བྷར་ཛིན་བཤད་མཛོད།

འབུམ་རམས་པ་ཨེ་ལེག་ཛན་ཌར་བྷར་ཛིན་གྱི་ནང་བསྟན་བཤད་མཛོད།

དྲ་ཤོག་དེའི་ནང་གི་ཡིག་ཐོག་ཅི་ཡོད་ལ་ཁ་ཕོད་པ། ཁ་ལོ་བ་གཙོ་བོར་མཆོངས། ཁ་ལོ་བ་གཙོ་བོར་རྒྱུགས།

དྲ་ཤོག་ངོ་གདོང་། > ནང་ཆོས་ལ་འཇུག་པ། > ནང་ཆོས་ངོ་སྤྲོད། > ཉིན་རེའི་འཚོ་བའི་ནང་ཆོས་ཉམས་ལེན།

ཉིན་རེའི་འཚོ་བའི་ནང་ཆོས་ཉམས་ལེན།

ཨེ་ལེག་ཛན་ཌར། བྷར་ཛིན།
མེག་སི་ཀོ་། མཱོར་རེ་ལི་ཡ། ཕྱི་ལོ་ ༢༠༠༠ ཟླ་ ༦ ཚེས་ ༦ ཉིན།

སྔོན་འགོག་ཐབས་ལམ་དམ་ཆོས།

ཉིན་རེའི་འཚོ་བའི་ནང་གི་ཆོས་ཉམས་ལེན་ཐོག་ང་ལ་སྐད་ཆ་ཤོད་དགོས་པའི་འབོད་སྐུལ་ཞུས་བྱུང། ང་ཚོས་དྷར་མ་ཞེས་པའི་ཐ་སྙད་དེའི་གོ་དོན་ཤེས་དགོས་པ་ཡིན། དྷར་མ་ཞེས་པ་དེ་ལེགས་སྦྱར་གྱི་ཐ་སྙད་ཅིག་ཡིན་ཞིང་། དེའི་སྒྲ་དོན་ནི་སྔོན་འགོག་ཐབས་ལམ་ཞིག་ལ་གོ། དེ་ནི་ང་ཚོས་དཀའ་ངལ་ལས་གཟུར་ཆེད་དུ་བྱེད་པའི་ལས་དོན་ཞིག་ཡིན། ཆོས་ཉམས་ལེན་ལ་དགའ་མོས་འོང་རྒྱུར་ང་ཚོས་འཚོ་བའི་ནང་གྱི་དཀའ་ངལ་རྣམས་མཐོང་དགོས། དོན་དངོས་ཐོག་དེ་ལ་སྙིང་སྟོབས་ཆེན་པོ་ཞིག་དགོས་ཀྱི་ཡོད། མི་མང་པོ་ཞིག་གིས་སོ་སོ་རང་ཉིད་དང་སོ་སོའི་མི་ཚེར་དོ་གལ་དེ་ཙམ་སྤྲོད་ཀྱི་མེད། ཁོང་ཚོས་ཉིན་གང་ལས་ཀར་བརྩོན་པ་དང་དེ་ནས་སྤྲོ་སྐྱིད་སོགས་ལ་བརྟེན་ནས་དགོང་དྲོ་བར་སོ་སོའི་སྣང་བ་གཡེང་ཐབས་བྱེད་ཀྱི་ཡོད་པ་ནི་དོན་དུ་ཁོང་ཚོ་ངལ་དུབ་ཀྱིས་མནར་ཡོད་པ་རེད། ཁོང་ཚོས་སོ་སོའི་མི་ཚེའི་ནང་གི་དཀའ་ངལ་ལ་དངོས་སུ་ཁ་ཕྱོགས་ནས་ལྟ་གི་མེད། གལ་ཏེ་ཁོང་ཚོས་སོ་སོའི་དཀའ་ངལ་རྣམས་ལ་ལྟ་བའི་དབང་དུ་བཏང་ནའང་། སོ་སོའི་མི་ཚེ་ཧ་ཅང་ཡིད་ཐང་ཆད་དགོས་པ་ཞིག་ཡིན་པས་འདོད་བློ་ཁེངས་ངེས་མིན་པ་དེ་དོན་དམ་དུ་ངོས་ལེན་བྱེད་ཀྱི་མེད། སོ་སོའི་མི་ཚེའི་སྤུས་ཚད་ལ་བརྟག་དཔྱད་བྱེད་རྒྱུ་དང་མི་ཚེ་དེ་འདོད་བློ་ཁེངས་ངེས་ཤིག་མེད་པ་མཐོང་བའི་ཚེ་དྲང་བདེན་ཐོག་ནས་ཁས་ལེན་བྱེད་རྒྱུར་སྙིང་སྟོབས་དགོས་པ་ཡིན།

