞིག་གིས་ནང་ཕན་ཚུན་དཔོག་ནུས། གཞན་ལ་བདེན་བརྫུན་གང་ཡང་རུང་བའི་སྐྱོན་འཛུགས་བྱེད་པས་མི་དགེ་བའི་ལས་གསོག་པ་ཡིན། ཡང་ན་བྱང་ཆུབ་སེམས་དཔའ་ལ་སྐྱོན་འཛུགས་བྱས་ན་སྡིག་པ་ཤིན་ཏུ་ཆེ། སྐྱོན་འཛུགས་བྱེད་སྐབས་རྒྱུ་མཚན་ཡང་དག་པ་ཞིག་དགོས། དེ་མིན་འབྲས་བུ་མི་དགེ་བ་ཤ་སྟག་ཡོང་གི་ཡོད།

ག་དུས་ཡིན་ཀྱང་གཞན་ལ་སྐྱོན་བརྗོད་ཤ་སྟག་བྱེད་པའི་གོམས་གཤིས་ལྡན་པའི་མི་རྣམས་ལ་རང་གཅེས་འཛིན་ཤུགས་ཆེན་པོ་ཡོད། དགེ་འདུན་པ་མང་པོ་ཞིག་གིས་ཆོས་མང་པོ་སློབ་སྦྱོང་བྱས་ཡོད་ནའང་། དེ་དག་སོ་སོའི་ཉམས་ལེན་ནང་འཁྱེར་མི་ཐུབ་པའི་རྒྱུ་མཚན་ནི་སྐྱེ་བ་སྔོན་མར་རང་གཅེས་འཛིན་གྱི་གོང་བུར་གྱུར་སྟབས་ཡིན། སོ་སོའི་དགྲ་ལ་གནོད་འཚེ་བྱེད་པ་དེའང་རང་གཅེས་འཛིན་གྱི་ངན་འབྲས་ཡིན།

སངས་རྒྱས་ཞལ་བཞུགས་པའི་སྐབས་ཐེངས་ཤིག་དགེ་འདུན་པ་ཞིག་རང་གི་གྲྭ་ཆས་ལ་ཚོས་རྒྱག་པའི་ཚེ། སྤྲེའུ་ཞིག་ཚོས་སྣོད་ནང་ལྷུང་ནས་ཤི་བ་རེད། དེ་རྗེས་དགེ་འདུན་པ་དེས་གྲྭ་ཆས་སྣོད་ལས་མར་བཏོན་པ་དང་། གྲྭ་ཆས་དེ་སྤྲེའིུ་ཤར་གྱུར་བ་མཐོང་། མི་རྣམས་ཀྱིས་དགེ་འདུན་པར་དེས་སྤྲེའུ་མ་བྱིན་པར་བླངས་ཏེ་སྤྲེའུ་ཤ་བཙོས་འདུག་ཅེས་སྐྱོན་འཛུགས་བྱས། དེ་ནས་གྲྭ་པ་དེ་ཁྲིམས་ཁང་དུ་ཁྲིད་ནས་ཁྲིམས་ཆད་བཏང་། མི་རིང་བའི་རྗེས་སྤྲེའུ་དེ་བསྐྱར་དུ་གསོན་པས་དགེ་འདུན་པ་དེར་ནག་ཉེས་མེད་པ་ར་འཕྲོད་བྱུང་། དེ་ནས་དགེ་འདུན་པ་དེས་དེའི་རྒྱུ་མཚན་ཅི་ལགས་སམ་ཞེས་སངས་རྒྱས་ལ་བཀའ་འདྲི་ཞུས་པས། སྐྱེ་བ་སྔོན་མར་དགེ་འདུན་པ་དེས་དགེ་འདུན་པ་གཞན་ཞིག་ལ་སྤྲེའུ་མ་བྱིན་པར་བླངས་པའི་སྐྱོན་འཛུགས་བྱས་པའི་ཉེས་པ་ཡིན་ཅེས་ལན་གནང་།

