བྷར་ཛིན་བཤད་མཛོད།

འབུམ་རམས་པ་ཨེ་ལེག་ཛན་ཌར་བྷར་ཛིན་གྱི་ནང་བསྟན་བཤད་མཛོད།

དྲ་ཤོག་དེའི་ནང་གི་ཡིག་ཐོག་ཅི་ཡོད་ལ་ཁ་ཕོད་པ། ཁ་ལོ་བ་གཙོ་བོར་མཆོངས། ཁ་ལོ་བ་གཙོ་བོར་རྒྱུགས།

དྲ་ཤོག་ངོ་གདོང་། > ནང་ཆོས་ལ་འཇུག་པ། > དེང་དུས་ཀྱི་འཛམ་གླིང་ནང་ནང་ཆོས། > ཕྱི་ལོ་ ༢༠༡༡ ལོར་རྒྱལ་སྤྱིའི་ནང་པའི་ལྷན་ཚོགས་ལ་བསྩལ་བའི་༸གོང་ས་སྐུ་ཕྲེང་༸བཅུ་བཞི་པ་ཆེན་པོ་མཆོག་གི་མཇུག་སྡོམ་གསུང་བཤད།

ཕྱི་ལོ་ ༢༠༡༡ ལོར་རྒྱལ་སྤྱིའི་ནང་པའི་ལྷན་ཚོགས་ལ་བསྩལ་བའི་༸གོང་ས་སྐུ་ཕྲེང་༸བཅུ་བཞི་པ་ཆེན་པོ་མཆོག་གི་མཇུག་སྡོམ་གསུང་བཤད།

རྒྱ་གར། ལྡི་ལི། ཕྱི་ལོ་ ༢༠༡༡ ཟླ་ ༡༡ ཚེས་ ༣༠ ཉིན།
(ཨེ་ཤི་ཡའི་ནང་པའི་རྒྱལ་ཁབ་ཚང་མའི་མཁན་པོ་དང་བླ་ཆེན་སོགས་འཐུས་མི་རྣམས་ལ་བསྩལ།)
ཌེ་ཡེ་ན་ ཡི་ལིས་ཡི་གེར་བཀོད་ཅིང་། ལུ་འེག་ རོ་བར་ཌེ་དང་ཨེ་ལེག་ཛན་ཌར་ བྷར་ཛིན་གྱིས་རྩོམ་སྒྲིག་ཅུང་ཟད་ཞུས།

གུས་བཀུར་འོས་པའི་ནང་པའི་གཅེན་གཅུང་ཚོ་དང་འདིར་ཕེབས་པའི་སྐུ་མགྲོན་ཚང་མར། ནང་པའི་རབ་བྱུང་ཞིག་ཡིན་པའི་ཆ་ནས་འདི་ནི་དངོས་གནས་སེམས་འགུལ་ཐེབས་པ་དང་དགའ་ཚོར་བྱེད་འོས་པ་ཞིག་འདུག རྒྱུན་ལྡན་ལྟར་སྐད་ཆ་མཐའ་མ་ཤོད་མཁན་དེར་དམིགས་བསལ་བཤད་རྒྱུ་གང་ཡང་མེད། གང་ཡིན་ཟེར་ན། ཚང་མ་སྔོན་ལ་གསུངས་ཚར་བ་རེད།

མི་ཚང་མ་འགྲོ་བ་མི་གཅིག་འགྱུར་ཡིན་པའི་ཆ་ནས་འདྲ་མཉམ་གྱི་གནད་དོན་ཐོག་དོ་ནན་དགོས་པའི་གལ་ཆེའི་རང་བཞིན།

ངོས་ཀྱི་སེམས་འཁུར་རམ་ཚོར་སྣང་ནི་ཨ་ཅང་ཅང་ང་རང་ནང་པའི་གྲྭ་པ་ཞིག་ཡིན། འོན་ཀྱང་བསམ་བློ་ཞིབ་མོར་བཏང་ན་མི་འབོར་ཐེར་འབུམ་བདུན་ཙམ་ཡོད་པའི་གྲས་ནས་ང་རང་འགྲོ་བ་མི་ཞིག་ཡིན་ལ་དེ་དག་གི་ཁོངས་ནས་གཅིག་ཡིན། འགྲོ་བ་མི་ནི་སྤྱི་ཚོགས་ཀྱི་སེམས་ཅན་ཞིག་རེད། དེར་བརྟེན་གང་ཟག་གཅིག་གི་འབྱུང་འགྱུར་གཞན་རྣམས་ལ་བརྟེན་ནས་ཡོད། དེས་ན་རང་ཉིད་སྒེར་གྱི་ཁེ་ཕན་སླད།ངས་མིའི་རིགས་སྤྱི་ལ་ཁ་ཙམ་མིན་པར་བསམ་བློ་གཏོང་དགོས།

གཞི་རྩའི་རིམ་པའི་ཐོག་འགྲོ་བ་མི་ལ་ཆ་བཞག་ན་ངོས་ཀྱི་ཤེས་ཚོད་ལ་མི་འབོར་ཐེར་འབུམ་བདུན་ཙམ་ཡོད། ཚང་མས་བདེ་བ་འདོད་པ་ལས་སྡུག་བསྔལ་མི་འདོད་ཅིང་། ཚང་མར་དེ་དོན་དུ་གཉེར་བའི་ཐོབ་ཐང་ཡོད། ཁྱད་པར་ཅི་ཡང་མེད། ང་ཚོ་ཆོས་དད་ཡོད་མཁན་ནམ་ཆོས་དད་མེད་མཁན། ཡང་ན་དཔལ་འབྱོར་གྱི་ཆ་ནས་དབུལ་ཕྱུག་དང་། ཤེས་ཡོན་ཡོད་མེད། རྒྱལ་པོའི་སྲས་སམ་སྤྲང་པོ་བཅས་སུ་ཡིན་རུང་། གནད་དོན་དེའི་ཐད་འགྲོ་བ་མི་གཅིག་འགྱུར་ཡིན། ང་ཚོ་གཅིག་པ་ཡིན། ང་ཚོ་ཚང་མར་ཐོབ་ཐང་གཅིག་པ་ཡོད།