འདོད་བློ་མི་ཚིམ་པའི་གནས་སྟངས་དང་དེ་དག་གི་རྒྱུ་རྐྱེན།

འདོད་བློ་མི་ཁེངས་པའི་ཆ་ལའང་རིམ་པ་ལོས་ཡོད། ང་ཚོས། སྐབས་རེ་ང་ལ་སེམས་མི་སྐྱིད་པ་ཡོང་བ་དང་སྐབས་རེ་གང་ཅིར་ཡག་པོ་ཡོང་གི་འདུག འོན་ཀྱང་དེ་ལ་དཀའ་ངལ་མི་འདུག དེ་ནི་མི་ཚེའི་འགྲོ་སྟངས་རེད། ཅེས་བརྗོད་ངེས། གལ་ཏེ་སོ་སོའི་མི་ཚེར་འདོད་བློ་ཁེངས་ཀྱི་ཡོད་ན་འགྲིག་པ་རེད། གལ་ཏེ་སོ་སོའི་མི་ཚེར་ཡར་རྒྱས་མི་ཉུང་བ་ཞིག་གཏོང་ཐུབ་པའི་རེ་བ་གང་ཙམ་མཆིས་ཚེ། དེས་དེ་ལག་བསྟར་འོང་རྒྱུར་ཐབས་ལམ་འཚོལ་བའི་ལམ་ཞིག་འདྲེན་ངེས། སོ་སོའི་མི་ཚེའི་སྤུས་ཚད་གོང་སྤེལ་གཏོང་བའི་ཐབས་ལམ་འཚོལ་ཆེད་དུ་ང་ཚོས་སོ་སོའི་དཀའ་ངལ་གྱི་འབྱུང་ཁུངས་ངོས་འཛིན་དགོས། མི་མང་པོ་ཞིག་གིས་སོ་སོའི་དཀའ་ངལ་གྱི་འབྱུང་རྩ་ཕྱི་རོལ་དུ་འཚོལ་གྱི་ཡོད། ང་ལ་ཁྱེད་རང་དང་འབྲེལ་ལམ་ཐད་དཀའ་ངལ་འདུག དེ་ཁྱེད་རང་ལ་བརྟེན་ནས་བྱུང་བ་རེད། ཁྱེད་རང་གྱིས་ངའི་འདོད་པ་བཞིན་དུ་བྱེད་ཀྱི་མི་འདུག ཅེས་ཟེར་བ་དང། ད་དུང་ང་ཚོས་སོ་སོའི་དཀའ་ངལ་དེ་བཞིན་ཆབ་སྲིད་དང་དཔལ་འབྱོར་གྱི་གནས་སྟངས་ལ་ཁག་དཀྲི་སྲིད། སེམས་ཁམས་རིག་པའི་སློབ་གཉེར་ཁང་ཁ་ཤས་ལ་གཞིགས་ན། ང་ཚོས་ད་ལྟ་འཕྲད་བཞིན་པའི་དཀའ་ངལ་དེ་རྒྱུ་རྐྱེན་གང་འདྲ་ཞིག་ལ་བརྟེན་ནས་བྱུང་མིན་སོ་སོའི་བྱིས་པའི་སྐབས་ཀྱི་སེམས་ནད་ལ་ཕྱིར་བལྟས་ན་ཆོག སོ་སོ་མི་སྐྱིད་པའི་གནད་དོན་གཞན་ལ་ཁག་དཀྲི་རྒྱུ་ནི་ཧ་ཅང་ལས་སླ་པོ་རེད། གང་ཟག་གཞན་དང་། སྤྱི་ཚོགས། དཔལ་འབྱོར་གྱི་གནད་དོན་ཐོག་ལ་ཁག་དཀྲི་བ་དེས་དོན་དམ་དུ་དཀའ་ངལ་སེལ་རྒྱུར་མི་ཕན། གལ་ཏེ་ང་ཚོར་ལྟ་ཚུལ་གྱི་སྒྲོམ་གཞི་དེ་ཡོད་ན། ང་ཚོར་བཟོད་བསྲན་འོང་ངེས་པ་དང། དེས་ང་ཚོར་ཕན་ཐོགས་ངེས་ཅན་ཞིག་འོང་ངེས། འོན་ཀྱང་མི་ཕལ་མོ་ཆེས་དེ་འདྲ་ཙམ་ཞིག་བགྱིས་པས་སེམས་ཁམས་ཀྱི་དཀའ་ངལ་དང་མི་སྐྱིད་པ་འཇོམས་ཀྱི་མེད་པར་མཐོང།

