བྷར་ཛིན་བཤད་མཛོད།

འབུམ་རམས་པ་ཨེ་ལེག་ཛན་ཌར་བྷར་ཛིན་གྱི་ནང་བསྟན་བཤད་མཛོད།

དྲ་ཤོག་དེའི་ནང་གི་ཡིག་ཐོག་ཅི་ཡོད་ལ་ཁ་ཕོད་པ། ཁ་ལོ་བ་གཙོ་བོར་མཆོངས། ཁ་ལོ་བ་གཙོ་བོར་རྒྱུགས།

དྲ་ཤོག་ངོ་གདོང་། > ནང་ཆོས་ལ་འཇུག་པ། > ནང་ཆོས་ངོ་སྤྲོད། > ནང་སེམས་ཀྱི་ཞི་བདེ་དང་འདོད་དོན་འཚོལ་བ།

ནང་སེམས་ཀྱི་ཞི་བདེ་དང་འདོད་དོན་འཚོལ་བ།

༸གོང་ས་༸སྐྱབས་མགོན་ཏཱ་ལའི་བླ་མ་སྐུ་ཕྲེང་བཅུ་བཞི་པ་ཆེན་པོ།
དབྱིན་ཡུལ། ནོ་ཊིང་ཧེམ།
་ཕྱི་ལོ་ ༢༠༠༨ ཟླ་ ༥ ཚེས་ ༢༥ ཉིན།
ཨེ་ལེག་ཛན་ཌར། བྷར་ཛིན་གྱིས་ཕབ་སྒྱུར་དང་། གསུང་གི་དུམ་བུ་འགའ་རེར་གསུང་སྒྱུར། ཕྱོགས་སྒྲིག་རོབ་ཙམ་ཞུས།
སྦྲགས་ཤད་གུག་ཁ་གང་མའི་ནང་དུ་གསལ་བཤད་བསྟན་ཡོད།

གནས་སྟངས་ཤིག་གི་དངོས་ཡོད་གནས་ཚུལ་ལ་བརྟག་དཔྱད་བྱེད་གལ་ཆེ་བ།

ནང་གི་ཞི་བདེ་ནི་སེམས་ཀྱི་ཞི་བདེ་དང་འབྲེལ་ཡོད་པ་རེད། ཕྱིའི་མྱོང་བས་ང་ཚོའི་སེམས་ཀྱི་ཞི་བདེར་ཕན་གནོད་བྱེད་པའི་ངེས་པ་མེད། ང་ཚོར་སེམས་ཀྱི་ཞི་བདེ་ཡོད་ཚེ། ཕྱི་དངོས་པོ་རྣམས་དེ་ཙམ་གྱིས་གལ་ཆེན་པོ་མིན།

བྱས་ན་ང་ཚོས་སྨོན་ལམ་གྱི་ཐོག་ནས་ནང་གི་ཞི་བདེ་སྐྲུན་དགོས་སམ། དེ་འདྲ་ག་ལ་ཡིན། ཡང་ན་ཕྱིའི་ལུས་ཀྱི་སྦྱོང་བརྡར་གྱི་ཐོག་ནས་ཡོང་ངམ་ཞེ་ན། དེ་ཡང་མ་རེད། ཤེས་བྱ་འཐོབ་པའི་ཐོག་ནས་ཡིན་ནམ་ཞེ་ན། མ་རེད། སོ་སོའི་ཚོར་སྣང་འགོག་གནོན་གཏོང་བའི་ཐོག་ནས་ཡིན་ནམ་ཞེ་ནའང། མ་རེད། འོན་ཀྱང་གནས་སྟངས་དཀའ་ངལ་ཅན་གང་ཡང་རུང་བ་ཞིག་འཕྲད་པའི་དུས། གལ་ཏེ་འབྱུང་སྲིད་པའི་ལས་དེའི་ཕན་གནོད་དང་མཇུག་འབྲས་ཤེས་རྟོགས་ཆ་ཚང་ཐུབ་པའི་རྨང་གཞི་ཞིག་གི་ཐོག་ནས་ང་ཚོས་གནས་སྟངས་ལ་གདོང་ལེན་བྱེད་པ་ཡིན་ན། ང་ཚོའི་སེམས་མི་འཁྲུག་པས། དེ་ནི་དོན་དམ་གྱི་ནང་གི་ཞི་བདེ་ཡིན།