ང་ཚོས་བདེ་བ་དང་དགའ་ཉམས་ལ་ཧ་ཅང་ཆགས་ཞེན་བྱེད་ཀྱི་ཡོད་པ་དང་། དེའི་ཕྱིར་ང་ཚོས་དངུལ་མང་པོ་གསོག་པར་དཀའ་ལས་བརྒྱབ་སྟེ། སོ་སོས་རང་ཉིད་རྐུ་བྱེད་མཁན་གྱི་དམིགས་ས་ཞིག་བཟོ་གི་ཡོད། རང་གི་དངུལ་ཚང་མ་ཁུག་མ་ཞིག་གི་ནང་བླུགས་ཏེ་ཁུག་མ་དེ་ཁང་པའི་ཐོག་ལ་དམ་པོར་བསྡམས་ནས་འཇོག་མཁན་མི་ཞིག་གི་སྒྲུང་ཞིག་ཡོད། གང་ཡིན་ཟེར་ན། ཁོ་པར་དངུལ་བརླག་དོགས་ཀྱི་སེམས་ཁྲལ་ཆེན་པོ་ཡོད། ཉིན་ཞིག་ཁུག་མ་དེ་མར་ཟགས་ནས་མགོའི་སྟེང་ལྷུང་ནས་རྨས་སྐྱོན་ཆེན་པོ་བཏང་། སྒྲུང་དེའི་བསྟན་དོན་ནི་རང་གཅེས་འཛིན་གྱིས་ང་ཚོའི་འཕྲལ་ཕུགས་གཉིས་ཀའི་བདེ་སྐྱིད་མེད་པ་བཟོ་གི་ཡོད། ང་ཚོ་ཚང་མར་སྐྱེ་བ་སྔོན་མ་རང་གཅེས་འཛིན་ལ་གོམས་འདྲིས་ཤུགས་ཆེན་པོ་ཡོད་སྟབས། འཕྲལ་མ་ཉིད་དུ་དེ་མེད་པ་བཟོ་མི་ཐུབ། འོན་ཀྱང་ང་ཚོས་དེ་ནི་ང་ཚོའི་དཀའ་ངལ་ཆེ་ཤོས་ཤིག་ཡིན་པ་ཤེས་རྟོགས་ཐུབ།

དེས་ན། ང་ཚོས་ངེས་པར་དུ་གཞན་གྱི་སྐྱོན་འཛུགས་ལ་ཡ་ལན་སློག་མི་ཉན་པ་དང་དེའི་ཚབ་ཏུ་གཞན་གྱི་ནོར་འཁྲུལ་དང་རང་གི་རང་གཅེས་འཛིན་གྱི་སྐྱོན་ཡིན་པར་ཆ་འཇོག་བྱེད་དགོས། རང་གཅེས་འཛིན་ཚུལ་བཞིན་དུ་ཤེས་རྟོགས་ཐུབ་ན་དེ་ནི་བཟོད་པ་གོང་མཐོར་གཏོང་བར་ཕན་ཐོགས་ཆེ། མེའི་ཚ་བ་ནི་རང་བཞིན། དེ་ལ་ཡ་མཚན་རྒྱུ་ཅི་ཡང་མེད། དེ་ག་ནང་བཞིན་མི་ཞིག་སྐྱོན་འཛུགས་ལ་དགའ་བ་དང་རང་ངོས་སྐྱོན་བརྗོད་དེ་རང་གཅེས་འཛིན་ནང་རྩ་བ་ཚུགས་པ་ནི་རང་བཞིན་ཡིན་པ་ཤེས་རྟོགས་བྱེད་དགོས། དེ་ལྟ་བུའི་གོ་རྟོགས་ཀྱིས་ཁོང་ཁྲོའམ་རིག་ཚོ་མ་ཟིན་པ་བཟོ་གི་མེད། གང་ཡིན་ཟེར་ན། གཞན་གྱིས་ནོར་འཁྲུལ་བྱས་པའམ་སྐྱོན་ཆ་ཡོད་པ་ཁུངས་སྐྱེལ་ར་སྤྲོད་བྱེད་མི་དགོས། མདོ་སྡེ་རྒྱན་ལས། རང་གཅེས་འཛིན་གྱིས་རང་གཞན་གཉིས་ཀ་ཕུང་ལ་སྦྱོར་བ་དང་བཟང་སྤྱོད་ཉམས་པར་བྱེད་ཅེས་གསུངས། ང་ཚོས་རང་གཅེས་འཛིན་དང་བཅས་བྱ་བ་སྒྲུབ་པས་ངན་འགྲོ་གནས་སུ་སྐྱེ་བའི་རྐྱེན་བྱེད། སངས་རྒྱས་དང་བྱང་ཆུབ་སེམས་དཔའ་རྣམས་ཀྱིས་རང་གཅེས་འཛིན་ལ་མི་དགའ་བ་གནང་གི་ཡོད། རྒྱུ་མཚན་ནི་དེ་ལས་མི་བདེ་བ་བྱུང་བས་རང་དབང་ཅི་ཡང་མེད་པའི་ངན་འགྲོའི་གནས་སུ་སྐྱེ་བར་བྱེད་ཀྱི་ཡོད།