ནང་ཆོས་ལས། མི་གཞན་དང་། སྤྱི་ཚོགས། དེ་མིན་གྱི་རྐྱེན་མང་པོ་ཞིག་གིས་ང་ཚོའི་དཀའ་ངལ་ཆེ་རུ་གཏོང་གི་ཡོད་ནའང། དེ་རྣམས་རྩ་བའི་རྒྱུ་རྐྱེན་ངོ་མ་མིན་པར་གསུངས། ང་ཚོའི་དཀའ་ངལ་གྱི་རྐྱེན་རྩ་རྙེད་པར་ང་ཚོས་ཁ་ནང་དུཕྱོགས་ནས་འཚོལ་དགོས་པ་ཡིན། དེ་དག་གི་རྗེས་སུ་གལ་ཏེ་ང་ཚོར་མི་ཚེའི་ནང་མི་སྐྱིད་པའི་ཚོར་སྣང་བྱུང་ཚེ། དེ་ནི་ང་ཚོའི་གནས་སྟངས་ལ་བརྡ་ལན་ཞིག་སྤྲད་པ་རེད། གང་ཟག་མི་འདྲ་བས་གནས་སྟངས་གཅིག་ལ་རྣམ་འགྱུར་འདྲ་མིན་དུ་སྟོན་གྱི་ཡོད། གལ་ཏེ་ང་ཚོས་སོ་སོར་དཔྱད་པ་ཡིན་ནའང། དེ་རིང་གི་དཀའ་ངལ་ལ་རྣམ་འགྱུར་སྟོན་སྟངས་དང་སང་ཉིན་གྱི་རྣམ་འགྱུར་སྟོན་སྟངས་ཐ་དད་དུ་ཡོད་པ་ང་ཚོས་ཤེས་ཀྱི་ཡོད། གལ་སྲིད་དཀའ་ངལ་གྱི་འབྱུང་ཁུངས་རྣམས་ཕྱིའི་གནས་སྟངས་ཙམ་ཡིན་ཚེ། ང་ཚོས་དུས་རྟག་ཏུ་རྣམ་འགྱུར་གཅིག་མཚུངས་སུ་སྟོན་དགོས་ནའང་ང་ཚོས་དེ་ལྟར་བྱེད་ཀྱི་མེད། དཔེར་ན་ལས་ཀའི་སྐབས་སུ་ཉིན་མོ་སྐྱིད་པོ་ཞིག་བྱུང་བ་ལྟ་བུ་ནི། རྒྱུ་རྐྱེན་གྱིས་ང་ཚོའི་རྣམ་འགྱུར་སྟོན་ཚུལ་ལ་ཁྱད་པར་བཟོས་པ་ཞིག་ཡིན་ནའང། དེ་དག་ནི་ཕྱི་ཚུལ་གྱི་རྒྱུ་རྐྱེན་སློང་མཁན་ཙམ་དུ་ཟད། དེ་ཚོ་རྒྱུ་རྐྱེན་གྱི་རྩ་བར་ཐུག་གི་མེད།