དེས་ན། སྙིང་རྗེ་དང་དོན་དངོས་དང་མཐུན་པའི་ཐབས་ལམ་ནི་ཤིན་ཏུ་གལ་ཆེ། གློ་བུར་གྱི་མཇུག་འབྲས་བྱུང་སྐབས་དེས་སེམས་ལ་དངངས་སྐྲག་ཆེན་པོ་བཟོ་གི་ཡོད་པ་ནི། ང་ཚོ་དོན་དངོས་དང་མི་མཐུན་པའི་དབང་གིས་ཡིན། ང་ཚོས་མཇུག་འབྲས་ལ་བརྟག་དཔྱད་ཞིབ་ཚགས་བྱས་མེད་པར་བརྟེན་དོ་སྣང་དང་ཤེས་རྟོགས་ཀྱིས་མ་འདང་པའི་གནས་ཚུལ་བྱུང་བ་རེད། ང་ཚོའི་སྐྲག་སྣང་དེ་བརྟག་དཔྱད་ཡག་པོ་མ་བྱས་པ་ལས་བྱུང་བ་ཞིག་ཡིན་པས་ང་ཚོས་ཕྱོགས་བཞི་ཀ་ནས་གནས་ཚུལ་ལ་བརྟག་དཔྱད་ཀྱིས་གནས་སྟངས་ཆ་ཚང་ཞིག་འཆར་བ་བྱེད་དགོས། སྣང་ཚུལ་དང་གནས་ཚུལ་གྱི་བར་ལ་བར་སྟོང་ཞིག་རྟག་ཏུ་ཡོད་པ་རེད། དེར་བརྟེན། ང་ཚོས་ཕྱོགས་ཡོངས་ནས་བརྟག་དཔྱད་བྱེད་དགོས་པ་ཡིན།

དངོས་པོ་གང་ཞིག་ལ་བལྟས་པ་ཙམ་གྱིས་དེ་བཟང་ངན་ཅི་ཞིག་ཡིན་མིན་མཐོང་མི་ཐུབ། འོན་ཀྱང་ང་ཚོས་དངོས་པོ་[དེར་བརྟག་དཔྱད་ཞིབ་པར་བྱེད་པ་དང་]དེའི་གནས་ཚུལ་མངོན་སུམ་དུ་རྟོགས་པའི་ཚེ་གཞི་ནས་དེ་བཟང་ངན་ཅི་ཞིག་ཡིན་མིན་དཔོག་ཐུབ་པ་ཡིན། དེ་འདྲ་སོང་ཙང། ང་ཚོས་སོ་སོའི་གནས་སྟངས་ལ་རྒྱུ་མཚན་ལྡན་པའི་ཚོད་དཔག་བྱེད་དགོས། གལ་ཏེ་ང་ཚོས་ཆགས་པའི་དབང་གིས། ང་ལ་གྲུབ་འབྲས་འདི་དང་དེ་དགོས། ཞེས་པའི་ཐོག་ནས་བརྟག་དཔྱད་བྱེད་འགོ་རྩོམ་ཚེ། ང་ཚོའི་དཔྱད་པ་དེ་ཕྱོགས་སུ་ལྷུང་བ་ཡིན། རྒྱ་གར་ནཱལནྡའི་ལུགས་ལས་ང་ཚོས་རྟག་ཏུ་ཆོས་ཀྱིས་གཙོས་པའི་དངོས་པོ་ཐམས་ཅད་ལ་དོན་འགྱུར་གྱི་ཐེ་ཚོམ་དང་དངོས་པོའི་གནས་ལུགས་དང་མཐུན་པའི་སྒོ་ནས་དཔྱད་པ་བྱེད་དགོས་པར་གསུངས་ཡོད།

གཞན་ལ་སེམས་བཟང་པོ་བྱེད་གལ་ཆེ།

སེམས་ཀྱི་ཞི་བདེ་མེད་པ་དང་བློ་ཡིད་མ་ཚིམས་པ་ཞེས་པ་ནི་རང་གཅེས་འཛིན་གྱི་ཀུན་སློང་ཧ་ཅང་ཤུགས་ཆེ་བའི་དབང་གིས་འབྱུང་གི་ཡོད་པ་རེད། གང་ཟག་སོ་སོར་སྔུག་བསྔལ་སྤོང་བ་དང་བདེ་བ་སྒྲུབ་པའི་ཐོབ་ཐང་ཡོད། འོན་ཀྱང་ང་ཚོས་སོ་སོ་རང་ཉིད་གཅིག་པུར་བསམ་བློ་གཏོང་བའི་ཚེ། སེམས་ཤིན་ཏུ་ངན་པར་འགྱུར་བ་ཡིན། དེས་ན། དཀའ་ངལ་ཆུང་ཆུང་ཞིག་ཆེན་པོར་སྣང་ནས་ང་ཚོ་བཏང་སྙོམས་སུ་མི་གནས་པར་འགྱུར། ང་ཚོས་སོ་སོ་རང་ཉིད་ལ་གཅེས་པ་བཞིན་དུ་གཞན་ལའང་དེ་བཞིན་གཅེས་པའི་སེམས་སྐྱེད་ཚེ། སེམས་གུ་ཡངས་པ་དང་རྒྱ་ཆེ་བ་ཡིན། དེའི་འབྲས་བུར་དཀའ་ངལ་ཛ་དྲག་པོ་ཞིག་ཀྱང་དེ་ཙམ་གྱི་གཙིགས་ཆེར་མི་སྣང་བ་ཡིན། བྱས་ཙང། ང་ཚོས་དངོས་པོ་ལ་ལྟ་བའི་ཚུལ་ཏེ། སོ་སོ་རང་ཉིད་ཀྱི་མཐོང་ཕྱོགས་སམ་ཚང་མའི་མཐོང་ཕྱོགས་ཀྱི་ཁྱབ་ཚད་ལ་བརྟེན་པའི་སེམས་ཚོར་ལ་ཁྱད་པར་ཆེན་པོ་ཞིག་ཡོད་པ་རེད།