ངའི་བསམ་པར། ང་ཚོ་འགྲོ་བ་མི་རྣམས་ལ་འཕྲད་བཞིན་པའི་དཀའ་ངལ་མང་པོ་ཞིག་ནི་ང་ཚོས་རིམ་པ་གཉིས་པ་དེའི་ཐོག་ཤུགས་སྣོན་རྒྱག་ཆེ་དྲགས་པའི་རྐྱེན་གྱིས་ཡིན། གལ་སྲིད་ང་ཚོས་གཞི་རྩའི་རིམ་པའི་ཐོག་བསམ་བློ་བཏང་ན། ང་ཚོ་ཚང་མ་འགྲོ་བ་མི་གཅིག་པ་ཡིན། དེས་ན་འཁྲུག་རྩོད་བྱེད་པ་དང་ཕན་ཚུན་མགོ་སྐོར་གཏོང་བ། ཡང་ན་གཅིག་གིས་གཅིག་ལ་མཐོང་ཆུང་ཁྱད་གསོད་བྱེད་པར་གཞི་རྩ་མེད། ང་ཚོ་གཅིག་པ་ཡིན། དེར་བརྟེན་གཅིག་པ་ཡིན་པ་ང་ཚོས་ཡིན་ཅིག་གསལ་པོ་བྱས་ནས་ཤེས་པ་བྱེད་དགོས།

བདེ་སྐྱིད་དང་ལྡན་པའི་མ་འོངས་པའི་འགྲོ་བ་མིའི་གནས་སྟངས་ཤིག་ནི་མི་ཚང་མས་འདོད་ཀྱི་ཡོད་ལ་ཚང་མའི་འགན་འཁྲི་ཡིན། འོན་ཀྱང་ང་ཚོ་ནང་པ་ཚོས། ངའི་བསམ་པར་ཕལ་ཆེར་ནང་པ་ས་ཡ་སྟོང་ཕྲག་གཅིག་ཙམ་ཡོད་ཀྱི་རེད། ཚང་མར་མིའི་རིགས་ལ་ཞབས་ཏོག་སྒྲུབ་རྒྱུའི་ལས་འགན་ཡོད། སངས་རྒྱས་ཤཀྱཱ་ཐུབ་པས་མངོན་པར་རྫོགས་པ་སངས་རྒྱས་པའི་སྐུལ་སློང་ཡང་སེམས་ཅན་གཞན་གྱི་སླད་དུ་ཡིན། ཁོང་གི་སྐུ་ཚེ་ཧྲིལ་པོ་དང་བཀའ་དང་བསྟན་བཅོས་རྣམས་ནང་པ་གཅིག་པུའི་ཆེད་དུ་མ་ཡིན་པར་སེམས་ཅན་ཐམས་ཅད་ཀྱི་ཆེད་དུ་ཡིན།

དུས་རབས་ཉི་ཤུ་པར་ཕྱི་མིག་བལྟ་བ།

དུས་རབས་ཉི་ཤུ་པར་ཕྱི་མིག་ལྟོས་དང་། ངའི་བསམ་པར་དུས་རབས་ཉི་ཤུ་པ་ནི་འགྲོ་བ་མི་ལོ་རྒྱུས་སྤྱིའི་ནང་གལ་ཆེའི་དུས་རབས་ཤིག་ཆགས་ཡོད། ང་ཚོས་བཟང་ཕྱོགས་ནས་དངོས་པོ་མང་པོ་གསར་བཟོ་བྱས་ཡོད་པ་དང་། དུས་མཚུངས་དུས་རབས་ཉི་ཤུ་པ་ནི་དྲག་སྤྱོད་ཀྱི་དུས་རབས་ཤིག་དང་འཁྲུག་རྩོད་དུས་རབས་ཤིག་ཆགས་ཡོད། ལོ་རྒྱུས་སྨྲ་བ་འགའ་ཞིག་ལ་བསྟུན་ན། མི་གྲངས་ས་ཡ་བརྒྱ་ཕྲག་གཉིས་ལྷག་ཙམ་རྐྱེན་ལམ་དུ་བཏང་ཡོད། གལ་ཏེ་དེ་ལྟའི་གཏོར་རྒོལ་ཆེ་བའི་གནོད་སྐྱོན་གྱིས་དོན་དངོས་སུ་གོ་ལ་འདིའི་སྟེང་ཕན་ཐོགས་དང་། ཞི་བདེ། བདེ་སྐྱིད་བཅས་བསྐྲུན་ཡོད་ན། གཏོར་སྐྱོན་དེ་དག་ལ་དག་སྐྱེལ་བྱེད་ཐུབ། འོན་ཀྱང་གནད་དོན་དེ་ལྟར་མ་ཡིན། ཐ་ན་དུས་རབས་ཉི་ཤུ་རྩ་གཅིག་པ་འདིའི་དུས་འགོར་ཡང་བཟོད་མི་བདེ་བའི་དོན་རྐྱེན་དང་བདེ་བ་མེད་པའི་གནད་དོན་འགའ་ལྷག་ཡོད། དེ་དག་ངོས་ཀྱི་བསམ་པར་འདས་པའི་ནོར་འཁྲུལ་དང་ལྷོད་གཡེང་ཤོར་བའི་འཇུག་འབྲས་ཤིག་ཡིན།