རང་གཅེས་འཛིན་གྱིས་ང་ཚོའི་སྔོན་གྱི་འབད་བརྩོན་ཚང་མ་ཆུད་ཟོས་སུ་གཏོང་བ་དང་ཡར་རྒྱས་འགྲོ་འཇུག་གི་མེད། དེ་ནི་མི་ཚེའི་སྙིང་པོ་དང་བྲལ་བའི་མི་ཞིག་ལྟར་ཡིན་པ་ངོས་འཛིན་དགོས། རྟག་ཏུ་རང་གཅེས་འཛིན་དེ་མེད་པར་བཟོ་རྒྱུར་འབད་དགོས། ང་ཚོའི་ཉམས་ལེན་གང་ཡིན་ཀྱང་། གཙོ་བོ་རང་གཅེས་འཛིན་དེ་མེད་པ་བཟོ་རྒྱུར་དམིགས་དགོས། བཀའ་གདམས་དགེ་བཤེས་ཤིག་གིས། ངས་གཞུང་ཞིག་ག་དུས་ཀློག་ཀྱང་སྐྱོན་གྱི་ཆ་ཐམས་ཅད་རང་གི་ཡིན་པ་དང་། ཡོན་ཏན་གྱི་ཆ་ཐམས་ཅད་གཞན་གྱི་ཡིན་པར་བསམ་གྱི་ཡོད་ཅེས་གསུངས། དེ་ལྟར་ཁོང་གིས་རང་གཅེས་འཛིན་ལ་ཁ་གཏད་གཅོག་གི་ཡོད། རང་གཅེས་འཛིན་ཤུགས་ཆུང་དུ་མ་བཏང་བར་བྱང་ཆུབ་སེམས་ཀྱི་ཡོན་ཏན་མི་འཐོབ། བྱང་སེམས་དང་སྙིང་རྗེ་ཡོད་པའི་ཐོག་ནས་རང་གཅེས་འཛིན་གྱི་གཉེན་པོ་ཤུགས་ཆེ་རུ་གཏོང་ཐུབ་ཅིང་། སྙིང་རྗེ་སྟངས་འཛིན་བྱེད་ཅིང་སེམས་རྒྱུད་དུ་ཡིད་བཞིན་གྱི་ནོར་བུ་སྒྲུབ། གལ་ཏེ་སྙིང་རྗེ་ཉམས་ལེན་བྱས་ན། དེའི་འབྲས་བུས་རང་གཅེས་འཛིན་གྱི་ཤུགས་རྐྱེན་མེད་པ་བཟོ་ཐུབ།