དེ་འདྲ་སོང་བ་ཡིན་ཙང། སེམས་ཀྱི་ཞི་བདེར་གལ་ཆེ་བའི་ཆ་རྐྱེན་གཉིས་ཡོད་པ་རེད། དང་པོ་ནི། དངོས་ཡོད་གནས་ལུགས་ཤེས་རྟོགས་དགོས་པ་དེ་ཡིན། གལ་ཏེ་ང་ཚོས་དངོས་པོ་ལ་དངོས་པོའི་གནས་ཚུལ་དང་མཐུན་པའི་སྒོ་ནས་གདོང་ལེན་བྱེད་པ་ཡིན་ན། གློ་བུར་གྱི་མཇུག་འབྲས་མི་ཡོང་བ་ཡིན། གཉིས་པ་ནི། སྙིང་རྗེ་ཡིན་པ་དང་། དེ་ནི་ང་ཚོའི་ “ནང་གི་སྒོ་” ཟེར་བ་དེ་འབྱེད་ཀྱི་ཡོད་པ་དང་། གཞན་ལ་བརྟེན་ནས་བྱུང་བའི་ཞེད་སྣང་དང་དོགས་པ་རྣམ་རྟོག་མེད་པ་བཟོ་གི་ཡོད།

ཕྱི་ཚུལ་གྱི་རྣམ་པར་དོ་སྣང་མི་བྱེད་པ།

[ང་ཚོའི་སེམས་ཀྱི་ཞི་བདེ་བརླག་འགྲོ་བའི་རྒྱུ་རྐྱེན་གཞན་ཞིག་ནི་སོ་སོའི་ཕྱི་ཚུལ་གྱི་རྣམ་པར་སེམས་ཁྲལ་བྱེད་པ་དེ་ཡིན།] ངོས་རང་ཐོག་མར་པེ་ཅིང་ (Beijing) ལ་འགྲོ་སྐབས། དཔེར་ན། ངོས་ལ་ཉམས་མྱོང་གང་ཡང་མེད་པ་རེད། ཚ་གི་ཚི་གེ་ཏོག་ཙམ་བྱུང་བ་དང་སེམས་འཚབ་ཀྱང་ཏོག་ཙམ་བྱུང། འོན་ཀྱང་དེ་ནས་ངོས་ནས་མི་ཁ་ཤས་སོ་སོའི་ཕྱི་ཚུལ་རྣམ་པར་དོ་སྣང་ཆེན་པོ་བྱས་ཚེ། གནས་ཚུལ་མི་འགྲིག་པ་འབྱུང་བའི་སྐབས་གདོང་པ་དམར་པོར་འགྱུར་གྱི་ཡོད་པ་མཐོང་བྱུང། དེ་ལྟ་ནའང། གལ་ཏེ་ཁོང་ཚོ་གུ་ཡངས་པོ་དང་མི་འགྲིག་པ་བྱུང་ན་དོ་སྣང་མི་བྱེད་མཁན་ཞིག་ཡིན་ཚེ། དཀའ་ངལ་གང་ཡང་མེད་པ་རེད།

