དགེ་བའི་བཤེས་གཉེན་ཞིག་དང་མཉམ་དུ་སློབ་སྦྱོང་བྱེད་པ།

ཆོས་ཕྱོགས་དང་འབྲེལ་བའི་དགེ་རྒན་དང་དགེ་ཕྲུག་གི་གནས་ཚད་ལ་རིམ་པ་མང་པོ་ཡོད་པ་རེད། ནུས་པ་དང་ལྡན་པའི་དགེ་ཕྲུག་ཚོས་སོ་སོ་དང་སོ་སོའི་དགེ་རྒན་དེ་དངོས་ཡོད་གནས་ཚུལ་ལ་དེ་འདྲ་མིན་ནའང་། ད་དུང་ཚད་ལྡན་དང་མཚན་ཉིད་ཚང་བ་ཡིན་བསམ་པའམ། ཡང་མིན་ན་སོ་སོའི་དགེ་རྒན་དེ་གསོ་དཔྱད་པ་ཞིག་ཡིན་པར་ཆ་འཇོག་བྱེད་པའི་སྐབས་སུ་རང་ཉིད་ལ་མགོ་རྙོག་ཆེན་པོ་འབྱུང་གི་ཡོད། དྲང་པོའི་ཐོག་ཁ་ནང་བལྟས་ཀྱི་དཔྱད་པ་དང་དོན་དངོས་དང་མཐུན་པའི་དཔྱད་པ་བརྒྱུད་ང་ཚོ་རེ་རེ་བཞིན་སོ་སོ་རིམ་པ་གང་གི་ནང་ཡོད་པ་གསལ་པོ་བཟོ་བ་དང་། དེ་ནས་ང་ཚོས་དགེ་རྒན་དང་དགེ་ཕྲུག་དབར་གྱི་འབྲེལ་བ་བཟང་པོ་ཞིག་གོང་འཕེལ་གཏོང་ཐུབ་པ་ཡིན།

དགེ་རྒན་དང་དགེ་ཕྲུག་དབར་གྱི་འབྲེལ་ལམ་ཐད་དངོས་མྱོང་གི་བདེན་དོན།

དགེ་རྒན་དང་དགེ་ཕྲུག་དབར་གྱི་འབྲེལ་ལམ་ཐད་མགོ་རྙོག་སེལ་བར། ང་ཚོས་དངོས་མྱོང་གི་བདེན་དོན་ཁ་ཤས་ངོས་ལེན་བྱེད་དགོས་པ་ནི།

༡༽ ཧ་ལམ་ཆོས་དོན་དུ་གཉེར་མཁན་ཚང་མ་ལམ་གྱི་རིམ་པ་བརྒྱུད་ནས་ཡར་རྒྱས་འགྲོ་གི་ཡོད།

༢༽ ཆོས་ཉམས་ལེན་པ་མང་ཆེ་བས་སོ་སོའི་མི་ཚེའི་ནང་དགེ་རྒན་ཁ་ཤས་ཀྱི་དྲུང་ནས་སློབ་སྦྱོང་བྱེད་པ་དང་། དེ་དག་རེ་རེ་ལ་འབྲེལ་ལམ་མི་འདྲ་བ་རེར་བཟོ་གི་ཡོད།

༣༽ ཆོས་ཕྱོགས་ཀྱི་དགེ་རྒན་ཚང་མར་གྲུབ་འབྲས་གནས་རིམ་གཅིག་པ་ཐོབ་མེད།

༤༽ ཆོས་དོན་གཉེར་ཅན་བྱེ་བྲག་པ་ཞིག་དང་དགེ་རྒན་བྱེ་བྲག་པ་ཞིག་དབར་གྱི་འོས་ཤིང་འཚམས་པའི་འབྲེལ་བ་ཡོང་བ་ནི་གཉིས་ཀའི་ཆོས་ཤེས་ཚད་ཀྱི་རིམ་པ་ལ་རག་ལས་ཡོད།

༥༽ མི་རྣམས་ཀྱིས་སྤྱིར་བཏང་ནས་ལམ་སྒོམ་པ་དང་མཉམ་དུ་སོ་སོའི་ཆུ་ཚད་མཐོ་རུ་ཕྱིན་པ་ན་དགེ་རྒན་ལ་གཏིང་ཟབ་པོའི་འབྲེལ་ལམ་ཡོང་གི་ཡོད།

༦༽ ཆོས་དོན་གཉེར་ཅན་གྱི་མི་རེ་རེའི་མི་ཚེའི་ནང་དགེ་བའི་བཤེས་གཉེན་གཅིག་པ་ཡིན་ནའང་། དེའི་མཛད་པ་མི་འདྲ་བ་སྐྱོང་ཞིང་། དོན་གཉེར་ཅན་སོ་སོར་དགེ་རྒན་དེ་དང་མཉམ་དུ་འབྲེལ་ལམ་འཚམས་ཤོས་དེའང་མི་འདྲ་བ་ཡོང་སྲིད།

དགེ་བའི་བཤེས་གཉེན་དང་ཆོས་དོན་གཉེར་ཅན་གྱི་གནས་ཚད།

དེ་འདྲ་སོང་ཙང་། དགེ་བའི་བཤེས་གཉེན་དང་ཆོས་དོན་གཉེར་ཅན་གྱི་ཆོས་ཀྱི་གནས་ཚད་རིམ་པ་མང་པོ་ཡོད། དེ་དག་ནི།

  • ནང་པའི་སློབ་དཔོན་ཆེན་མོ་རྣམས་ནི། གཙུག་ལག་སློབ་གཉེར་ཁང་ལྟ་བུར་གནས་ཚུལ་སྤྲོད་མཁན་ཡིན།
  • ནང་ཆོས་སློབ་ཁྲིད་པ་རྣམས་ནི། མི་ཚེའི་ནང་ནང་ཆོས་ལག་བསྟར་བྱ་ཚུལ་སྟོན་མཁན་ཡིན།
  • སྒོམ་སྦྱོང་བརྡར་སྤྲོད་མཁན་རྣམས་ནི། ཐེ་ཅིའམ་ (tai-chi) ཡོ་གའི་ (yoga) སློབ་ཁྲིད་དང་འདྲ་བར་སྒོམ་གྱི་ཐབས་ལམ་ཁག་སློབ་ཁྲིད་བྱེད་མཁན་ཡིན།
  • ཆོས་ཕྱོགས་ཀྱི་སློབ་སྟོན་པ་ནི། སློབ་མ་ཚོར་སྡོམ་པ་སྟེ། ཁྱིམ་པའི་སྡོམ་པ་དང་། རབ་བྱུང་གི་སྡོམ་པ། བྱང་ཆུབ་སེམས་དཔའི་སྡོམ་པ། སྔགས་ཀྱི་སྡོམ་པ་བཅས་སྡོམ་པའི་རིམ་པ་རྣམས་སློབ་མ་ཚོར་གནང་བའི་ཐོག་ནས་ཁྱད་པར་འབྱེད་ཀྱི་ཡོད།