དེ་བཞིན་བཟོ་ལས་རིག་རྩལ་བ་གཞིགས་ན། ཡར་ཐོན་ཧ་ཅང་ཆེན་པོ་ཕྱིན་ཡོད། འོན་ཀྱང་བཟོ་རིག་དེ་གིས་སྐབས་རེ་གཏོར་བཤིག་ཚབས་ཆེན་བཟོས་ཡོད། ཚན་རིག་དང་བཟོ་ལས་རིག་རྩལ་དེ་ཉིད་ངོ་མཚར་ཅན་ཞིག་ཡིན། འོན་ཏེ་དེ་དག་བེད་སྤྱོད་ཡག་པོ་ཞིག་གཏོང་བར། ང་ཚོའི་སེམས་ལ་རག་ལས་ཡོད་ཅིང་། འཕྲུལ་རིགས་དེ་དག་བེད་སྤྱོད་བྱེད་པོར་རག་ལས་ཡོད། ཅི་སྟེ་རང་ངོས་ནས་དངུལ་དང་ཚན་རིག བཟོ་ལས་བཅས་ལ་བརྟེན་ནས་འཛམ་གླིང་ཡག་པོ་ཞིག་འདོད་ན་ནོར་འཁྲུལ་ཡིན། གལ་སྲིད་དངོས་གནས་ཡག་པོ་ཞིག་དང་། བདེ་སྐྱིད་ལྡན་པ་ཞིག་འདོད་ན། དོན་དམ་དུ་སེམས་ལ་རག་ལས་ཡོད། བློ་གྲོས་དང་ཤེས་ཡོན་གྱིས་ཀྱང་ཞི་བདེས་ཁེངས་པའི་འཛམ་གླིང་ཞིག་བསྐྲུན་པར་ངེས་བརྟན་མེད། དཀའ་

ངལ་བཟོ་མཁན་ཚང་མའི་རྣམ་དཔྱོད་ལ་བསམས་ན། ཁོང་ཚོ་ནི་ཧ་ཅང་སྤྱང་གྲུང་དོད་པོ་ཡོད། དེར་བརྟེན་བྱེད་ལྟེ་གཙོ་བོ་ནི་ཁོང་ཚོའི་རྒྱུད་ཀྱི་ཁོང་ཁྲོ་དང་། དངངས་སྐྲག ཞེ་སྡང་། རྣམ་རྟོག་བཅས་ཀྱིས་བསླད་པའི་སྐུལ་སློང་གིས་རྐྱེན་པས་དཀའ་ངལ་གྱི་འབྱུང་ཁུངས་སུ་གྱུར་བ་ཡིན།

གང་ཟག་སྒེར་གྱི་ངོས་ནས་ནང་གི་ཞི་བདེ་དགོས་མཁོ་ཆེ་སྐོར།

དང་པོ། དུས་རབས་ཉི་ཤུ་རྩ་གཅིག་པ་འདི་བཞི་བདེས་ཁེངས་པའི་དུས་རབས་ཤིག་ཏུ་བསྒྱུར་བར། ང་ཚོས་ནང་སེམས་ཀྱི་ཞི་བདེར་བསམ་བློ་གཏོང་དགོས། ཞི་བདེ་ནི་གསལ་བསྒྲགས་དང་ཐག་གཅོད་ཡང་ན་སྐད་འབོད་བརྒྱབ་ནས་ཡོང་ཐབས་མེད། ཞི་བདེ་ནི་ནང་སེམས་ཀྱི་ཞི་བདེའི་ཐོག་ནས་ཡོང་དགོས། དེ་ནི་ཐབས་ལམ་གཅིག་པུ་དེ་ཡིན། དེར་བརྟེན་བདེ་སྐྱིད་ལྡན་པའི་འཛམ་གླིང་ཞིག་ཡོང་བར། མདོར་ན་གང་ཟག་མི་རེ་ངོ་རེའི་སྐུལ་སློང་འདི་ལ་བལྟ་དགོས། འཛམ་གླིང་མཉམ་སྦྲེལ་རྒྱལ་ཚོགས་ལྟ་བུའི་སྒྲིགས་འཛུགས་བརྒྱུད་ཞི་བདེ་ནམ་ཡང་བསྐྲུན་མི་ཐུབ། ཞི་བདེ་ནི་གང་ཟག་སོ་སོའི་ནང་སེམས་ཀྱི་ཐོག་ནས་ཡོང་དགོས།

ཆོས་ལུགས་ཀྱི་ཟོག་རྫུ་སྤོང་བ།

གང་ཟག་བྱེ་བྲག་པ་འདུས་པ་ལས་ཚོགས་པ་དང་སྤྱི་ཚོགས་གྲུབ་ཀྱི་ཡོད། འོན་ཀྱང་འགོ་ཁྲིད་ཚོས་སྤྱི་ཚོགས་ནང་ཀུན་སྤྱོད་དང་བཟང་སྤྱོད་ཀྱི་རྩ་དོན་ལ་སེམས་འཁུར་མེད་པར་ཡོང་གི་ཡོད། སྤྱི་ཚོགས་ནང་དངུལ་དང་དབང་ཆའི་ཐོག་རིག་པ་བསྒྲིམས་ཤིང་། དེ་ལྟའི་སྤྱི་ཚོགས་ཀྱི་མི་རྣམས་རང་འགུལ་གྱིས་དངུལ་དང་དབང་ཆར་གཙིགས་ཆེན་པོས་དོ་ནན་བྱེད་ཀྱི་ཡོད། ང་ཚོས་མི་དེ་ཚོར་སྐྱོན་འཛུགས་བྱེད་མི་ཉན། གང་ཡིན་ཟེར་ན་སྤྱི་ཚོགས་ཧྲིལ་པོ་དེ་ལྟར་གྱུར་ཡོད།