དཔེར་ན། ཕྱི་ལོ་ ༡༩༥༤ ལོར་ངོས་རང་པེ་ཅིང་ལ་ཡོད་པའི་སྐབས་རྒྱ་གར་གྱི་སྐུ་ཚབ་དོན་གཅོད་ངའི་སྡོད་ཁང་དུ་ང་ཐུག་ཏུ་བསླེབས་བྱུང། རྒྱ་མི་ཚོས་མེ་ཏོག་དང་ཤིང་ཏོག་ལ་སོགས་མང་པོ་ཞིག་གྲ་སྒྲིག་བྱས་འདུག་པ་དང། ཁོང་ཚོས་ཨུ་ཚུགས་ཀྱིས་ང་ཚོར་རྒྱ་མའི་སྐད་སྒྱུར་ཞིག་དགོས་ཀྱི་ཡོད་པར་བཤད། བྱས་ཙང་ངོས་ཀྱི་གཞུང་ཞབས་ཁ་ཤས་ནས་དབྱིན་སྐད་ཤེས་ཀྱི་ཡོད་ནའང་། དེ་བོད་སྐད་ནས་རྒྱ་མིའི་སྐད་དང་དེ་ནས་དབྱིན་ཇིའི་སྐད་དུ་བསྒྱུར་བ་རེད། ཕྱོགས་གཅིག་ནས། དང་ཐོག་རྒྱ་མིའི་ལས་བྱེད་པ་ཚོ་གུ་དོག་པོ་དང་ཚུལ་མཐུན་ཞེ་དྲག་ཡོད་ནའང། ཤིང་ཏོག་སྒྲིག་གཤོམ་བྱས་པ་རྣམས་ས་ལ་འཐོར་མ་ཐག་ཁོང་ཚོས་པུས་བཙུགས་ལག་བཙུགས་ཀྱིས་ཞ་ལའི་ཐོག་གོག་འགྲོ་བྱས་སོང། ཁོང་ཚོས་སོ་སོའི་དང་ཐོག་གི་རྣམ་འགྱུར་ལ་དོ་སྣང་བྱས་མེད་ཚེ། དཀའ་ངལ་གང་ཡང་ཡོད་པ་མ་རེད། འོན་ཀྱང་དེ་ནི་ཁོང་ཚོར་ཁ་སྐྱེངས་པོ་ཞེ་དྲག་བྱུང་ཡོད།

ཐེངས་ཤིག་མེག་སི་ཀོ་སཱི་ཊིའི་ (Mexico City) ནང་དུ་ཆོས་ལུགས་ནང་ཁུལ་གྱི་ཚོགས་འདུ་ཞིག་གི་སྐབས་ཉི་ཧོང་ནས་ཡིན་པའི་ཆོས་པ་ཞིག་འདུག ཁོང་གི་ཕྱག་ལ་ཕྲེང་བ་བསྣམས་ཡོད་པ་ལས་ཕྲེང་ཐག་ཆད་སོང། ཕྲེང་རྡོག་རྣམས་ཞ་ལའི་ཐོག་གང་སར་འཐོར་ཡོད་ནའང་ཁོང་གིས་མཛུབ་མོས་ཕྲེང་ཐག་བསྐོར་ནས་བཞུགས་འདུག ཕྲེང་རྡོག་རྣམས་ཡར་སྒྲུག་རྒྱུར་ཁོང་ཞལ་སྐྱེངས་པོ་ཞེ་དྲག་བྱུང་སོང། ཁོང་ལ་མི་བདེ་བ་བྱུང་བའི་རྒྱུ་མཚན་ནི་ཁོང་རང་གི་རྣམ་འགྱུར་ལ་དོ་སྣང་ཆེ་དྲགས་པའི་རྐྱེན་གྱིས་ཡིན།

གང་ལྟར་ཡང། སྙིང་རྗེ་དང། གཞན་ཕན་གྱི་ལྟ་བ། བདེན་པའི་བྱ་བཞག། དྲང་བདེན་བཅས་ནི་ནང་གི་ཞི་བདེ་འདྲེན་རྒྱུར་གལ་འགངས་ཆེ་ཞིང། ཕྱི་ཚུལ་གྱི་རྣམ་འགྱུར་ལ་དོ་སྣང་བྱེད་ཀྱི་མེད། ངོས་རང་གང་ཟག་ཁྱད་པར་ཅན་ཞིག་ཡིན་པར་བརྗོད་ཀྱི་མེད། འོན་ཀྱང་ངོས་རང་གི་ཉམས་མྱོང་ཐོག་ནས་མི་སྟོང་ཕྲག་མང་པོའི་མདུན་དུ་སྤྱོད་ཚུལ་ཇི་ལྟར་འཁྱེར་དགོས་མིན་ཐད་སེམས་ཁྲལ་གང་ཡང་མི་འདུག ངོས་ནས་དེ་རིང་དང་འདྲ་བར་མི་སྟོང་ཕྲག་ཁ་ཤས་ཀྱི་མདུན་དུ་གཏམ་བཤད་བྱེད་ཀྱི་ཡོད་ནའང། ངོས་རང་ལ་མཚོན་ན་མི་ཁ་ཤས་ཤིག་ལ་སྐད་ཆ་ཤོད་ཀྱི་ཡོད་པ་ལྟ་བུ་ཞིག་འདུག ནོར་འཁྲུལ་བྱུང་ཚེ། ངོས་ནས་དེ་ལ་སྣང་མེད་གཏོང་གི་ཡོད། དཀའ་ངལ་གང་ཡང་མི་འདུག གལ་ཏེ་གཞན་གྱི་ནོར་འཁྲུལ་ཤོར་ནའང། ངོས་ནས་གད་མོ་ཙམ་བགད་ནས་སྡོད་ཀྱི་ཡོད།