དེ་དང་ཕྱོགས་མཚུངས་སློབ་མ་ལའང་།

  • ནང་ཆོས་སློབ་གཉེར་བ་ནི། གནས་ཚུལ་འཐོབ་འདོད་བྱེད་མཁན།
  • ཆོས་ཀྱི་སློབ་ཕྲུག་ནི། མི་ཚེའི་ནང་ནང་ཆོས་ལག་བསྟར་བྱ་ཚུལ་ཤེས་འདོད་ཡོད་མཁན།
  • སྒོམ་སྦྱོང་མཁན་ནི། སེམས་ལྷོད་པོ་བཟོ་བ་དང་སེམས་ལ་སྦྱོང་བརྡར་གཏོང་བའི་ཐབས་ལམ་སྦྱོང་འདོད་ཡོད་མཁན།
  • སློབ་མ་ནི། སྐྱེ་བ་ཕྱི་མ་ཡར་རྒྱས་དང་། ཐར་པའམ་ཐམས་ཅད་མཁྱེན་པ་འཐོབ་འདོད་པའི་སློབ་མ་རྣམས་ཀྱིས་དམིགས་ཡུལ་དེ་དག་འཐོབ་པའི་ཆེད་སྡོམ་པའི་རིམ་པ་ཁ་ཤས་བླང་རྒྱུར་གྲ་སྒྲིག་ཡོད་མཁན་རྣམས་ཡིན། སློབ་མ་ཚོས་ཚེ་འདི་གཅིག་པུར་ཡར་རྒྱས་གཏོང་འདོད་པ་ཡིན་ནའང་། ཐར་པ་དང་ཐམས་ཅད་མཁྱེན་པའི་གོ་འཕང་བགྲོད་པའི་ལམ་གྱི་ཐེམ་སྐས་ལྟ་བུ་མཐོང་གི་ཡོད།

རིམ་པ་རེ་རེར་སོ་སོའི་ཁྱད་ཆོས་རེ་ཡོད་ཅིང་། ཆོས་དོན་གཉེར་ཅན་ཞིག་ཡིན་པའི་ཆ་ནས། ང་ཚོས་སོ་སོ་རང་དང་དགེ་རྒན་གྱི་རྒྱབ་ལྗོངས་གནས་ཚུལ་ལ་བསམ་ཞིབ་བྱེད་དགོས། དེ་ཡང་ཨེ་ཤི་ཡའམ་ནུབ་ཕྱོགས་པ། གྲྭ་པ། བཙུན་མ། མི་སྐྱ། ཤེས་ཡོན་གྱི་གནས་ཚད། སེམས་ཚོར་དང་བཟང་སྤྱོད་ཀྱི་སྨིན་ཚད། ཆོད་སེམས་ཀྱི་རིམ་པ་སོགས་ལ་བརྟག་དཔྱད་བྱེད་དགོས། དེར་བརྟེན་ག་ལེར་དང་གཟབ་གཟབ་ཀྱིས་མདུན་སྐྱོད་བྱེད་རྒྱུ་གལ་ཆེན་པོ་ཡིན།

ནུས་པ་དང་ལྡན་པའི་དགེ་ཕྲུག་དང་དགེ་རྒན་ཞིག་གི་ཁྱད་ཆོས།

ནུས་ལྡན་གྱི་དགེ་ཕྲུག་ཅིག་ཡིན་པའི་ཆ་ནས། ང་ཚོས་སོ་སོའི་ཡར་རྒྱས་ཀྱི་རིམ་པར་བརྟག་དཔྱད་བྱེད་དགོས། དེར་བརྟེན་གྲ་སྒྲིག་གང་ཡང་མེད་པར་འབྲེལ་ལམ་ཞིག་བཟོ་བར་ཆོད་སེམས་མི་སྐྱེ་བ་ཡིན། དགེ་ཕྲུག་ལ་དགོས་པའི་ཁྱད་ཆོས་གཙོ་བོ་ཁག་ནི།

༡༽ སོ་སོའི་ཚོད་དཔག་དང་བསམ་ཚུལ་ལ་ཞེན་ཆགས་མེད་པའི་གུ་ཡངས་ཀྱི་བློ།

༢༽ ཡང་དག་པ་དང་མ་དག་པའམ་ལེགས་ཉེས་གང་ཡིན་འབྱེད་པའི་སྤྱིར་བཏང་གི་བསམ་ཤེས།

༣༽ ནང་ཆོས་དང་ཚད་ལྡན་གྱི་དགེ་རྒན་འཚོལ་བར་སྤྲོ་བ་ཤུགས་ཆེན་ཡོད་པ།

༤༽ ནང་ཆོས་དང་མཚན་ཉིད་ཚང་བའི་དགེ་རྒན་ལ་ཡི་རང་དང་གུས་ཞབས།

༥༽ སེམས་གྲུང་པོ་དང་དོ་སྣང་ཆེན་པོ་དགོས་པ།

༦༽ སེམས་ཚོར་ཚད་ལོངས་བ་དང་བརྟན་པའི་རང་བཞིན།

༧༽ གཞི་རྩའི་བཟང་སྤྱོད་ཀྱི་འགན་འཁྲིའི་ཚོར་བ་བཅས་ཡིན།

དགེ་རྒན་གྱི་གནས་ཚད་རིམ་པ་ལ་བརྟེན་ནས། སོ་སོར་ཁྱད་ཆོས་མང་པོ་དགོས། དེ་དག་ལས་སྤྱིར་བཏང་ཁྱད་ཆོས་གཙོ་བོ་རྣམས་ནི།

༡༽ སོ་སོའི་ཆོས་ཕྱོགས་ཀྱི་དགེ་རྒན་དང་མཉམ་དུ་འབྲེལ་ལམ་གཙང་མ།

༢༽ སློབ་ཕྲུག་ལས་ནང་ཆོས་ཀྱི་ཤེས་རྒྱ་ཡངས་བ།

༣༽ སྒོམ་དང་ཉིན་རེའི་མི་ཚེའི་ནང་ཐབས་ལམ་ཁག་ལག་བསྟར་བྱེད་པར་ཉམས་མྱོང་དང་གྲུབ་འབྲས་དགོས་པ།

༤༽ མི་ཚེའི་ནང་ནང་ཆོས་ལག་བསྟར་བྱས་པ་ལ་བརྟེན་ནས་ཕན་ཡོན་ཆེ་བའི་གྲུབ་འབྲས་ཀྱི་མིག་དཔེ་སེམས་འགུལ་ཐེབས་པ་ཞིག་བཞག་ཐུབ་པ་སྟེ། དེའི་དོན་ནི།

༥༽ བཟང་སྤྱོད་ལྡན་པའི་ཁྲིམས་རང་སྲུང་དགོས་པ།

༦༽ སེམས་ཚོར་གྱི་དཀའ་ངལ་རགས་པ་ལས་ཐར་བའི་རང་དབང་ལ་གཞིར་བཞག་པའི་སེམས་ཚོར་གྱི་ཚད་ལོངས་པ་དང་བརྟན་ཆ་ལྡན་པ།

༧༽ སློབ་ཁྲིད་ཀྱི་རྩ་བའི་ཀུན་སློང་དུ་སློབ་མའི་ཁེ་ཕན་ཆེད་བཅོས་མིན་གྱི་སེམས་འཁུར་དགོས་པ།