ངའི་བསམ་པར་ཆོས་པ་མང་པོ་ཞིག་གིས་དཀོན་ཅོག་དང་སངས་རྒྱས་ལ་ཁ་ཙམ་ཚིག་ཙམ་གྱིས་སྲི་ཞུ་སྒྲུབ་ཅིང་ཉིན་རེའི་འཚོ་བའི་ཁྲོད་དོན་དངོས་ཐོག་ཁོང་ཚོས་དོ་སྣང་བྱེད་ཀྱི་མེད། ང་ཚོ་ནང་པ་སངས་རྒྱས་པ་ཚོས་སངས་རྒྱས་ལ་སྨོན་ལམ་འདེབས་ཀྱི་ཡོད། འོན་ཀྱང་ང་ཚོའི་ཉིན་རེའི་འཚོ་བའི་ནང་ང་ཚོས་སངས་རྒྱས་ལ་དོ་སྣང་མ་བྱས་པར། དངུལ་དང་། དབང་ཆ། སྙན་གྲགས་བཅས་ལ་ཆགས་ནས་སྡོད་ཀྱི་ཡོད། དེ་ཅིའི་ཕྱིར་ཞེ་ན། ངའི་བསམ་པར་ང་ཚོ་ཆོས་པ་ཚོས་ད་དུང་སྐབས་རེ་ཟོག་རྫུ་བྱ་རྒྱུ་སྦྱོང་གི་ཡོད། ང་ཚོས་སེམས་ཅན་ཐམས་ཅད་ཀྱི་ཆེད་དུ་སྨོན་ལམ་འདེབས་ཀྱི་ཡོད། འོན་ཀྱང་དོན་དམ་གྱི་བྱ་སྤྱོད་གང་ཡིན་ནམ། ང་ཚོས་གཞན་གྱི་ཐོབ་ཐང་ལ་སུན་སྣང་བྱེད་ཀྱི་མེད། ང་ཚོས་བཀོལ་སྤྱོད་ཙམ་བྱེད་ཅིང་། ངའི་བསམ་པར་ཆོས་ལུགས་མང་པོས་ཀྱང་དཀོན་ཅོག་ལ་སྨོན་ལམ་འདེབས་པ་དང་། ཡིད་ཆེས་བྱེད་ཀྱི་ཡོད། འོན་ཀྱང་དཀོན་ཅོག་གི་གསུང་གི་ལམ་སྟོན་ལ་ཉན་གྱི་མེད།

ངས་རྒྱུན་དུ་ངོས་ཀྱི་རྒྱ་གར་གྲོགས་པོ་ཚོ་ལ་ལྟོས་བཅས་ཀྱིས་རྒྱ་གར་གྱི་མི་རྣམས་ཆོས་ལུགས་ལ་དད་པ་ཆེ་བ་ཡོད་ཅེས་བཤད་ཀྱི་ཡོད། ཁོང་ཚོས་ལྷ་དབང་ཕྱུག་དང་། ཚོགས་བདག་སོགས་ལ་སྨོན་ལམ་འདེབས་ཤིང་ཚོགས་བདག་ལ་གཙོ་བོ་རྒྱུ་ནོར་ཆེད་གསོལ་འདེབས་བྱེད་ཀྱི་ཡོད། དེར་བརྟེན་ཁོང་ཚོས་ཆོས་དེ་ལྟར་བྱེད་ཅིང་ཁྱིམ་ཚང་ཚང་མའི་ནང་དཀོན་ཅོག་གི་སྣང་བརྙན་འགའ་ཡོད། འོན་ཀྱང་དངོས་ཡོད་ཀྱི་ཉིན་རེའི་འཚོ་ནང་ལྐོག་ཟའི་དོན་རྐྱེན་མང་པོ་ལྷག་གི་ཡོད། དེ་ཇི་ལྟར་ཡིན་ནམ། དཀོན་ཅོག་དང་སངས་རྒྱས་ཡོད་མ་རེད། ལྐོག་ཟ་བྱས་ན་འགྲིགས་ཀྱི་རེད་ཟེར་ན་རྦད་དེ་ནོར་བ་ཡིན། ང་ཚོས་ངེས་པར་དུ་དྲང་པོ་དང་བདེན་པ་བྱེད་དགོས། སྔོན་གྱི་སྐྱེ་བོ་དམ་པ་སུ་གཅིག་གིས་ཀྱང་“ ག་ཚོད་ཐུབ་ཐུབ་ཀྱིས་བཤུ་བཞོག་གཏོང་། ངས་རོགས་པ་བྱེད་དགོས་”ཞེས་གསུངས་མེད། དེ་ལྟར་གསུང་མཁན་དཀོན་ཅོག་གཅིག་ཀྱང་མེད།

གལ་སྲིད་ང་ཚོས་མཐུ་སྟོབས་ཆེ་བའི་སངས་རྒྱས་སམ་ཡེ་ཤུ་མ་ཤི་ཀ་ཡང་ན་མུ་ཧ་མད་སོགས་ཁས་ལེན་བྱས་ན། ངེས་པར་དུ་དྲང་པོ་དང་བདེན་པ་བདེན་ཐུག་བྱེད་དགོས། དེ་ལྟར་བྱས་ན་རང་གིས་རང་ལ་གདེང་སྤོབས་རྙེད་ཅིང་། “ ངས་སྦས་གསང་དགོས་དོན་གཅིག་ཀྱང་མེད། ངས་གང་བསམ་པ་བརྗོད་ཐུབ་ལ་དྲང་པོར་ལན་གང་ཡིན་རུང་འདེབས་ཐུབ།” མ་ཟད་གཞན་གྱི་ཡིད་ཆེས་ཐོབ་ཐུབ། དེས་ན་རང་ཤེད་ཅན་གྱི་ལྟ་ཚུལ་གྱི་ཁྲོད་ནས་དྲང་པོ་དང་བདེན་པ་བྱ་རྒྱུ་ནི་ནང་སེམས་ཀྱི་སྟོབས་ཤུགས་འབྱུང་བའི་སྒོ་ཡིན། མི་འགའ་ཞིག་གིས་ཕྱི་ཚུལ་ནས་བཟང་པོ་དང་ཡ་རབས་ངང་སྐད་ཆ་ཤོད་ཀྱི་ཡོད། འོན་ཀྱང་ཁོང་ཚོའི་སྐུལ་སློང་ལ་བལྟས་ན་མི་འདྲ་བ་ཞིག་ཡིན།དེ་ལྟའི་རིགས་ལ་ཡིད་ཆེས་དང་གུས་བཀུར་ཇི་ལྟར་འཐོབ་ཐུབ། 