ནང་སེམས་ཀྱི་འགྱུར་ལྡོག

ནང་སེམས་ཀྱི་འགྱུར་ལྡོག་ལ་མཚོན་ན། ནང་སེམས་ཀྱི་འགྱུར་ལྡོག་ཅེས་པ་དེ་སེམས་ཚོར་གྱི་གནས་བབས་ཤིག་གི་ཐོག་ནས་སྐད་ཆ་ཤོད་ཀྱི་ཡོད། ནང་སེམས་ཀྱི་འགྱུར་ལྡོག་གི་རིགས་གཅིག་ནི་ལོ་རྒས་ནས་རང་བཞིན་གྱིས་འབྱུང་གི་ཡོད་པ་དང་། གཞན་ཞིག་ནི་ཕྱི་རོལ་གྱི་ཁོར་ཡུག་བརྒྱུད་ནས་འོང་ཐུབ། དེ་འདྲ་བའི་འགྱུར་ལྡོག་ནི་རང་འགུལ་གྱིས་འོང་བ་ཞིག་རེད། དེ་མིན་གཞན་ཚང་མ་འབད་རྩོལ་བརྒྱུད་ནས་འོང་གི་ཡོད་པས་དེ་ནི་ང་ཚོར་འོང་འདོད་པའི་དོན་གཙོ་བོ་སྟེ། སོ་སོའི་འདོད་པ་ལ་གཞིགས་པའི་ནང་སེམས་ཀྱི་འགྱུར་ལྡོག་དེ་ཡིན། དེ་ནི་དོན་གྱི་སྙིང་པོ་ཡིན་པ་རེད།

ད་ལྟ་འདིར་ང་ཚོས་སོ་སོའི་སྐྱེ་བ་ཕྱི་མ་དང། ཐར་པའམ་ལྷ་ཡུལ་གྱི་སྐོར་ལ་སྐད་ཆ་ཤོད་ཀྱི་མེད། འོན་ཀྱང་རྙོག་དྲ་དང་དཀའ་ངལ་ལ་མ་ལྟོས་པར་མི་ཚེ་འདི་དེ་ལས་སྐྱིད་པ་དང་ཞི་འཇམ་པ་ཞིག་ཇི་ལྟར་སྐྱོང་ཚུལ་སྐོར་ལ་སྐད་ཆ་ཤོད་ཀྱི་ཡོད། དེ་ལ་ང་ཚོས་གདོང་ལེན་བྱེད་དགོས་པའི་རྐྱེན་ཆེ་ཤོས་སུ་ཁོང་ཁྲོ་དང། ཞེ་སྡང། དངངས་སྐྲག ཕྲག་དོག དོགས་པ་རྣམ་རྟོག། ཁེར་རྐྱང་། སེམས་ངལ་ལ་སོགས་པ་མང་པོ་ཞིག་གཏོགས་ཡོད་པ་རེད། དེ་དག་ཚང་མ་ང་ཚོའི་གཞི་རྩའི་སེམས་ཀྱི་འཁྱེར་སོ་དང་འབྲེལ་བ་ཆགས་ཡོད། དེ་ཚོ་རང་གཅེས་འཛིན་ཤུགས་ཆེ་དྲགས་པ་ལས་འབྱུང་། ང་ཚོར་མཚོན་ན། དེ་རྣམས་མྱོང་བའི་སྐབས་ང་ཞེས་པ་དེ་གལ་ཆེ་ཤོས་ཡིན་པས་དེས་ཕྲ་དོག་འདྲེན་པར་བྱེད་ཀྱི་ཡོད་པ་རེད། ང་ཚོ་སོ་སོ་རང་ཉིད་ལ་གཅེས་པར་འཛིན་པ་དེ་ལས་ཞེ་སུན་ཆུང་ངུ་ཞིག་གིས་ཀྱང་ཁོང་ཁྲོའི་རྐྱེན་བྱེད་པ་དང། ཁོང་ཁྲོས་སྐྲག་སྣང་འདྲེན་པར་བྱེད་ཀྱི་ཡོད། ང་ཚོས་གཞན་ལ་དོ་འཁུར་མི་བྱེད་པར་སོ་སོར་དོ་འཁུར་བྱེད་ཀྱི་ཡོད་པ་རེད། ད་དུང་ང་ཚོའི་སེམས་ལ། གཞན་གྱིས་ཀྱང་ཁོ་རང་ཚོར་དོ་འཁུར་བྱེད་ཅིང་ང་ཚོར་ཏན་ཏན་དོ་འཁུར་བྱེད་མེད་པ་ཚོར་གྱི་ཡོད། རྒྱུ་མཚན་དེ་ལ་བརྟེན་ནས་ཁེར་རྐྱང་གི་ཚོར་སྣང་འབྱུང། ང་ཚོས། “ངས་གཞན་ལ་བསྟེན་མི་ཐུབ།” ཅེས་སེམས་ཀྱི་ཡོད་པ་དང། དེའི་དབང་གིས་ང་ཚོར་སོ་སོའི་མདུན་དུ་ཡོད་པ་དང། གཡས་གཡོན་དུ་ཡོད་པ། ད་དུང་དེ་ལས་མང་བ་རྒྱབ་ལ་ཡོད་པའི་མི་རྣམས་ལ་དོགས་ཟོན་སྐྱེ་བ་ཡིན་ནོ། །