གལ་ཏེ་ང་ཚོས་སོ་སོ་རང་ཉིད་ལ་དཔྱད་ཚེ། མི་ཚེར་ཕྱོགས་པའི་ང་ཚོའི་ལྟ་སྟངས་དང་ང་ཚོའི་གནས་སྟངས་ཀྱིས་སོ་སོའི་ཚོར་སྣང་སྐྱེ་ཚུལ་ལ་ཁྱད་པར་ཆེན་པོ་བཟོ་གི་ཡོད་པ་མཐོང་འགོ་ཚུགས། དཔེར་ན། ང་ཚོར་ཉིན་མོ་སྐྱིད་པོ་ཞིག་བྱུང་བའི་སྐབས་རྟག་ཏུ་སོ་སོ་རང་ཉིད་ལ་བློ་ཕམ་གྱི་ཚོར་སྣང་སྐྱེ་གི་མེད་ཅིང། འོན་ཀྱང་ང་ཚོར་ཉིན་མོ་སྐྱིད་པོ་ཞིག་མ་བྱུང་བའི་སྐབས་སོ་སོ་རང་ཉིད་ལ་ཡ་ང་སྙིང་རྗེའི་ཚོར་སྣང་བསྐྱར་དུ་འབྱུང། མི་ཚེར་ཕྱོགས་པའི་ང་ཚོའི་གཞི་རྩའི་བལྟ་སྟངས་དེས་སོ་སོའི་མི་ཚེ་མྱོང་ཚུལ་ལ་བཟོ་བཅོས་ཤུགས་ཆེ་བྱེད་ཀྱི་ཡོད། གལ་ཏེ་ང་ཚོས་དེ་ལས་ཞིབ་ཏུ་དཔྱད་ཚེ། ང་ཚོའི་ལྟ་སྟངས་རྣམས་ཐེ་ཚོམ་གཞི་རྩར་བྱས་པར་ཤེས་ཐུབ།