ལྷག་བསམ་རྣམ་དག་གིས་ནང་ཆོས་ཉམས་ལེན་ལ་གཞོལ་བ།

ང་རང་ནང་པ་ཡིན་ཅིང་། ངས་ཆོས་གྲོགས་གཅེན་གཅུང་ཚོ་ལ་ཤོད་རྒྱུར། ཨ་ཅང་ཅང་སངས་རྒྱས་པའི་ཆོས་ནི་ལོ་ངོ་ཉི་སྟོང་ལྔ་བརྒྱ་ལྷག་གི་ལོ་རྒྱུས་ལྡན་ནའང་། ད་དུང་དེང་དུས་ཀྱི་འཛམ་གླིང་ནང་ཧ་ཅང་འཚམ་པོ་དང་སྨིན་པོ་ཞིག་ཏུ་བཞུགས་ཡོད། ཚན་རིག་པ་རྩེ་ཕུད་མང་པོས་ད་ཆ་ཉོན་མོངས་ལ་གདོང་ལེན་བྱེད་ཐབས་སྐོར་གྱི་ཐབས་ལམ་དང་གནས་ཚུལ་འཚོལ་སྒྲུབ་བྱེད་འདོད་སྟོན་གྱི་ཡོད། སངས་རྒྱས་ཆོས་ནི་དངོས་གནས་ངོ་མཚར་ཕུལ་དུ་བྱུང་བ་ཞིག་ཡིན། འོན་ཀྱང་མཁས་སྒྲུབ་གཉིས་ལྡན་གྱི་བླ་མ་དང་། སྤྲུལ་སྐུ། དགེ་རྒན་རྣམས་ཀྱི་སྤུས་ཀ་ཉམ་རྒུད་སོང་ཡོད་པ་ངོས་ལ་ཚོར་སྣང་འདུག དེ་ནི་ངོས་ནས་སེམས་འཁྲལ་བྱེད་དགོས་པའི་དོན་གནད་ཤིག་ཡིན། གལ་སྲིད་རང་ལ་ཚུལ་དང་ལྡན་པའི་མི་ཚེའི་འགྲོ་ལུགས་ཤིག་མེད་པར་གཞན་ལ་ཇི་ལྟར་སློབ་ཐུབ། གཞན་ལ་ལམ་མ་ནོར་བ་སྟོན་ཕྱིར། སྔོན་ལ་སོ་སོ་རང་ངོས་ནས་ཡང་དག་པའི་ལམ་དུ་འཇུག་དགོས།

ད་ངའི་བསམ་པར་མཐུན་ཕྱོགས་ཀྱི་གནད་དོན་ཚང་མ་བཤད་ཟིན་ཅིང་། མི་མཐུན་པའི་ཕྱོགས་ཀྱི་སྐོར་ཅུང་ཟད་གླེང་རྒྱུ་ལྷག་ཡོད། ང་ཚོས་ངེས་པར་དུ་དོ་དོ་ནན་ཏན་བྱེད་དགོས། ང་རང་ནང་པའི་གྲྭ་པ་ཞིག་ཡིན། ངས་རྒྱུན་དུ་སོ་སོར་དཔྱད་པ་བྱེད་ཀྱི་ཡོད། ཉིན་ལྟར་ཞོགས་པ་མལ་ལས་ལངས་མ་ཐག་རང་སེམས་བཅོས་ཐབས་སུ་སངས་རྒྱས་རྗེས་སུ་དྲན་པ་དང་སངས་རྒྱས་ཀྱི་གསུང་འགའ་ཁ་འདོན་བྱེད་ཀྱི་ཡོད། དེ་རྗེས་ཉིན་གཅིག་གི་དུས་ཚོད་ལྷག་མའི་རིང་སངས་རྒྱས་ཀྱི་ལམ་སྟོན་གཞིར་བཟུང་དྲང་བདེན་དང་། བདེན་པ་བདེན་ཐུག སྙིེང་རྗེ་ཅན། ཞི་བདེའི་ངང་འཚེ་བའི་མེད་པའི་ལས་སུ་འཇུག་ཐབས་ལ་འབད་བརྩོན་བསྟེན་གྱི་ཡོད། དེར་བརྟེན་ངའི་རེ་བར། ངོས་ཀྱི་ནང་པའི་གཅེན་གཅུང་ཚོས་སངས་རྒྱས་ཀྱི་ཆོས་བཤད་པ་དང་། གོང་མཐོར་གཏོང་བ། ཁྱབ་སྤེལ་གཏོང་བའི་སྐབས། དང་པོ་རང་གི་སེམས་ནང་ཁྱབ་སྤེལ་གཏོང་དགོས་ཞེས་འབོད་སྐུལ་བྱེད་ཀྱི་ཡོད། དེ་ནི་ཧ་ཅང་གལ་འགངས་ཆེན་པོ་ཡིན།

འཛམ་གླིང་ནང་གི་ཆོས་ལུགས་ཆེ་ཁག་ཚང་མར་ནང་གི་ཞི་བདེ་བསྐྲུན་པའི་ནུས་པ་གཅིག་འགྱུར་ཡོད་པ་ཨ་ཅང་བརྗོད་མེད་ཡིན། དེའི་ཐོག་ནས་འཛམ་གླིང་འདི་ལེགས་བཅོས་གཏོང་ཐུབ། ཆབས་ཅིག་ནང་ཆོས་དང་། གཅེར་བུ་པའི་ཆོས།གྲངས་ཅན་པའི་ཡ་གྱལ་ཞིག་བཅས་ལ་ཐུན་མོང་མ་ཡིན་པའི་ཁྱད་ཆོས་གཅིག་ནི་གང་ཟག་སྒེར་གྱི་གལ་གནད་ལ་དོ་ནན་བྱེད་པ་དེ་ཡིན། མཐའ་མའི་ལྟ་ཚུལ་ལམ་རྣམ་གཞག་ནི་རང་གིས་བསྐྲུན་པ་དེ་ཡིན་པ་དང་། ང་ཚོས་ལས་རྒྱུ་འབྲས་ཀྱི་རྣམ་གཞག་འདོད་ཅིང་། དགེ་བའི་ལས་བྱས་པས་འབྲས་བུ་བདེ་བ་དང་། མི་དགེ་བའི་ལས་བྱས་པ་ལས། འབྲས་བུ་མི་བདེ་ཡོང་གི་ཡོད། དེའི་ཕྱིར་ལས་རྒྱུ་འབྲས་ཀྱི་རྣམ་གཞག་ལ་བརྟེན་ནས། ཅི་སྟེ་རང་གིས་མི་དགེ་བའི་ལས་བསགས་ན། སངས་རྒྱས་ཀྱིས་སྐྱོབ་མི་ཐུབ། སངས་རྒྱས་ཀྱིས། “ ངས་ནི་ཁྱོད་ལ་ཐར་པའི་ལམ་སྟོན་པས། ཐར་པ་སྒྲུབ་དང་མ་སྒྲུབ་རང་ལ་རག་ལས་ཡོད། ངས་བྱིན་རླབས་བསྩལ་ནས་འཁྲིད་མི་ཐུབ་”ཅེས་གསུངས་ཡོད།