༨༽ སློབ་ཁྲིད་བྱེད་སྐབས་བཟོད་པ་དགོས་པ།

༩༽ ཟོག་རྫུ་ (རང་ལ་མེད་པའི་ཁྱད་ཆོས་ཡོད་མདོག་མི་བྱེད་པ།) མེད་པ་དང་ཚུལ་འཆོས་ (སོ་སོའི་སྐྱོན་མ་སྦས་པ། དཔེར་ན། སློབ་སྦྱོང་དང་ཉམས་མྱོང་མེད་པ་ལྟ་བུ།) མེད་པ།

སོ་སོའི་ཁོར་ཡུག་ནང་དགེ་རྒན་ཚོར་ཁྱད་ཆོས་ཀྱི་རིམ་པ་གང་འདྲ་ཞིག་ལྡན་པ། ང་ཚོར་དུས་ཚོད་དང་ཆོད་སེམས་ག་ཚོད་ཡོད་མེད། ང་ཚོའི་ཆོས་ཕྱོགས་ཀྱི་དམིགས་ཡུལ་ (དངོས་པོའི་གནས་ཚུལ་དང་མཐུན་པ་ཞིག་དགོས་པ་ལས་ཁ་ཙམ་གྱིས་གཞན་ཕན་སྒྲུབ་པ་ཙམ་ལ་ཟེར་གྱི་མེད།) གང་ཡིན་པ་སོགས་ང་ཚོས་དངོས་པོའི་གནས་ཚུལ་དང་བསྟུན་དགོས་ཀྱི་ཡོད། ང་ཚོས་ནུས་པ་དང་ལྡན་པའི་དགེ་བའི་བཤེས་གཉེན་ཞིག་དང་ཆོས་ཕྱོགས་ཀྱི་འབྲེལ་ལམ་མ་མཐུད་གོང་དེའི་ཁྱད་ཆོས་ལ་ཚུལ་བཞིན་དུ་བརྟག་དཔྱད་བྱེད་པ་ཡིན་ན། དགེ་རྒན་དེ་ལྷ་ལྟར་འཛིན་པའམ། ཡང་ན་འདྲེ་ལྟར་འཛིན་པའི་མཐའ་གཉིས་སུ་མི་ལྷུང་བ་ལས་ཐར་སྲིད་པ་ཡིན། ང་ཚོས་དགེ་རྒན་དེ་ལྷ་རུ་བལྟ་བའི་སྐབས། སོ་སོའི་བྱིས་བློའི་ཆ་དེས་འབྱུང་ངེས་པའི་ལོག་སྤྱོད་ཀྱི་སྒོ་མོ་འབྱེད་ཀྱི་ཡོད། གལ་ཏེ་ང་ཚོས་དེ་མི་ངན་འདྲེ་ལྟ་བུར་བལྟས་ན། འཁྲུལ་སྣང་གི་ལྟ་ཚུལ་དེས་སོ་སོར་ཁེ་ཕན་སྒྲུབ་པ་ལ་སྔོན་འགོག་བྱེད་ཀྱི་ཡོད།

བརྙན་པར། རྗེ་བཙུན་མ་བསྟན་འཛིན་དཔལ་མོ། “དགེ་བའི་བཤེས་གཉེན་ཞིག་ཇི་ལྟར་འཚོལ་དགོས་སམ།”

ཆོས་ཀྱི་སློབ་སྟོན་པ་ཞིག་གི་སློབ་མ་ཆགས་པ་དང་གསོ་དཔྱད་པ་ཞིག་གི་ལམ་སྟོན་ཞུ་མི་ཞིག་ཆགས་པ་གཉིས་དབར་གྱི་ཁྱད་པར།

དགེ་རྒན་དང་དགེ་ཕྲུག་དབར་གྱི་མགོ་རྙོག་གི་འབྱུང་གཞི་ཆེ་བ་གཅིག་ནི། ཆོས་ཕྱོགས་ཀྱི་སློབ་སྟོན་པ་དེ་གསོ་དཔྱད་པ་ཞིག་ཏུ་རེ་བ་བྱེད་པ་དེ་ཡིན། དཔེར་ན། སོ་སོའི་མི་ཚེ་ལྷག་མའི་རིང་སེམས་ཚོར་གྱི་བདེ་བ་དང་གཞན་དང་མཉམ་དུ་འབྲེལ་ལམ་ཡག་པོ་འབྱུང་བར་འདོད་མཁན་ཞིག་ལ་བསམ་བློ་གཏོང་དང་། དམིགས་ཡུལ་དེ་སྒྲུབ་པར་ཆོས་ཕྱོགས་ཀྱི་སློབ་སྟོན་ཞིག་གི་སློབ་མ་ཆཌ་པ་དེ་གསོ་དཔྱད་པ་ཞིག་གི་ལམ་སྟོན་ཞུ་མི་ཆགས་པ་དང་ཕྱོགས་མང་པོ་ཞིག་ནས་འདྲ་པོ་ཡོད་པ་རེད།

ནང་ཆོས་དང་གསོ་དཔྱད་གཉིས་ཀ་ནི།

༡༽ ང་ཚོའི་མི་ཚེའི་ནང་གི་དཀའ་ངལ་ངོས་འཛིན་པ་དང་ཁས་ལེན་བྱེད་པ་དང་། དེ་དག་ཇེ་ཉུང་དུ་གཏོང་འདོད་ལས་འབྱུང་བ་ཡིན།

༢༽ ང་ཚོའི་དཀའ་ངལ་དང་དེ་དག་གི་རྒྱུ་རྐྱེན་ངོས་འཛིན་པ་དང་ཤེས་པའི་ཆེད་མི་ཞིག་དང་མཉམ་དུ་ལས་ཀ་བྱེད་དགོས་ཀྱི་ཡོད། དངོས་གནས་བྱས་ན། གསོ་དཔྱད་ཀྱི་རྣམ་པ་མང་པོས་གོ་རྟོགས་དེས་རང་ཉིད་སྒྱུར་ལྡོག་འགྲོ་བར་ཆ་རྐྱེན་གྱི་ལྟེ་བའམ་ལྡེ་མིག་ལྟ་བུར་བྱེད་ཀྱི་ཡོད་པ་ནང་ཆོས་ལྟར་ངོས་ལེན་བྱེད་ཀྱི་ཡོད།

༣༽ ང་ཚོའི་དཀའ་ངལ་གྱི་རྒྱུ་ཤེས་རྟོགས་བྱ་རྒྱུར་དོ་ནན་ཞིབ་ཚགས་བྱེད་མཁན་གྱི་གྲུབ་མཐའ་དང་། ཆ་རྐྱེན་འདི་དག་ལས་ཐར་བའི་ཆེད་དངོས་ཡོད་དང་མཐུན་པའི་ཐབས་ལམ་ལ་འབད་བརྩོན་གྱིས་ཤུགས་རྒྱག་མཁན་གྱི་སྲོལ་རྒྱུན་ཁག་དང་། ལངས་ཕྱོགས་དེ་གཉིས་ཆ་སྙོམ་པའི་མཉམ་སྡེབ་དགོས་སྐོར་ལམ་སྟོན་བྱེད་མཁན་གྱི་ལྟ་གྲུབ་ལམ་ལུགས་ལ་དང་ལེན་བྱེད་དགོས།