དགེ་བཤེས་པོ་ཏོ་བའི་ཞལ་ནས། ཕན་པོའི་ས་ཆ་ཞིག་ནང་དགེ་བཤེས་ཁམས་ལུང་པ་ལས་སྐྱིད་པ་མེད་པ་དང་། ས་ཆ་གཞན་ཞིག་ནང་དགེ་བཤེས་སྤྱན་མངའ་བ་ལས་སྐྱིད་པ་མེད། དེ་ནི་ཁོང་གཉིས་ཀྱིས་རང་གཅེས་འཛིན་སྤངས་པ་ལས་བྱུང་ཞེས་གསུངས། དགེ་བཤེས་སྤྱན་མངའ་བ་ནི་དབུལ་ཕོངས་ཡིན་ཅིང་ཟས་ཀྱང་ཏག་ཏག་མེད་པ་དང་། ཀོ་བའི་སྨད་གཡོག་ལྷན་པ་བརྒྱབ་པ་ཞིག་ཡོད། འོན་ཀྱང་ད་དུང་ཕྱུག་པོའི་ཚོར་སྣང་ལྡན་ཅིང་། ད་ངས་འཇིག་རྟེན་ཁྱོན་ཡོངས་སུ་སྦྱིན་བདག་བྱེད་ཐུབ་ཅེས་གསུངས། རང་གཅེས་འཛིན་གྱིས་ཀུན་ནས་བསླངས་པའི་སྤྱོད་པ་ནི་བདག་འཛིན་མ་རིག་པས་བྱས་པ་དང་། བྱང་ཆུབ་སེམས་སྐྱེད་པའི་གེགས་ཀྱི་གཙོ་བོ་དེ་ཡིན། གཞུང་ཞིག་གི་ནང་། སེམས་ཅན་ཐམས་ཅད་ལ་སྙིང་རྗེ་ལྡན་པ་ནི་ཡིད་བཞིན་གྱི་ནོར་བུ་དང་། དེ་མ་བྱུང་ན་ང་ཚོས་རང་ཉིད་ཁ་ཕྱོགས་གཞན་ཞིག་ཏུ་བསྒྱུར་བ་ཡིན། རང་གཅེས་འཛིན་དང་བདག་འཛིན་གཉིས་ལ་འཁོན་འཛིན་བྱེད་རྒྱུའི་ཚབ་ཏུ་ང་ཚོས་སེམས་ཅན་འགའ་ཞིག་ང་ཚོའི་དགྲར་བལྟས་ནས་ངན་སེམས་བྱེད་པ་དང་། དགྲ་བོ་ངོ་མ་གྲོགས་སུ་བལྟ་གི་ཡོད་ཅེས་གསུངས། གཞུང་གཞན་ཞིག་ནང་། འདྲེ་དང་མི་ངན་སྡུག་ཤོས་དེ་ཕྱི་ལོགས་ནས་མི་རྙེད་པར། འདྲེ་ཞུགས་པའི་ལུས་ཀྱི་ཁང་པའི་ནང་རང་གཅེས་འཛིན་གྱི་རྣམ་པར་གནས་ཡོད་ཅེས་གསུངས།

བྱང་ཆུབ་སེམས་ཡོད་ན་ང་ཚོས་རང་གཅེས་འཛིན་མེད་པ་བཟོ་ཐུབ། རང་གཅེས་འཛིན་ཡོད་པའི་རྐྱེན་གྱིས་ང་ཚོ་གདོན་འདྲེའི་གནོད་པའི་ཡུལ་དུ་གྱུར་ནས་སོ་སོར་སྐྱོན་བརྗོད་དང་ལོག་སྤྱོད་སོགས་བྱེད་པར་རང་སྲུང་བྱེད་བཅུག་སྟེ་ཚུལ་མིན་གྱི་སྤྱོད་པར་འཇུག་གི་ཡོད། སོ་སོ་རང་ཉིད་གཅིག་པུའི་འདོད་པ་སྐོང་ཆེད་རང་གཅེས་འཛིན་གྱི་ཐོག་ནས་བྱ་བ་བྱེད་ཅིང་། སོ་སོ་སྐྱིད་པོ་ཡོང་ཐབས་བྱེད་པ་ནི་ང་ཚོའི་སེམས་ཁུར་བྱེད་ས་གཙོ་བོ་དང་དམིགས་ཡུལ་ཆེ་ཤོས་དེར་འཛིན་གྱི་ཡོད། 