གཞི་རྩའི་ཐོག་ནས་ང་ཚོས་དེའི་ཐོག་ལ་བསམ་བློ་བཏང་བ་ཡིན་ན། འགྲོ་བ་མིའི་རང་བཞིན་དུ་ཚང་མས་མཛའ་གྲོགས་ཀྱི་རང་བཞིན་ལ་བརྩི་མཐོང་བྱེད་ཀྱི་ཡོད། གལ་ཏེ་ང་ཚོས་མཛའ་གྲོགས་ཀྱི་འབྲེལ་བ་ཞིག་ཚུགས་ཐུབ་ཚེ་མི་མང་ཆེ་བས་བཟང་ཕྱོགས་ཀྱི་ལམ་ནས་འབྲེལ་བ་བྱེད་ཀྱི་ཡོད། སེམས་འཚབ་ལ་སོགས་པའི་རྐྱེན་སློང་བྱེད་མཁན་སེམས་ཚོར་ངན་པ་རྣམས་ལ་མཚོན་ན། ང་ཚོས་དེ་དག་ལ་འཇོམས་བྱེད་ཀྱི་གཉེན་པོ་འགའ་བསྟེན་དགོས་པ་ཡིན། དཔེར་ན། གལ་ཏེ་ཚ་དྲགས་ན། ང་ཚོས་ཚ་ཚད་གཅོག་པ་དང་། གལ་ཏེ་སྨག་རུམ་སེལ་འདོད་ན། སྒྲོན་མེ་སྤོར་རྒྱུ་ལས་གཞན་མ་མཆིས། འདི་ནི་ཕྱི་དངོས་པོའི་གནས་ལུགས་རིམ་པའི་ཐོག་ནས་དེ་འགྲིག་ཡོད་པ་སྟེ། འགྱུར་འགྲོས་ནི་ལྡོག་ཕྱོགས་ནས་གཉེན་པོའི་བསྟེན་པ་ལ་བརྟེན་ནས་འོང་གི་ཡོད་ཅིང་། དེ་ནི་རང་བྱུང་ལས་སོ། འོན་ཀྱང་ཕྱི་དངོས་པོའི་གནས་ལུགས་ཀྱི་རིམ་པ་ཙམ་གྱི་ཐོག་ཏུ་མིན་པར་ནང་སེམས་ཀྱི་གནས་ལུགས་རིམ་པའི་ཐོག་ཏུའང་བདེན་པ་ཞིག་རེད། དེ་བས་ན། ང་ཚོས་སོ་སོའི་ལྟ་བའམ་བསམ་ཚུལ་རྣམས་ལ་(དེ་དང་འཇི༹ན་སྟངས་དངོས་འགལ་དུ་སོང་བའི་)གཉེན་པོ་ཞིག་གིས་ཡ་ལན་སྤྲོད་དགོས།[རང་གཅེས་འཛིན་དང་དོགས་པ་རྣམ་རྟོག་གི་གཉེན་པོར་གཞན་གཅེས་འཛིན་དང་མཛའ་གྲོགས་ཀྱི་རང་བཞིན་བསྟེན་པ་ལྟ་བུའོ།]

མེ་ཏོག་སེར་པོ་ཞིག་མཚན་གཞིར་བཞག་སྟེ། གལ་ཏེ་རྒྱུ་རྐྱེན་འགའ་ཞིག་ལ་བརྟེན་ནས་ངས་དེ་དཀར་པོ་རེད་ཅེས་བརྗོད་པ་དང་རྗེས་སུ་དེ་སེར་པོར་ཆ་འཇོག་བྱེད་པ་ཡིན་ན། དེ་ནི་བསམ་ཚུལ་མི་མཐུན་གཉིས་ཆགས་པ་རེད། བསམ་ཚུལ་དེ་གཉི་ག་ལྷན་ཅིག་ཏུ་ཁས་ལེན་མི་ཐུབ། སེར་པོ་ཡིན་པའི་བློ་སྐྱེས་མ་ཐག་དཀར་པོ་ཡིན་པའི་བློ་དེ་མ་ཉིད་དུ་ལྡོག་སྟེ། དེ་གཉིས་དངོས་འགལ་ཡིན་པའི་ཕྱིར། དེར་བརྟེན། ནང་སེམས་ལ་འགྱུར་བ་གཏོང་བའི་ཐབས་ལམ་གཅིག་ནི་དེ་དང་འགལ་ཟླར་འགྱུར་བའི་སེམས་ཞིག་སྐྱེ་དགོས་པ་དེ་ཡིན་ནོ། །