༤༽ རང་རྒྱུད་ཡར་རྒྱས་གཏོང་བའི་བརྒྱུད་རིམ་ཁྲོད་གལ་ཆེའི་ཆ་ཤས་ཤིག་ཏུ་སློབ་སྟོན་པ་དང་གསོ་དཔྱད་པ་གཉིས་དང་མཉམ་དུ་སེམས་ཚོར་གྱི་འབྲེལ་ལམ་བཟང་པོ་ཞིག་བསྐྲུན་པར་རྒྱབ་སྐྱོར་བྱེད་དགོས།

༥༽ ལམ་སྟོན་ཞུ་མི་རྣམས་ཀྱི་ཀུན་སྤྱོད་དང་བསམ་བློའི་འཁྱེར་སོ་བཅོས་སྒྱུར་གཏོང་ཆེད་གནའ་བོའི་གསོ་དཔྱད་མང་ཆེ་བས་བཟང་སྤྱོད་ཀྱི་རྩ་འཛིན་བེད་སྤྱོད་གཏོང་རྒྱུ་དེ་འདོར་གྱི་ཡོད་ནའང་། ཆེས་གནའ་བོའི་སྲོལ་རྒྱུན་ཉུང་ཤས་ཀྱིས་ནང་ཆོས་ནང་གསུངས་པ་དང་འདྲ་བའི་བཟང་སྤྱོད་ཀྱི་རྩ་འཛིན་རྒྱབ་སྐྱོར་བྱེད་ཀྱི་ཡོད། དེ་ལྟ་བུའི་རྩ་འཛིན་གྱི་ནང་དུ་རྩོད་རྙོག་ཅན་གྱི་ཁྱིམ་ཚང་དེའི་ནང་མི་ཚང་མ་གཅིག་གྱུར་གྱི་དྲང་པོ་བྱེད་དགོས་པ་དང་། ཁོང་ཁྲོ་ལྟ་བུའི་གནོད་ཚབས་ཆེ་བའི་སེམས་ཀྱི་སྐུལ་སློང་ལས་བྱུང་བའི་བྱ་སྤྱོད་རིགས་སྤོང་དགོས་པ་གསུང་གི་ཡོད།

དེ་ལྟར་འདྲ་བའི་ཆ་ཡོད་པ་ལ་མ་ལྟོར་པར། ནང་པའི་སློབ་སྟོན་པ་ཞིག་གི་སློབ་པ་ཆགས་པ་དང་། གསོ་དཔྱད་པ་ཞིག་གི་སློབ་སྟོན་ཞུ་མི་ཞིག་ཆགས་པ་དེ་གཉིས་ཀྱི་དབར་ལ་ཉུང་མཐར་ཡང་གལ་གནད་ཆེ་བའི་ཁྱད་པར་ལྔ་ཡོད་དེ།

༡༽ འབྲེལ་ལམ་གསར་གཏོད་བྱེད་པའི་སེམས་ཚོར་གྱི་རིམ་པ། ལམ་སྟོན་ཞུ་མི་རྣམས་སྤྱིར་བཏང་ནས་སེམས་འཁྲུགས་ཏེ་མི་བདེ་བའི་སྐབས་སུ་གསོ་དཔྱད་པའི་དྲུང་དུ་བཅར་གྱི་ཡོད་ཅིང་། ཁོང་ཚོའི་སེམས་ཁམས་འཁྲུགས་པ་དང་གསོ་ཐབས་ཀྱི་ཆ་ཤས་སུ་སྨན་བཅོས་བྱེད་དགོས་པའང་ཡོད། དེ་ལས་ལྡོག་སྟེ། ནུས་ལྡན་གྱི་དགེ་ཕྲུག་རྣམས་ཀྱིས་ཆོས་ཀྱི་ལམ་དུ་ཞུགས་པའི་སྐབས་གོམ་པ་དང་པོ་དེ་སློབ་སྟོན་པ་དང་མཉམ་དུ་འབྲེལ་ལམ་བཟོ་གི་མེད། དེའི་སྔོན་དུ་ཁོང་ཚོས་སངས་རྒྱས་ཀྱི་གསུང་ལ་སློབ་སྦྱོང་བྱེད་པ་དང་། རང་ཉིད་ཡར་རྒྱས་གཏོང་རྒྱུར་འབད་བརྩོན་བྱེད་ཀྱི་ཡོད། དེའི་མཇུག་འབྲས་སུ་ཁོང་ཚོའི་སེམས་ཚོར་གནས་ཚད་ལོངས་པ་དང་བརྟན་ཆ་ལྡན་པའི་རིམ་པར་སླེབས་ཤིང་། ནང་ཆོས་ཐོག་ནས་བཤད་ན། དགེ་རྒན་དགེ་ཕྲུག་དབར་གྱི་འབྲེལ་ལམ་བཟང་པོ་ཞིག་ཡོང་ཐུབ་ཀྱི་ཡོད། ཕྱོགས་གཞན་ཞིག་ནས་ནང་པའི་སློབ་མ་ཚོར་དང་ཐོག་ནས་དེ་ལྟ་བུའི་དབང་རྩ་འཁྲུཌ་པའི་ནད་ཀྱིས་ཟིན་པའི་སྤྱོད་པ་དང་བསམ་བློའི་འཁྱེར་སོ་སྔོན་ཚུད་ནས་མེད་པ་དགོས་ཀྱི་ཡོད།

༢༽ འབྲེལ་ལམ་ཁྲོད་གཅིག་ལན་གཅིག་འཇལ་གྱིས་རེ་སྒུག་བྱེད་པ། ནུས་པ་དང་ལྡན་པའི་ལམ་སྟོན་ཞུ་མི་མང་ཆེ་བ་སོ་སོར་ཉན་འཇོག་བྱེད་མཁན་ཞིག་ཡོད་ན་དགའ་མོས་བྱེད་ཀྱི་ཡོད། དེར་བརྟེན་ཁོང་ཚོས། གསོ་དཔྱད་པས་སོ་སོ་ལ་ཤ་ཞེན་བྱེད་པ་དང་། སོ་སོའི་སྒེར་གྱི་དཀའ་ངལ་ཐད་རྩེ་གཅིག་པའི་དོ་སྣང་ཆ་ཚང་སྤྲོད་རྒྱུར་རེ་བ་བྱེད་པ་མ་ཟད། སློབ་སྟོན་ཞུ་མིའམ་ནད་པ་མང་པོ་ཚོགས་པའི་སྐབས་སུའང་དེ་ལྟར་རེ་བ་བྱེད་ཀྱི་ཡོད། ཕྱོགས་གཞན་ཞིག་ནས་ནང་པའི་དགེ་ཕྲུག་ཚོས་སྤྱིར་བཏང་ནས་སོ་སོའི་དཀའ་ངལ་ཆོས་ཀྱི་སློབ་སྟོན་པ་ལ་ཞུ་གི་མེད་པ་དང་། སྒེར་གྱི་དོ་སྣང་ལ་རེ་བ་དང་དགོས་འདུན་དེ་འདྲ་བྱེད་ཀྱི་མེད། སློབ་པ་ཚོར་སྒེར་གྱི་བསླབ་བྱ་འཐོབ་པའི་ཆེད་དུ་སློབ་སྟོན་པ་བསྟེན་དུ་འགྲོ་གི་ཡོད་ནའང་། ཁོ་ཚོ་ནམ་རྒྱུན་དུ་དེ་ལྟར་འགྲོ་གི་མེད། དགེ་རྒན་དང་དགེ་ཕྲུག་གི་འབྲེལ་ལམ་ནང་གི་དམིཌ་ས་དེ་ནི་ཆོས་ཉན་རྒྱུ་དེ་ཡིན། ནང་པའི་སློབ་མ་ཚོས་སྤྱིར་བཏང་མི་ཚང་མར་འཕྲད་པའི་དཀའ་ངལ་ལས་ཐར་བའི་ཆེད་དགེ་རྒན་གྱི་དྲུང་ནས་གཙོ་བོ་དེའི་ཐབས་ལམ་སྦྱོང་གི་ཡོད། དེ་ནས་གནས་སྟངས་བྱེ་བྲག་པ་ཞིག་གི་ནང་ཐབས་ལམ་དེ་དག་ལག་བསྟར་བྱེད་རྒྱུ་སོ་སོའི་ལས་འགན་ཡིན་པར་བསམ་གྱི་ཡོད།