དཀའ་ངལ་གྱི་འབྱུང་རྩ་ཐེ་ཚོམ།

གལ་ཏེ་ང་ཚོས་ཐེ་ཚོམ་ལ་དཔྱད་ན། དེའི་གནས་སྟངས་གཅིག་ནི་སྤྱོད་ལམ་གྱི་རྒྱུ་དང་འབྲས་བུའི་ཐེ་ཚོམ་ཞིག་ཡིན། ང་ཚོར་གང་ཞིག་བྱེད་དགོས་པའམ་ཤོད་དགོས་པ་དང་དེའི་འབྲས་བུ་ཞིག་འབྱུང་མིན་ཐད་ལ་ཐེ་ཚོམ་སྐྱེ། ང་ཚོར་ལས་ཀ་ཅི་འདྲ་ཞིག་རག་མིན་དང། གཉེན་སྒྲིག་བྱེད་དགོས་མིན། ཕྲུ་གུ་སྐྱེ་དགོས་མིན་སོགས་མང་པོ་ཞིག་གི་ཐད་ཐེ་ཚོམ་སྐྱེ་ངེས་ཡིན། གལ་ཏེ་མི་ཞིག་དང་དགའ་ཉེའི་འབྲེལ་བ་ཚུགས་ན། དེའི་རྗེས་སུ་ཅི་ཞིག་འོང་སྲིད་དམ། ང་ཚོས་ཤེས་ཀྱི་མེད། སོ་སོའི་འདམ་གའི་རྗེས་སུ་ཅི་ཞིག་འོང་མིན་གྱི་བསམ་བློ་ནི་དོན་དངོས་སུ་འཆར་སྣང་ (fantasies) ཙམ་ཞིག་ཏུ་མཆིས། གལ་ཏེ་ང་ཚོ་གང་ཟག་ངེས་ཅན་ཞིག་དང་འབྲེལ་བ་དམ་ཟབ་ཚུགས་ན། ཕལ་ཆེར་ང་ཚོའི་སེམས་ནང། ལྷའི་རྟོག་སྒྲུང་ནང་དུ་ཡོད་པ་བཞིན་མི་ཚེ་སྐྱིད་པོ་ཞིག་མཐར་སྐྱེལ་བྱེད་རྒྱུ་འཆར་སྲིད། གལ་ཏེ་ང་ཚོ་གནས་སྟངས་ཤིག་གི་ནང་མི་སྐྱིད་པ་བྱུང་ཚེ། སྐད་ངན་ (yelling) གྱིས་གནས་སྟངས་དེ་ཇེ་བཟང་གཏོང་གི་ཡོད་པར་སེམས། ང་ཚོར་ཤིན་ཏུ་ནས་མགོ་རྙོག་པའི་བསམ་ཚུལ་ཞིག་ཡོད་པ་ནི། སོ་སོས་གང་ཞིག་བྱས་པ་དེར་གཞན་གྱིས་རྣམ་འགྱུར་ཇི་ལྟར་སྟོན་མིན་དེ་ཡིན། གལ་ཏེ་ང་ཚོས་སྐད་ངན་རྒྱག་པ་དང་སེམས་ནང་གི་སྐད་ཆ་ཕྱིར་བཤད་ན། ང་ཚོར་བདེ་ཉམས་ཚོར་བ་དང་ཐམས་ཅད་འགྲིག་འགྲོ་བའི་བསམ་བློ་ཞིག་ང་ཚོའི་སེམས་ནང་འཆར་གྱི་ཡོད་ནའང། དེ་ལྟར་འོང་གི་མེད། རྗེས་སུ་ཅི་ཞིག་ཡོང་མིན་ང་ཚོར་ཤེས་འདོད་ཡོད། ང་ཚོས་འ་ཆད་འུ་ཐུག་གིས་སྐར་རྩིས་ལ་ལྟ་བའམ་རྒྱ་ལུགས་སྤར་ཁ་སྟེ། མོ་དེབ་ནང་ཊམ་ཀ་འཕེན་གྱི་ཡོད། རྒྱུ་མཚན་ཅི་ཞིག་ལ་བརྟེན་ནས་ང་ཚོས་དེ་ལྟར་བྱེད་ཀྱི་ཡོད་དམ། ཅི་ཞིག་འབྱུང་བར་སྟངས་འཛིན་བྱ་འདོད་ང་ཚོར་ཡོད་པས་སོ། །

ནང་ཆོས་ལས། གཏིང་ཟབ་པའི་ཐེ་ཚོམ་ནི་ང་ཚོ་དང་གཞན་སེམས་ཅན་ཇི་ལྟར་འཚོ་མིན་དང་འཛམ་གླིང་གི་གནས་ལུགས་ཐོག་གི་ཐེ་ཚོམ་ཡིན་པར་གསུངས། སྟངས་འཛིན་གྱི་གནད་དོན་ཡོངས་ཀྱི་ཐོག་ང་ཚོར་ཐེ་ཚོམ་སྐྱེ་གི་ཡོད། ང་ཚོའི་སེམས་ནང་ང་ཚོར་ཅི་ཞིག་བྱུང་བར་ཡོངས་སུ་ཁ་ལོ་སྒྱུར་ཐུབ་སྲིད་པའི་བསམ་བློ་འཁོར་གྱི་ཡོད། དེ་ནི་དོན་དངོས་དང་མཐུན་གྱི་མེད། དོན་དངོས་ནི་རྙོག་འཛིང་ཅན་ཞིག་རེད། ང་ཚོས་ཅི་ཞིག་བྱེད་པ་ཙམ་མིན་པར་ཅི་ཞིག་འབྱུང་མིན་ལ་གནད་དོན་མང་པོ་ཞིག་གིས་རྐྱེན་སློང་བྱེད་ཀྱི་ཡོད། དེ་ནི་ང་ཚོས་སྟངས་འཛིན་གང་ཡང་མི་ཐུབ་པའམ་ཕྱི་རོལ་སྟོབས་ཤུགས་ཀྱིས་ཤུགས་རྐྱེན་བྱས་པ་གང་ཡང་མིན། ཅི་ཞིག་འབྱུང་མིན་ལ་ང་ཚོས་ཆ་རྐྱེན་སྐྲུན་གྱི་ཡོད། འོན་ཀྱང་ཅི་ཞིག་འབྱུང་མིན་ཐད་ཐག་གཅོད་བྱེད་མཁན་གྱི་རྒྱུ་རྐྱེན་ལྟེ་བ་དེ་ང་ཚོ་མ་ཡིན་ནོ། །