དཀའ་ངལ་གྱི་རྒྱུ་རྐྱེན་གཞན་ཞིག་ནི་རྨོངས་པ་མ་རིག་པ་ཙམ་ཡིན་ངེས། དེའི་གཉེན་པོ་ནི་ཐོས་པ་དང། བསམ་པ་དང་། དཔྱད་ཞིབ་བཅས་ཡིན་པ་རེད། གང་ལགས་ཤེ་ན། རྨོངས་པ་མ་རིག་པ་ནི་དངོས་པོའི་གནས་ལུགས་མ་མཐོང་བ་གཞི་རྩར་བྱས་པ་ཞིག་ཡིན། དེར་བརྟེན། རྨོངས་པ་མ་རིག་པའི་གཉེན་པོ་ནི་དཔྱད་ཞིབ་ཡིན་པ་རེད། དེ་དང་ཕྱོགས་མཚུངས། རང་གཅེས་འཛིན་གྱི་གཉེན་པོོ་ནི་གཞན་གཅེས་འཛིན་ཡིན་པ་དང་དེས་བློ་སྦྱོང་[ངམ་ང་ཚོའི་སེམས་ཀྱི་དྲི་མ་སྦྱོང་ཐབས།]གཏོགས་པ་ཡིན།

ཆོས་དང་མ་འབྲེལ་བའི་བཟང་སྤྱོད།

བློ་ཇི་ལྟར་སྦྱོང་ཚུལ་[ལམ་ང་ཚོའིསེམས་ཀྱི་དྲི་མ་སྦྱོང་ཚུལ་]ལ་མཚོན་ན། དེ་ཆོས་ལུགས་སམ་ཆོས་དང་འབྲེལ་བའི་ཐོག་ནས་བྱེད་དགོས་མིན་དེ་ནི་དྲི་བ་ཞིག་སྟེ། ངོས་རང་གི་བསམ་ཚུལ་ལྟར་ན་གཞི་རྩའི་ཆ་ནས་ཆོས་ལུགས་ཀྱི་ཐོག་ནས་གང་ཡང་བྱེད་དགོས་ཀྱི་མེད།

ཆོས་ལ་མཚོན་ན། དབྱེ་བ་གཉིས་ཡོད་པ་སྟེ། གཅིག་ནི་ཆོས་ལུགས་ཀྱི་དད་པ་དག་སྣང་འབྲེལ་བའི་ཐོག་ནས་ཡིན་པ་དང་གཅིག་ཤོས་ནི་ཆོས་ལུགས་ཀྱི་དད་པ་དག་སྣང་མ་འབྲེལ་བའི་ཐོག་ནས་ཡིན་པའོ། དེ་གཉིས་མེད་པ་ནི་ངོས་ནས་བཤད་པའི་ཆོས་དང་མ་འབྲེལ་བའི་བཟང་སྤྱོད་ཅེས་པ་དེ་ཡིན་པ་རེད། ཆོས་དང་མ་འབྲེལ་བ་ཞེས་པའི་དོན་ནི། ཆོས་ལུགས་ཁས་མི་ལེན་པའི་དོན་མིན་པར། དེ་ལས་ལྡོག་ཏེ་ཆོས་ལུགས་ཚང་མར་བལྟ་སྟངས་མཉམ་པ་དང་དེ་དག་ཚང་མར་གུས་བརྩི་བྱེད་པའི་དོན་ཡིན་ནོ། དཔེར་ན་རྒྱ་གར་གྱི་རྩ་ཁྲིམས་ཀྱིས་ཆོས་ལུགས་ཚང་མར་གུས་བརྩི་ཞུ་གི་ཡོད་པ་སྟེ། ཆོས་དང་མ་འབྲེལ་བའི་རྩ་ཁྲིམས་ཤིག་ཡིན་པ་རེད། དེ་འདྲ་སོང་ཙང། པར་སི་ (Parsi) ཞེས་པའི་ཛོ་ར་སི་ (Zoroastrian) ༼པེར་ཤི་ཡ་ (Persia) ཏེ། གདོད་མའི་ཨི་རན་ (Iran) ལས་དར་བའི་རྒྱ་གར་ནུབ་ཕྱོགས་སུ་ཡོད་པའི་ཆོས་ལུགས་ཤིག༽ སྤྱི་ཚོགས་ནི་རྒྱ་གར་ནང་ཧ་ཅང་ཉུང་ཉུང་སྟེ། ཆོས་ལུགས་དེའི་རྗེས་འཇུག་སྟོང་ཕྲག་བཅུ་ལས་མེད་ཅིང། དེ་ལྟ་ནའང་དམག་དོན་དང་ཆབ་སྲིད་ཀྱི་དཀྱིལ་འཁོར་ནང་ཁོང་ཚོར་འདྲ་མཉམ་གྱི་གོ་གནས་ཡོད་པ་རེད།