དེས་ན་རང་ཉིད་རང་གི་མགོན་ཡིན། ངའི་བསམ་པར་དེ་ལྟའི་ཆོས་ནི་ཧ་ཅང་ཕན་རླབས་ཆེ། ཐམས་ཅད་རང་གི་ལས་ཀ་རག་ལས་ཡོད། དགེ་བ་དང་མི་དགེ་བའི་ལས་གང་ཡིན་རུང་ཚང་མ་སྐུལ་སློང་ལ་ཐུག་ཡོད། སངས་རྒྱས་ཀྱི་ཆོས་ཀྱིས་ནང་སེམས་ཀྱི་ཞི་བདེར་ལེགས་སྐྱེས་ཆེན་པོ་འབུལ་ཐུབ།

ནང་པའི་ཆོས་རྒྱུད་འདྲ་མིན་དབར་མཛའ་མཐུན།

ངས་ཁ་སང་བརྗོད་པ་བཞིན། འབར་མ་དང་ལོའོ་དེ་མིན་རྒྱལ་ཁབ་གཞན་གྱི་དབུ་ཁྲིད་རྣམས་དང་ང་ཚོ་མཇལ་འཕྲད་བྱུང་བའི་སྐབས། སྔོན་མ་ཐེག་དམན་དང་ཐེག་ཆེན། གསང་སྔགས་རྡོ་རྗེ་ཐེག་པ་བཅས་ཀྱི་ཐ་སྙད་དེ་དག་གིས་རྐྱེན་པས་མི་རྣམས་ཀྱི་སེམས་ནང་ཐེག་པ་གསུམ་པོ་རྣམས་རྦད་དེ་ཐ་དད་དང་རང་རང་སོ་སོ་ཡིན་པའི་མཐོང་ཚུལ་བྱིན་ཡོད། དེ་ནི་མཐའ་གཅིག་ཏུ་ནོར་འཁྲུལ་ཡིན། དེ་རིང་ཞོགས་པ་ངས་མདོར་བསྡུས་ཤིག་ཞུས་པ་ལྟར། གནས་བརྟན་སྨྲ་བ་(ཐེ་ར་ཝ་རྡ)འམ་པཱ་ལིའི་སྲོལ་རྒྱུན་ནི་སངས་རྒྱས་པའི་ཆོས་དང་

འདུལ་བའི་ཉམས་ལེན་གྱི་གཞི་རྟེན་ཡིན།

སངས་རྒྱས་ཉིད་དང་གང་གི་རྣམ་ཐར་ལ་གཟིགས་དང་། ཁོང་གིས་རང་གི་དབུ་སྐྲ་རང་གིས་བྲེགས་ནས་རབ་ཏུ་བྱུང་། དེ་ནི་ཚུལ་ཁྲིམས་ཀྱི་ཉམས་ལེན་ཡིན། དེ་ནས་ལོ་དྲུག་དཀའ་དཔྱད། དེ་ནི་ཏིང་ངེ་འཛིན་གྱི་ཉམས་ལེན་དང་། ལྷག་མཐོང་གི་ཀྱི་ཉམས་ལེན་མཛད། དེ་ལྟའི་ལམ་ནས་མཐར་མངོན་པར་རྫོགས་པའི་སངས་རྒྱས། དེར་བརྟེན་བསླབ་པ་གསུམ་ནི་ཚུལ་ཁྲིམས་དང་། ཏིང་ངེ་འཛིན། ཤེས་རབ་བཅས་ཀྱི་བསླབ་པ་རྣམས་ཡིན། ང་ཚོ་རྗེས་འཇུག་གདུལ་བྱ་རྣམས་ཀྱིས་ཀྱང་གང་གི་མཛད་པའི་རྗེས་སུ་འཇུག་དགོས། སྒྲིག་རང་སྲུང་དང་འདུལ་བའི་ཉམས་ལེན་མེད་པར། ཞི་གནས་དང་ལྷག་མཐོང་ཇི་ལྟར་གོང་འཕེལ་གཏོང་ཐུབ། ཁག་པོ་རེད། དེར་བརྟེན་པཱ་ལི་གཞུང་ནི་སངས་རྒྱས་ཀྱི་ཆོས་ཀྱི་གཞི་མ་ཡིན།

དེའི་སྟེང་ངའི་བསམ་པར་ལེགས་སྦྱར་གྱི་གཞུང་ནས་གསུངས་པའི་ཕར་ཕྱིན་གྱི་གཞུང་ཉམས་ལེན་བྱེད་དགོས། དེས་བདེན་པ་བཞིའི་གསུམ་པ་སྡུག་བསྔལ་སྤངས་པའི་བྲལ་བ་འགོག་བདེན་འཐོབ་པར་ཤུགས་རྒྱག་གི་ཡོད། དེར་འགྲེལ་བ་འཕར་མ་དགོས་རྒྱུ་གལ་ཆེ། འགོག་བདེན་ཞེས་པ་ག་རེ་རེད། ང་ཚོའི་རྒྱུད་ཀྱི་མ་རིག་པ་མེད་པ་བཟོ་ཐུབ་སྲིད་སྐོར་སངས་རྒྱས་ཀྱིས་གསུངས་ཡོད། ནམ་ཞིག་ང་ཚོས་རང་རྒྱུད་ཀྱི་མ་རིག་པ་ཡོངས་སུ་བཅོམ་ཐུབ་ན། དེ་ལ་འགོག་བདེན་ཟེར། དེ་ནི་འགྲེལ་པ་འཕར་མ་དེ་ཡིན། འགོག་བདེན་རྟོགས་པའི་ལམ་མམ་ཐབས་རྣམས་ཀྱང་འགྲེལ་པ་འཕར་མ་ཡིན།