༣༽ འབྲེལ་ལམ་བྱེད་བཞིན་པ་ལས་འབྲས་བུར་རེ་བ་བྱེད་པ། གསོ་དཔྱད་ཀྱི་དམིགས་ཡུལ་ནི། ང་ཚོའི་མི་ཚེའི་ནང་གི་དཀའ་ངལ་རྣམས་དང་ལེན་བྱས་ཏེ་དེ་དག་དང་མཉམ་གནས་ཐུབ་པ་བྱ་རྒྱུ་དང་། ཡང་ན་དེ་དག་ཉུང་དུ་བཏང་ནས་བཟོད་ཐུབ་པ་བཟོ་རྒྱུ་དེ་ཡིན། གལ་སྲིད་ང་ཚོས་ཚེ་འདིའི་སེམས་ཚོར་གྱི་བདེ་ཐབས་ཆེད་ནང་ཆོས་ཀྱི་སེམས་དོན་རིག་པའི་དགེ་རྒན་ཞིག་གི་རྗེས་སུ་འཇུག་པ་ཡིན་ན། ང་ཚོའི་དཀའ་ངལ་རྣམས་ཉུང་དུ་གཏོང་རྒྱུའི་རེ་བ་བྱེད་སྲིད། མི་ཚེ་འདིའི་ནང་དཀའ་ངལ་ག་ཚོད་ཡོད་ཀྱང་། བདེན་པའི་དངོས་དང་པོ་ ༼འཕགས་པའི་བདེན་པ་༽ དེ་ནི་སྡུག་བསྔལ་གྱི་བདེན་པ་ཞེས་སངས་རྒྱས་ཀྱིས་བསྟན་པ་ཡིན་ཞིང་། ང་ཚོས་དེ་ཇེ་ཉུང་དུ་གཏོང་ཐུབ་པ་ཞིག་ཡིན།

སེམས་ཚོར་གྱི་ཐོག་ནས་ང་ཚོའི་མི་ཚེ་དཀའ་ངལ་ཉུང་དུ་བཟོ་བ་དེ་ནི་གང་ལྟར་ནང་པའི་གཞུང་ནང་གསུངས་པའི་ལམ་དུ་འཇུག་པའི་སྔོན་འགྲོའི་རིམ་པ་ཞིག་ཡིན། ཆོས་ཀྱི་དགེ་རྒན་རྣམས་ཀྱི་དགེ་ཕྲུག་ཚོས་མ་མཐར་ཡང་བདེ་འགྲོ་དང་། ཐར་པ། ཐམས་ཅད་མཁྱེན་པ་སྒྲུབ་པའི་དམིགས་ཡུལ་ཕྱོགས་སུ་འགྲོ་གི་ཡོད། དེར་མ་ཟད། ནང་པའི་སློབ་མ་ཚོས་ནང་པའི་གཞུང་ལུགས་ནང་འགྲེལ་བཤད་བྱས་ཡོད་པ་ནང་བཞིན་སྐྱེ་བ་ཕྱི་མའི་ཐོག་གོ་རྟོགས་ནུས་པ་དང་ལྡན་པ་ཞིག་ཡོད་པ་དང་། ཉུང་མཐར་ཡང་དེ་གཞི་གྲུབ་ཀྱི་གཏན་ལ་མ་ཕབ་པའི་ཁས་ལེན་ཡོད་པ་རེད། གསོ་དཔྱད་ཀྱི་ལམ་སྟོན་ཞུ་མི་ཚོས་སྐྱེ་བ་ཕྱི་མིའི་སྐོར་བསམ་བློ་གཏོང་མི་དགོས་པའམ་དེ་ལས་བརྒལ་ནས་གནས་སྟངས་ཇེ་ལེགས་སུ་གཏོང་བའི་དམིགས་ཡུལ་ཐད་དོ་སྣང་བྱེད་མི་དགོས།

༤༽ རང་ཉིད་འགྱུར་བཅོས་གཏོང་བ་ལ་ཆོད་སེམས་ཀྱི་རིམ་པ། གསོ་དཔྱད་པའི་ལམ་སྟོན་ཞུ་མི་ཚོས་ཆུ་ཚོད་རེ་རེར་གླ་སྤྲོད་ནའང་། བསམ་བློའི་འཁྱེར་སོ་དང་ཀུན་སྤྱོད་ཐད་མི་ཚེ་གང་པོར་གནས་པའི་འགྱུར་བ་གཏོང་བའི་ཆོད་སེམས་བཞག་གི་མེད། ཕྱོགས་གཞན་ཞིག་ནས་ནང་པའི་སློབ་མ་ཚོས། ཆོས་ཞུ་བ་ལ་དངུལ་དོད་སྤྲོད་ཀྱི་ཡོད་མེད་གང་ལྟར་ཡང་། འགྲོ་ལུགས་ལྟར་ཁོང་ཚོས་སོ་སོའི་མི་ཚེའི་ཁ་ཕྱོགས་ལ་འགྱུར་བ་གཏོང་གི་ཡོད། ཉེན་མེད་ཀྱི་ཁ་ཕྱོགས་སམ་སྐྱབས་སུ་འགྲོ་བའི་སྐབས་སུ་སངས་རྒྱས་ཐམས་ཅད་ཡོངས་སུ་བགྲོད་ནས་གསུངས་པའི་ཆོས། རང་རྒྱུད་ཡར་རྒྱས་གཏོང་དགོས་པ་དེ་ལ་སློབ་མ་རྣམས་ཀྱིས་ཆོད་སེམས་བརྟན་པོས་འཇུག་པ་དང་། འཕགས་པའི་དགེ་འདུན་གྱི་སྡེས་ཀྱང་དེའི་རྗེས་སུ་འཇུག་པར་འབད་ཀྱི་ཡོད།