ང་ཚོས་ཆོས་དང་མ་འབྲེལ་བའི་བཟང་སྤྱོད་ཐོག་ལ་སྐད་ཆ་ཤོད་པའི་སྐབས་དེས་ཆོས་དད་མེད་མཁན་ཚོ་ལའང་བཟང་སྤྱོད་དགོས་པ་ཤུགས་ཀྱིས་སྟོན་གྱི་ཡོད། ང་ཚོས་བཟང་སྤྱོད་རྒྱ་སྐྱེད་བཏང་ནས་སེམས་ཅན་དུད་འགྲོ་ཚུན་ཆད་ལ་ཆོས་དང་མ་འབྲེལ་བའི་བཟང་སྤྱོད་གཞི་རྩར་བྱས་ནས་གུས་བརྩི་བྱེད་ཐུབ་པ་ཡིན། ད་དུང་ཆོས་དང་མ་འབྲེལ་བའི་བཟང་སྤྱོད་ཀྱི་ཆ་གཞན་ཞིག་ནི། རང་བྱུང་ཁོར་ཡུག་ལ་སྲུང་སྐྱོབ་བྱེད་རྒྱུ་དེ་ཡིན་པ་རེད། བྱས་ཙང་། ང་ཚོས་བཟང་སྤྱོད་ཀྱི་ཐོག་ནས་སོ་སོའི་སེམས་རྒྱུད་སྦྱོང་དགོས་པ་སྟེ། ང་ཚོས་ཆོས་དང་མ་འབྲེལ་བའི་བཟང་སྤྱོད་ཀྱི་བློ་སྦྱོང་དགོས། སའི་གོ་ལ་འདིའི་སྟེང་གི་འགྲོ་བ་མི་ཐེར་འབུམ་དྲུག་གིས་དེ་ལྟར་བྱེད་དགོས་པ་ཡིན། ཆོས་ལུགས་ལམ་ལུགས་ཀྱིས་སྤྱི་ཡོངས་ཀྱི་ཆོས་དང་མ་འབྲེལ་བའི་བཟང་སྤྱོད་གོང་མཐོར་གཏོང་རྒྱུར་ཕན་ཐོགས་བྱེད་ཐུབ་སྟེ། དེ་དག་ནི་དེའི་འཚར་ལོངས་ལ་ཕན་པའི་ཐབས་ལམ་འཕར་མ་ཞིག་ཆགས་ཡོད། དེ་དག་གིས་ངེས་པར་དུ་ཞན་དུ་གཏོང་འདོད་མི་བྱེད་དོ། །

དེར་མ་ཟད། ང་ཚོས་ཆོས་དང་མ་འབྲེལ་བའི་བཟང་སྤྱོད་སྐོར་ལ་སྐད་ཆ་ཤོད་པའི་སྐབས་ཆོས་ལུགས་རིས་མེད་ཀྱི་ལྟ་ཕྱོགས་ཤིག་དགོས་པ་ཡིན། གལ་ཏེ་ཆོས་པ་སུ་ཞིག་གིས་འཇིག་རྟེན་པའི་བཟང་སྤྱོད་གོང་འཕེལ་གཏོང་དོན་དུ་ཆོས་ལུགས་ཀྱི་བྱ་བའི་རིགས་གང་རུང་ཞིག་གི་རྗེས་སུ་འབྲང་གི་ཡོད་ཚེ། ཁོང་ཚོ་ནི་དོན་དམ་གྱི་ཆོས་ཉམས་ལེན་པ་ཡིན། གལ་ཏེ་ཁོང་ཚོས་དེ་ལྟར་མ་བྱས་ཚེ། ཁོང་ཚོས་མཆོད་ཁང་ལྷ་ཁང་ལ་སོགས་པའི་ནང་དུ་འགྲོ་བའི་དབང་དུ་བཏང་ནའང་། ཁོང་ཚོ་ཆོས་ཉམས་ལེན་པ་རྣམ་དག་ཅིག་ཡིན་མིན་ངོས་ལ་དོགས་པ་ཡོད།། །།