སྐབས་རེ་ང་ཚོས་གཞན་རྣམས་ཁོང་ཁྲོ་བའི་ལས་ལ་རང་དབང་མེད་པར་འཇུག་གི་ཡོད་རང་གཅེས་འཛིན་གྱི་ཐོག་ནས་རང་ཉིད་སྐྱིད་པོ་ཡོང་ཆེད་ང་ཚོས་གཞན་ལ་མཐོང་ཆུང་བྱེད་པ་དང་གནོད་འཚེ་བྱེད་ཀྱི་ཡོད། རང་གཅེས་འཛིན་གྱིས་ཁེངས་དྲེགས་དང་ཕྲག་དོག་གི་རྐྱེན་བྱེད། མི་ཞིག་ལ་བྱ་བ་བཟང་པོ་ཞིག་ཕྲད་སྐབས། ང་ཚོའི་ཁ་ནས་འཚམས་འདྲི་བྱེད་ནའང་། རང་ལ་མ་ཐོབ་སྟབས་སེམས་གཏིང་ནས་ཕྲག་དོག་ཟ་གི་ཡོད། གལ་ཏེ་རང་གཅེས་འཛིན་མེད་ན། ཕྲག་དོག་ཟ་རྒྱུའི་ཚབ་ཏུ་གཞན་གྱི་གྲུབ་འབྲས་ལ་རྗེས་སུ་ཡི་རང་བྱས་ཏེ་དགེ་བའི་ལས་གསོག་ཐུབ། མི་ཚེའི་ནང་འཆམ་མཐུན་མེད་པའི་རྒྱུ་མཚན་ནི་རང་གཅེས་འཛིན་ཡིན། གལ་སྲིད་རང་ལ་རང་གཅེས་འཛིན་ཤུགས་ཆེན་པོ་ཡོད་ན། རང་སྲུང་ལ་དོ་ནན་ཆེ་བ་དང་། གཞན་དང་འཐབ་རེས་བྱེད་པ། བཟོད་སྲན་ཆུང་བ། གཞན་གྱིས་གང་བྱས་པ་ཚང་མས་རང་ལ་བསུན་བཙེར་བཟོ། སེམས་འཚབ་བཟོ་བ་སོགས་ཡོང་གི་ཡོད། ཁྱོ་ག་དང་སྐྱེ་སྨན། ཕ་མ་དང་བུ་ཕྲུག་དབར་མི་མཐུན་པ་ཡོང་གི་ཡོད། གང་ཡིན་ཞེ་ན། དེ་ལྟའི་རང་སྲུང་གི་བསམ་བློས་རྐྱེན་བྱེད་ཀྱི་ཡོད།

གཞན་ཡང་བཀའ་གདམས་པའི་དགེ་བཤེས་ཤིག་དགུང་ལོ་བཞི་བཅུར་མ་སླེབས་བར་རྐུ་མ་བྱས་ཏེ་བསྡད་པ་རེད། ཁོ་རང་ལ་ས་ཞིང་འདེབས་སའི་ས་ཁྱོན་ཨེ་ཀར་མང་པོ་ཡོད་ཀྱང་ཆོམ་རྐུན་ཆགས་པ་རེད། ཉིན་མོ་ཕར་འགྲོ་ཚུར་འོང་བྱེད་མཁན་འཕྲོག་བཅོམ་བྱེད་པ་དང་། མཚན་མོ་ཁང་པའི་ནང་ནས་འཕྲོག་བཅོམ་བྱེད་ཀྱི་ཡོད། ཉིན་གཅིག་ཁོ་རང་གི་ལམ་ཁ་ཕྱོགས་བསྒྱུར་ཏེ་ཆོས་ལ་ཞུགས་པ་དང་། རང་རྒྱུད་ཀྱི་རང་གཅེས་འཛིན་མེད་པ་བཟོས་ཏེ། སྔོན་མ་ངའི་ཁ་ལ་ཟས་རྙེད་དཀའ། འོན་ཀྱང་ད་ཆ་འབུལ་བ་མང་པོ་ཐོབ་པས་ཟས་ལ་ཁ་རྙེད་དཀའ་ཞེས་གསུངས།

བྱང་ཆུབ་སེམས་གོང་འཕེལ་གཏོང་སླད་དེ་དག་ལ་བསམ་བློ་བཏང་ན་ཕན་རླབས་ཤིན་ཏུ་ཆེ། རི་རྒྱལ་ལྷུན་པོ་ལྟར་ཆེ་བའི་རང་གཅེས་འཛིན་མ་བཏུལ་བར་བྲག་ཕུག་ནང་སྒོམ་བརྒྱབ་ནས་སྡོད་པ་ནི་བེད་མེད་ཡིན། འོན་ཀྱང་རང་གཅེས་འཛིན་ཤུགས་ཆུང་དུ་ཆུང་དུ་གཏོང་ཐུབ་ན། དབེན་པ་བསྟེན་ནས་བསྡད་ན་ཕན་ཐོགས་ཆེ།