དེར་མ་ཟད། ནང་པའི་སློབ་མ་ཚོས་མི་ཚེའི་ནང་བཟང་སྤྱོད་དང་། བཟང་ཕྱོགས་ཀྱི་བྱ་སྤྱོད། སྐད་ཆ་མ་ནོར་བ་ཤོད་པ། བསམ་བློ་ཡང་དག་པ་གཏོང་བ་བཅས་ལ་སོ་སོ་ངོས་ནས་ཆོད་སེམས་བཞག་གི་ཡོད། ཁོང་ཚོས་གང་ཐུབ་ཅི་ཐུབ་ཀྱིས་མི་དགེ་བའི་ལས་སྤོང་ཐབས་དང་། དེའི་ཚབ་ཏུ་དགེ་བའི་ལས་སྒྲུབ་ཐབས་བྱེད་ཀྱི་ཡོད། སློབ་མ་ཚོས་དབང་མེད་ཀྱིས་འཁོར་བའི་ནང་སྐྱེ་བའི་སྡུག་བསྔལ་ཡང་ནས་ཡང་དུ་འབྱུང་བ་ལས་ཐར་བའི་བཅོས་མིན་གྱི་ཡིད་སྨོན་ཞིག་བྱེད་པའི་སྐབས་། འགྲོ་ལུཌ་ལྟར། ཁོ་ཚོས་ཁྱིམ་པ་དང་དགེ་ཚུལ་སློང་གི་སྡོམ་པ་བླངས་ནས་ད་དུང་དེ་ལས་བརྟན་པའི་ཆོད་སེམས་བཞག་གི་རེད། གནས་རིམ་དེའི་སྐབས་ཀྱི་སློབ་མ་རྣམས་ཀྱིས། རང་རྒྱུད་ཡར་རྒྱས་བཏང་ནས། དམིགས་བཀར་གྱི་སྤྱོད་ཚུལ་ངན་པའི་རིགས་ཏེ། རང་བཞིན་གྱིས་གཞན་ལ་གནོད་པའི་ལས་ ༼རང་བཞིན་གྱི་ཁ་ན་མ་ཐོ་བའམ་༽ཡང་ན་སངས་རྒྱས་ཀྱིས་གང་ཟག་བྱེ་བྲག་སོ་སོར་དགོས་པ་རྒྱུ་མཚན་བྱེ་བྲག་ལ་བརྟེན་ནས་སྤོང་དགོས་གསུངས་པའི་གནོད་པའི་ལས་ ༼བཅས་པའི་ཁ་ན་མ་ཐོ་བ་༽ གཉིས་ཀར་དུས་དང་རྣམ་པ་ཀུན་ཏུ་མི་ཚེ་ཧྲིལ་པོར་སྤོང་དགོས་པའི་སྡོམ་པ་ལེན་གྱི་ཡོད། དེ་གཉིས་ལས་ཕྱི་མའི་དཔེ་ཞིག་ནི། འདོད་ཆགས་ཉུང་དུ་གཏོང་བའི་ཆེད་དུ། གྲྭ་བཙུན་རྣམས་ཀྱིས་ཁྱིམ་པའམ་སྐྱ་བོའི་གོས་སྤངས་ནས་རབ་བྱུང་གི་ཆས་གོས་གྱོན་པ་ལྟ་བུ་རེད། ཐ་ན་ཐར་པ་དོན་གཉེར་གྱི་བསམ་པ་མ་སྐྱེས་པའི་སྔོན། སློབ་མ་ཚོས་ཁྱིམ་པའམ་རབ་བྱུང་གི་སྡོམ་པ་ལེན་གྱི་ཡོད།

ཕྱོགས་གཞན་ཞིག་ནས་གསོ་དཔྱད་པའི་ལམ་སྟོན་ཞུ་མི་རྣམས་ཀྱིས་གསོ་དཔྱད་ཀྱི་གན་རྒྱའི་ཆ་ཤས་སུ་གྱུར་བའི་སྒྲིག་ཁྲིམས་ངེས་ཅན་འགའ་སྲུང་བརྩི་བྱེད་ཀྱི་ཡིན་ཞེས་ཁས་ལེན་བྱེད་ཀྱི་ཡོད་པ་དཔེར་ན། སྐར་མ་ལྔ་བཅུའི་རིང་གི་མཇལ་འཕྲད་དུས་ཚོད་རེའུ་མིག་བཟོས་པ་ལྟ་བུ་རེད། འོན་ཀྱང་སྒྲིག་ཁྲིམས་དེ་དག་ནི་སྨན་བཅོས་བྱེད་པ་ཙམ་གྱི་རིང་ལ་འབྲེལ་བ་ཞིག་ཡིན། ཁོ་ཚོས་གསོ་དཔྱད་ཀྱི་བཀོད་སྒྲིག་དེའི་ཕྱི་རོལ་ཏུ་ལག་བསྟར་བྱེད་ཀྱི་མེད་ལ། རང་བཞིན་གྱིས་གནོད་པའི་སྤྱོད་པ་སྤོང་རྒྱུའི་ཁོངས་སུ་གཏོགས་ཀྱི་མེད། དེ་ནི་མི་ཚེ་གང་པོར་ཕན་པའི་དོན་དུ་ནི་མ་ཡིན།

༥༽ དགེ་རྒན་ནམ་གསོ་དཔྱད་པར་འཛིན་པའི་བློའི་ཁྱེར་ཕྱོགས། དགེ་ཕྲུག་ཚོས་རང་གིས་གང་ཞིག་འཐོབ་པ་ལ་དོན་གཉེར་གྱིས་འབད་བཞིན་པའི་ཆོས་ཀྱི་དགེ་རྒན་དེར་དངོས་ཡོད་འཚོ་བའི་ཁྲོད་བཞུགས་པའི་དཔེ་མཚོན་ཞིག་ཏུ་བརྩི་གི་ཡོད། ཁོ་ཚོས་དེ་ལྟར་བརྩི་བ་ནི། དགེ་རྒན་གྱི་ཁྱད་ཆོས་བཟང་པོ་རྣམས་ངོས་འཛིན་ཡང་དག་པ་བྱས་པའི་ཐོག་ལ་གཞིར་བཞག་སྟེ། ཐམས་ཅད་མཁྱེན་པའི་ལམ་གྱི་རིམ་པའི་རྒྱུད་རིམ་ནང་ལྟ་ཚུལ་འདི་རྒྱུན་འཛིན་དང་སྲ་བརྟན་བཟོ་གི་ཡོད། དེ་ལས་ལྡོག་སྟེ། ལམ་སྟོན་ཞུ་མི་ཚོས་གསོ་དཔྱད་པ་ནི། སེམས་ཚོར་འཕྲོད་བསྟེན་གྱི་དཔེ་ལྟ་བུར་བསམ་བློ་འཁོར་སྲིད་ཀྱང་། ཁོ་ཚོ་ལ་གསོ་དཔྱད་པའི་ཁྱད་ཆོས་བཟང་པོ་རྣམས་ལ་ཡང་དག་པའི་སྒོ་ནས་ངོས་འཛིན་དགོས་ཀྱི་མེད། གསོ་དཔྱད་པ་འདྲ་པོ་ཞིག་ཆགས་པ་ནི་འབྲེལ་ལམ་གྱི་དམིཌ་ཡུལ་མ་ཡིན། སྨན་བཅོས་ཀྱི་བརྒྱུད་རིམ་ནང་གསོ་དཔྱད་པས་རང་གི་ལམ་སྟོན་ཞུ་མི་རྣམས་རྣམ་རྟོག་གི་ཡུལ་ལས་བརྒལ་ཏེ་འཁྲིད་ཀྱི་ཡོད།