དེས་ན་ཁང་བརྩེགས་དང་པོ་དང་འདྲ་བར། པཱ་ལིའི་གཞུང་ལ་གཞི་བཅོལ་ནས། ལེགས་སྦྱར་གྱི་སྐད་བྱུང་། གཞན་ཡང་དང་པོ་འོག་ཁང་དང་འདྲ་བའི་པཱ་ལིའི་གཞུང་ནང་གི་དགེ་སྦྱོང་གི་ཉམས་ལེན་དང་། སྒྲིག་རང་སྲུང་། ཚུལ་ཁྲིམས་བཅས་གྲུབ། དེ་ནས་ཁང་བརྩེགས་དང་པོ་དང་འདྲ་བའི་མདོ་སྡེའི་སྡེ་སྣོད་དང་མངོན་པའི་སྡེ་སྣོད། ཤེས་རབ་དང་ཕར་ཕྱིན་དྲུག་གམ་བཅུ་སོགས་ཡོང་གི་ཡོད། མ་ཟད་དེ་དག་གི་ཐོག་གསང་སྔགས་རྡོ་རྗེ་ཐེག་པ་སྟེ་ཞི་གནས་དང་ལྷག་མཐོང་། བྱང་ཆུབ་ཀྱི་སེམས་བཅས་ཀྱི་ཉམས་ལེན་གྱི་སྒོ་ནས་ཡི་དམ་རྣམས་སྒོམ་པ། དེ་དག་ནི་འོག་ཁང་དང་། ཁང་བརྩེགས་དང་པོ། ཁང་བརྩེགས་གཉིས་པ་སོགས་དང་འདྲ། འོག་ཁང་མེད་པར་གཞན་རྣམས་སྐྲུན་མི་ཐུབ། དེར་བརྟེན་ནང་པའི་སྤུན་ཟླ་ཚོས་དེ་དག་མཁྱེན་དགོས་པ་ཡིན།

ང་ལ་དབང་ཆ་གང་ཡང་མེད། ངས་རང་ཉིད་སློབ་མ་ཞིག་ཏུ་བརྩི་གི་ཡོད། དུས་ཚོད་ག་དུས་ཐོབ་ཀྱང་རྒྱུན་དུ་སློབ་སྦྱོང་བྱེད་ཀྱི་ཡོད། བོད་རྒྱུད་ནང་བསྟན་ལ་བསམས་ན། རྒྱ་གར་གྱི་སྐད་དང་པཱ་ལི། ལེགས་སྦྱར་སོགས་ཀྱི་སྐད་ཡིག་ནས་བོད་སྐད་དུ་ཆོས་ཀྱི་པོད་གསུམ་བརྒྱ་ལྷག་ཙམ་བསྒྱུར་ཡོད་པ་དང་འགའ་ཞིག་བལ་པོའི་སྐད་ནས་བསྒྱུར་ཡོད།དེར་བརྟེན་ངོས་ལ་དུས་ཚོད་ནམ་ཐོབ་ཀྱང་གཞུང་དེ་དག་ལ་ལྟ་ཀློག་བྱེད་པ་དང་བསམ་བློ་གཏོང་གི་ཡོད། གཞུང་པོད་གསུམ་བརྒྱ་དེ་དག་ལ་ལྟ་ཀློག་བྱེད་མྱོང་མེད་པའི་མི་རྣམས་དང་བསྡུར་ན་ངའི་ཤེས་རྒྱ་ཅུང་ཟད་མཐོ་བ་ཡོད། དཔེ་ཆ་དེ་དག་སློབ་སྦྱོང་བྱས་པ་དང་། བསླབ་པ་གསུམ་གྱི་ཉམས་ལེན་ནི་ཧ་ཅང་གལ་གནད་ཆེན་པོ་ཡིན་པར་ངེས་ཤེས་རྙེད་ཀྱི་འདུག

ཚུལ་དང་མཐུན་པའི་རབ་བྱུང་བྱེད་པ།

ཐོག་མར་ང་ཚོ་ནང་པ་ཚོས་ཐེག་དམན་དང་ཐེག་ཆེན། གསང་སྔགས་རྡོ་རྗེ་ཐེག་པའི་རྗེས་འཇུག་པ་གང་ཡིན་ཀྱང་ང་ཚོས་སངས་རྒྱས་ཀྱི་རྗེས་འཇུག་ཡང་དག་པ་ཞིག་བྱེད་དགོས། དེ་ཧ་ཅང་གནད་འགག་ཆེན་པོ་ཡིན། གསལ་པོ་བྱུང་སོང་ངམ། སངས་རྒྱས་ཀྱི་རྗེས་འཇུག་ཆགས་པར། རབ་བྱུང་དང་དགེ་སློང་གི་ཆས་གོས་གྱོན་པ་ཙམ་གྱི་འགྲིགས་ཀྱི་མེད་ལ་དེ་དག་ལ་ང་ཚོས་ནང་པ་ཞེས་བརྗོད་མི་ཐུབ་ཅིང་། རབ་བྱུང་དང་དགེ་སློང་རྣམ་དག་རེད་ཅེས་འབོད་མི་ཐུབ། ཆས་གོས་བརྗེ་བ་ནི་སྟབས་བདེ་པོ་རེད། སངས་རྒྱས་ཀྱི་རྗེས་འཇུག་རྣལ་མ་ཞིག་ཆགས་པར་ང་ཚོས་སོ་སོའི་སེམས་ནང་འགྱུར་བ་གཏོང་དགོས། དེ་བཞིན་ནང་པའི་རབ་བྱུང་ཚད་ལྡན་ཞིག་ཡོང་བར་ང་ཚོས་སྒྲིག་རང་སྲུང་བྱེད་དགོས། “སྐབས་རེ་ལས་ཀ་

ག་པ་ཚང་མ་སངས་རྒྱས་ལ་བསྐུལ་ནས། རང་ཉིད་རྒྱས་སྤྲོས་བྱས་སྡོད་ཀྱི་ཡོད།” དེ་འདྲ་ཇི་ལྟར་བྱེད་ཕོད་དམ། གལ་སྲིད་ནང་པ་ཞིག་ཡིན་ན། སངས་རྒྱས་ཀྱིས་བསྟན་པའི་ལམ་ལ་འཇུག་ནས་ལོ་དྲུག་དཀའ་བ་དཔྱད་དགོས། ང་ཚོས་ཁོང་གི་དཔེའི་རྗེས་སུ་འབྲང་དགོས།