བརྙན་པར། འབུམ་རམས་པ་ཨེ་ལེག་ཛན་ཌར་བྷར་ཛིན། “ནང་ཆོས་དང་གསོ་དཔྱད་རིག་པ།”

སློབ་མ་ཞེས་པའི་ཐ་སྙད་བེད་སྤྱོད་བྱེད་སྟངས་མི་འཚམས་པ།

དོན་ངོ་མར། དགེ་རྒན་དང་སློམ་མ་ཞེས་པའི་ཐ་སྙད་ཀྱི་དོན་ཚུལ་བཞིན་དུ་སྤྱོད་ཐུབ་ཀྱི་མེད་ནའང་།  ད་དུང་མི་རྣམས་ཀྱིས་སོ་སོར་དགེ་བའི་བཤེས་གཉེན་གྱི་སློབ་མ་ཞེས་བརྗོད་ཀྱི་ཡོད། ཁོང་ཚོའི་བྱིས་བློ་མི་ཤེས་པའི་ཆ་དེས་རྒྱུན་དུ་དོན་དངོས་དང་མི་མཐུན་པའི་རེ་བ་དང་། གོ་ལོག སེམས་ཕོག་གི་ཚོར་བ། ད་དུང་ལོག་སྤྱོད་སོགས་ཀྱི་ཕྱོགས་སུ་འཁྲིད་ཀྱི་ཡོད། སྐབས་འདིར་ལོག་སྤྱོད་ཀྱི་ཡུལ་དུ་གྱུར་བ་ཞེས་པའི་དོན་ནི། འཁྲིག་སྤྱོད་དང་། སེམས་ཚོར། དཔལ་འབྱོར་བཅས་ཀྱི་ཐོག་ནས་བཤུ་གཞོག་གཉའ་གནོན་བྱེད་པའམ། ཡང་ན་དབང་ཤུགས་ཀྱི་སྒོ་ནས་མི་ཞིག་ལ་གཡོ་བྱུས་སྟོན་པ་ལ་ཟེར། ད་ང་ཚོས་ནུབ་ཕྱོགས་སུ་ཡོད་པའི་སྤྱིར་བཏང་གི་སློབ་མ་རྫུས་མ། དམིགས་བསལ་དགེ་རྒན་དང་མཉམ་དུ་དཀའ་ངལ་འཕྲད་ངེས་པའི་རིགས་གསུམ་གྱི་ཐོག་ལ་བརྟག་དཔྱད་བྱ་རྒྱུ་ཡིན།

༡༽ མི་ཁ་ཤས་ནང་པའི་ཆོས་ཚོགས་སུ་སོ་སོའི་འཆར་སྣང་སྒྲུབ་པའི་ཆེད་དུ་ཡོང་གི་ཡོད། ཁོང་ཚོས་ “ཡ་མཚན་གྱི་ཤར་ཕྱོགས་” སམ། ཡང་ན་ཧ་ཅང་སྙན་གྲགས་ཅན་གྱི་དགེ་རྒན་གྱི་སྐོར་དཔེ་དེབ་བཀླགས་པའམ་གཞན་ནས་ཐོས་ཏེ། ཡ་མཚན་ཅན་ནམ་སྦས་དོན་གྱི་ཉམས་མྱོང་ཐོབ་ནས་སྤྲོ་སྣང་དེ་ཙམ་མེད་པའི་ཁོང་ཚོའི་མི་ཚེ་འདི་ལས་བརྒལ་ནས་འགྲོ་འདོད་བྱེད་ཀྱི་ཡོད། ཁོང་ཚོས་དམིཌ་བསལ་ཨེ་ཤི་ཡ་ནས་ཡིན་ཞིང་གྲྭ་ཆས་གྱོན་པའི་ཆོས་ཕྱོགས་ཀྱི་དགེ་རྒན་མཇལ་མ་ཐག་ཏུ་རང་ཉིད་བླ་མའམ་དགེ་རྒན་དེའི་སློབ་མ་ཡིན་ཞེས་ཟེར་གྱི་ཡོད། དེ་བཞིན་ཨེ་ཤེ་ཡའི་མཚན་གནས་སམ་མིང་ཡོད་པའི་ནུབ་ཕྱོགས་ཀྱི་དགེ་རྒན་གྲྭ་ཆས་གྱོན་མིན་ལ་མ་ལྟོས་པར། ཁོང་ཚོས་སྤྱོད་ལམ་དེ་དང་འདྲ་བ་སྟོན་སྲིད་པ་ཡིན།

དེ་འདྲ་བའི་ཆོས་ལ་འབད་བརྩོན་བྱེད་མཁན་རྣམས་ཀྱིས་དགེ་བའི་བཤེས་གཉེན་དང་འབྲེལ་ལམ་བཟོས་པ་དེ་ནམ་རྒྱུན་རང་བཞིན་ལས་འདས་པའི་སྦས་དོན་འཚོལ་ཞིབ་ཀྱིས་སྐྱོ་རུ་གཏོང་གི་ཡོད། ཁོང་ཚོས་རང་ཉིད་དགེ་རྒན་ཚད་ལྡན་ཞིག་གི་སློབ་མ་ཡིན་ཞེས་ཟེར་ནའང་། ནམ་ཞིག་སོ་སོའི་བསམ་བློའི་འཆར་སྒོའི་ནང་ཡོད་སྲིད་ན་མ་གཏོགས་གཞན་རང་བཞིན་ལས་འདས་པའི་སྦས་དོན་གྱི་ནུས་སྟོབས་གང་ཡང་ཡོང་གི་མེད་པ་ཤེས་པའི་སྐབས་ཁོ་ཚོས་དགེ་རྒན་སྐྱུར་ཏེ་འགྲོ་གི་ཡོད། དེར་མ་ཟད། དོན་དངོས་དང་མི་མཐུན་པའི་བློའི་འཁྱེར་སོ་དང་རེ་བ་ཆེ་བའི་ “གློ་བུར་གྱི་སློབ་མ་” རྣམས་ཀྱི་རྣམ་དཔྱོད་སྒྲིབ་པར་བྱེད་ཀྱི་ཡོད། དེ་ལྟ་བུའི་མི་ནི། མ་ཡིན་ཡིན་མདོག་བྱེད་མཁན་གྱི་དགེ་རྒན་ཟོག་རྫུ་ཅན་གྱི་མགོ་སྐོར་འོག་ཏུ་འཚུད་ཀྱི་ཡོད།

༢༽ གཞན་རྣམས་འ་ཆད་འུ་ཐུག་ཆགས་ནས་ལུས་སེམས་ཀྱི་སྡུག་བསྔལ་ལས་ཐར་བའི་ཆེད་ཆོས་ཚོགས་ནང་རོགས་འཚོལ་བར་ཡོང་གི་ཡོད། ཁོང་ཚོས་ཕལ་ཆེར་གསོ་དཔྱད་ཀྱི་རིགས་སྣ་ཚོགས་ཤིག་བརྒྱུད་དེ་ཐབས་ཤེས་བྱས་ཡོད་ཀྱང་ཕན་འབྲས་བྱུང་མེད་པ་རེད། ད་ཁོང་ཚོས་བཅོས་ཐབས་སུ་རྫུ་འཕྲུལ་གྱི་སྒོ་ནས་བཅོས་མཁན་ཞིག་འཚོལ་གྱི་ཡོད། ཁོང་ཚོར་སོ་སོའི་དཀའ་ངལ་རྣམས་རང་བཞིན་གྱིས་སེལ་བར་བྱེད་པའི་བྱིན་གྱིས་བརླབས་པའི་རིལ་བུ་དང་། དམིགས་བསལ་སྨོན་ལམ་མམ་གཟུངས་སྔགས་བཟླས་བརྗོད་བྱེད་དགོས་ཟེར་བའམ། ཡང་ན་ཕྱག་འབུམ་འཚལ་དགོས་ཟེར་བ་ལྟ་བུ། ཁོ་ཚོར་བྱེད་དགོས་པའི་ནུས་པ་དང་ལྡན་པའི་ཉམས་ལེན་གནང་མཁན་སུ་འདྲ་ཞིག་ཡིན་རུང་སོ་སོ་དེའི་སློབ་མ་ཡིན་ཞེས་བརྗོད་ཀྱི་ཡོད། ཁོང་ཚོ་རང་བཞིན་ལས་འདས་པའི་སྦས་དོན་འཚོལ་ཞིབ་བྱེད་མཁན་གྱི་མི་རྣམས་ཡིད་དབང་འཕྲོག་འཇུག་མཁན་གྱི་དགེ་རྒན་རིགས་གཅིག་པ་ལ་དམིགས་བསལ་གྱིས་ཁ་ཕྱོགས་ཀྱི་ཡོད། ཡ་མཚན་དང་རྫུ་འཕྲུལ་ལ་དོན་གཉེར་ཅན་ཚོའི་བསམ་བློ་གཏོང་སྟངས་ “བཅོས་སྒྲིག་” དེས་རྒྱུན་དུ་བློ་ཕམ་དང་རེ་ཐག་ཆོད་པའི་གནས་སུ་འཁྲིད་ཅིང་། ཚད་དང་ལྡན་པའི་དགེ་རྒན་གྱི་བསླབ་བྱའི་རྗེས་སུ་འབྲངས་ཀྱང་། རང་བཞིན་ལས་འདས་པའི་རྫུ་འཕྲུལ་གྱི་ནུས་པས་གསོ་ཐུབ་པའི་འབྲས་བུ་ཞིག་མི་འབྱུང་བ་ཡིན། བསམ་བློ་གཏོང་སྟངས་ “བཅོས་སྒྲིག་” དེས་ད་དུང་ཆོས་པ་རྫུན་མའི་ལོག་སྤྱོད་ཀྱི་རྐྱེན་བྱེད་པ་ཡིན།

༣༽ ད་དུང་མི་གཞན་དང་། ལྷག་པར་དུ་རེ་བ་ཟད་མཁན་དང་ན་གཞོན་ལས་མེད་མང་པོ་ཞིག་ཆོ་ག་ཕྱག་ལེན་གྱི་ཆོས་བརྒྱུད་འཛིན་པའི་ཆོས་ཚོགས་ནང་ཞུགས་ནས་ནུས་མཐུ་ཁྱད་པར་ཅན་འཐོབ་རེ་བྱེད་ཀྱི་ཡོད། ཁོ་ཚོས་དེ་ཡིད་དབང་འཕྲོག་པའི་འཁྲུལ་སྣང་གིས་ཆོས་ཕྱོགས་ཀྱི་དབང་ཆ་སྒེར་འཛིན་ལྟ་བུའི་ཐབས་སུ་བེད་སྤྱོད་བྱེད་ཀྱི་ཡོད། གལ་སྲིད་ཁོ་ཚོས་ཆོས་བརྒྱུད་ལ་མཐའ་གཅིག་ཏུ་ཤ་ཞེན་སྤྲད་པ་ཡིན་ན། ཁོང་ཚོས་སོ་སོའི་སློབ་མ་ཡིན་ཟེར་བ་མང་པོ་ཞིག་ལ་དམ་བཅའ་འཇོག་གི་ཡོད། ད་དུང་རང་གི་སློབ་མ་ལ་སྲུང་མ་དྲག་པོས་དགྲ་བོ་འཇོམས་པའི་བཅོས་མའི་འགྲེལ་བཤད་ཀྱིས་མགོ་སྐོར་གཏོང་གི་ཡོད། དེ་ཡང་དམིགས་བསལ་ནང་པའི་སྲོལ་རྒྱུན་ཞན་པ་རྣམས་དང་ལྷད་ཞུཌ་པ་རྣམས་ཚར་གཅོད་ལུགས་སྐོར་ལ་ཡིན། ཁོང་ཚོའི་ལས་འགུལ་གྱི་སྲོལ་གཏོད་པ་པོ། མི་ལས་ཆེས་འཕགས་པའི་ནུས་སྟོབས་སྐོར་གཟི་བྱིན་ཆེ་མདོག་གི་སྒྲུང་སྣ་ཚོགས་ཀྱི་ཐོག་ནས། དམིགས་བསལ་ཆོས་ཀྱི་གོ་གནས་ལ་འདྲེན་པར་བྱེད་མཁན་གྱི་སློབ་མའི་སྟོབས་ལྡན་གྱི་འགོ་ཁྲིད་ཅིག་བྱེད་པའི་རྨི་ལམ་དེ་སྒྲུབ་ཐབས་བྱེད་ཀྱི་ཡོད། དམ་བཅའ་དེ་དག་གི་ལན་དུ། དེ་ལྟ་བུའི་མི་རང་ཉིད་མགྱོགས་པོ་དགེ་རྒན་ཞིག་གི་སློབ་མ་ཡིན་ཞེས་བརྗོད་ནས་དབང་ལྡན་གྱི་དགེ་རྒན་དེས་གདམས་ངག་དང་བཀོད་ཁྱབ་གང་འདྲ་ཞིག་གནང་བ་ལ་མིག་བཙུམ་ནས་རྗེས་སུ་འབྲང་གི་ཡོད། དེའི་འབྲས་བུ་ནི་དུས་རྒྱུན་བཀྲ་མི་ཤིས་པ་རང་ཡོང་གི་ཡོད།

ཕྱོགས་བསྡོམས།

མདོར་བསྡུས་ན། ནང་པའི་ཆོས་ཚོགས་ནང་སློབ་ཁྲིད་གནང་མཁན་དགེ་རྒན་ཚང་མ་ཚད་ལྡན་ཞིག་མ་ཡིན་པ་ལྟར། ཆོས་ཚོགས་ནང་སློབ་གཉེར་བྱེད་མཁན་གྱི་སློབ་མ་ཚང་མ་དེ་ལྟར་ཚད་ལྡན་ཡིན་མི་དགོས། ང་ཚོས་དགེ་རྒན་དང་སློབ་མ་ཞེས་པའི་ཐ་སྙད་བེད་སྤྱོད་གཏོང་སྟངས་མ་ནོར་བ་བྱེད་དགོས།  དེ་ལྟར་ཡོང་བར། ཆོས་ཕྱོགས་ཀྱི་དྲང་བདེན་དང་ཟོག་རྫུ་མེད་པ་ཞིག་དགོས།།

Top