ད་ངས་ཁ་སང་བརྗོད་པ་བཞིན། གྲོགས་པོ་ཞིག་གིས་པཱ་ལི་གཞུང་དང་ལེགས་སྦྱར་གྱི་གཞུང་དབར་སྟོང་ཆའམ་སྒྲིབ་བྱེད་ཅིག་ཡོད་པར་བརྗོད་ཀྱི་འདུག སྟོང་ཆ་དེས་ནི་སུ་གཅིག་ལའང་ཁེ་ཕན་མེད། ང་ཚོས་མཉམ་རུབ་དང་སྤེལ་རེས་བྱེད་དགོས།ཁོ་རང་གི་སྲོལ་རྒྱུན་ཁྲོད་ནས་ང་ཚོས་དེ་ལུགས་ཀྱི་སོ་སོར་ཐར་པའི་སྐོར་སློབ་སྦྱོང་བྱ་རྒྱུ་མང་པོ་ཡོད་ཅིང་། དེ་ག་ནང་བཞིན་ལེགས་སྦྱར་གྱི་སོ་སོར་ཐར་པའི་སྐོར་ལའང་སྦྱོང་རྒྱུ་མང་པོ་ཡོད། དེར་བརྟེན་དུས་སྟོན་ཙམ་མིན་པར་རྒྱུན་དུ་ཐུག་འཕྲད་བྱས་ནས། ཕན་ཚུལ་བགྲོ་གླེང་བྱས་ན་ཕན་ཐོགས་ཧ་ཅང་ཆེན་པོ་ཡོད། དེ་གནད་དོན་གཅིག་རེད།

དགེ་སློང་མའི་སྡོམ་པ་བསྐྱར་གསོ་བྱ་རྒྱུའི་གནད་དོན།

ཁྱེང་རང་ཚོས་མཁྱེན་གསལ་ལྟར། དགེ་སློང་མར་གཞིགས་ན། ཐོག་མ་ནས་གཞི་ཐམས་ཅད་ཡོད་པར་སྨྲ་བའི་སྡེ་པའི་ནང་དགེ་སློང་མའི་སྡོམ་རྒྱུན་[བོད་དང་སོག་པོས་ཉམས་ལེན་བྱེད་པའི་]བསྐྱར་གསོ་བྱེད་པར་ངས་རྒྱབ་སྐྱོར་བྱས་ཡོད། འོན་ཀྱང་ང་ཚོས་འདུལ་བའི་གཞུང་ལ་བརྩི་འཇོག་བྱེད་དགོས། གལ་སྲིད་བཀས་བཀོད་རྒྱུན་འཛིན་པ་ཞིག་ལྟར་ང་ལ་དབང་ཆ་དམིགས་བསལ་ཡོད་ན། “ཨོའོ་ཁྱེད་རང་ཚོས་དེ་བྱེད་”ཅ ེས་བརྗོད་ཐུབ། དེ་ང་ཚོས་བྱེད་མི་ཐུབ། ང་ཚོས་ངེས་པར་དུ་འདུལ་བའི་གཞུང་སྟེ། གཞི་ཐམས་ཅད་ཡོད་པར་སྨྲ་བའི་གཞུང་དང་། ད་དུང་འཆོས་སྲུང་སྡེ་པའི་གཞུང་།[ཤར་ཨེ་ཤི་ཡའི་ནང་ཉམས་ལེན་བྱེད་པ་] གནས་བརྟན་སྨྲ་བའི་གཞུང་[ལྷོ་ཤར་ཨེ་ཤི་ཡའི་ནང་ཡོད་པ་]བཅས་ཀྱི་རྗེས་སུ་འབྲང་དགོས།

མཁྱེན་སོང་ངམ། དེ་ནི་ང་ཚོས་གོ་བསྡུར་བྱེད་དགོས་པའི་གལ་ཆེའི་བརྗོད་གཞི་ཞིག་ཡིན། ཐག་གཅོད་ནི་ངའི་ཚོད་འཛིན་གྱི་ཡུལ་ལས་འདས། བོད་པའི་སྤྱི་ཚོགས་ཁྲོད་ཀྱི་བཙུན་མའི་དགོན་སྡེ་ཁག་ནང་ངས་གང་བྱེད་ཐུབ་པ་ནི། དགོན་སྡེ་ཆེ་གྲས་ནང་སློབ་གཉེར་བྱེད་པའི་ཚད་གཞི་ལྟར་གཅིག་མཚུངས་བཙུན་དགོན་དེ་དག་བྱེད་ཐུབ་རྒྱུར་ངོ་སྤྲོད་བྱེད་ཐུབ། ད་ལྟའི་ཆར་ང་ཚོར་ནང་པའི་ཆོས་ཀྱི་ཐོག་མཁས་པའི་དགེ་བཤེས་མ་འགའ་ཞིག་ཐོན་བཞིན་ཡོད།

དུས་ནས་དུས་སུ་ང་ཚོས་དགེ་སློང་མའི་སྡོམ་རྒྱུན་སྐྱར་གསོའི་ཐོག་བགྲོ་གླེང་བྱས་ཡོད་པ་དང་། ད་ལྟའང་འབད་བརྩོན་སྟེན་གྱི་ཡོད། ལའོ་ནང་པའི་གཙོ་འཛིན་དང་དེ་བཞིན་འབར་མའི་ནང་པའི་གཙོ་འཛིན་ལ་ཕུལ་བའི་སྙན་སྐུལ་ཡི་གེ་གསར་ཤོས་བསྟན་ཡོད། ང་ཚོས་མུ་མཐུད་གོ་བསྡུར་ནན་པོ་བྱེད་ཀྱི་ཡིན། མཐར་ངའི་བསམ་པར་ང་ཚོར་གཅིག་འགྱུར་གྱི་གྲོས་མཐུན་ཞིག་ཡོང་ངེས་རེད།

དེ་ཙམ་ཡིན་ཐུགས་རྗེ་ཆེ།