ང་ཚོའི་ཐེ་ཚོམ་དང་ཉེན་སྲུང་མེད་པ་ (insecurity) ལ་བརྟེན་ནས་ང་ཚོས་སོ་སོའི་སྤྱོད་ཚུལ་དེ་གནོད་འཚེ་ཅན་ཡིན་པ་ཧ་མ་གོ་བར་རྟག་ཏུ་གནོད་ཚེ་ཅན་གྱི་བྱ་སྤྱོད་སྤེལ་གྱི་ཡོད་པ་རེད། དེའི་རྒྱུ་མཚན་ནི། ང་ཚོ་སེམས་ཚོར་ངན་པ་དང་བསམ་ཕྱོགས་ངན་པའི་ཤུགས་རྐྱེན་འོག་ཏུ་ཡོད་པ་དང། ང་ཚོའི་གོམས་གཤིས་ལས་རྒྱ་ཡན་དུ་ཤོར་བའི་སེམས་ཀྱི་གཡོ་འགུལ་འཐོན་གྱི་ཡོད་པས་བྱས་སོ། ང་ཚོས་གཞན་ལ་གནོད་པའི་བྱ་སྤྱོད་སྤེལ་བ་ཙམ་མ་ཟད་སྤྱིར་སོ་སོ་རང་ཉིད་ལ་གནོད་པའི་བྱ་སྤྱོད་སྤེལ་གྱི་ཡོད། ཚིག་གཞན་ཞིག་སྤྱད་ན། ང་ཚོས་སོ་སོ་རང་ཉིད་ལ་དཀའ་ངལ་མང་བ་བཟོ་གི་ཡོད། གལ་ཏེ་ང་ཚོར་དཀའ་ངལ་ཉུང་ཉུང་ངམ་སོ་སོའི་དཀའ་ངལ་ལས་འགྲོལ་འདོད་པ་དང། ད་དུང་དེ་ལས་བརྒལ་ནས་མི་གཞན་ཡང་དཀའ་ངལ་ལས་འགྲོལ་རྒྱུར་རོགས་ཕན་ཐུབ་པའི་འཇོན་ཐང་དགོས་འདོད་ཡོད་ཚེ། ང་ཚོས་སོ་སོའི་ནུས་ཚད་ཀྱི་འབྱུང་ཁུངས་ངོས་ལེན་བྱེད་དགོས་པ་ཡིན།

སོ་སོ་རང་ཉིད་ཀྱི་ཐེ་ཚོམ་སེལ་བ།

ང་ཚོས་སོ་སོའི་དཀའ་ངལ་གྱི་འབྱུང་ཁུངས་དེ་ཐེ་ཚོམ་ཡིན་པར་ངོས་འཛིན་ཐུབ་ཀྱི་ཡོད་པར་བཤད་ན་ཆོག དེ་ནི་ཤིན་ཏུ་དཀའ་བ་ཞིག་མིན། མི་མང་པོ་ཞིག་གིས། ང་དངོས་གནས་ཐེ་ཚོམ་ནང་ཚུད་སོང། ང་དཀའ་ངལ་ནང་ལྷུང་སོང། ཞེས་ཟེར་བའི་མཚམས་སུ་སླེབས་ཡོད། བྱས་ན་ག་རེ་བྱེད་དགོས་སམ། བསྙེན་མཚམས་སམ་སློབ་ཚན་དེའི་ཐོག་འགྲོ་བ་དང་འགྲོ་གྲོན་མ་བཏང་གོང་དུ་ང་ཚོས་སོ་སོའི་ཐེ་ཚོམ་སེལ་ཐུབ་སྲིད་པའི་ཡིད་ཆེས་དངོས་སུ་སྟེར་གྱི་ཡོད་མེད་ནན་ཏན་གྱི་ཐོག་ནས་བསམ་ཞིབ་བྱེད་དགོས་པ་ཡིན། གལ་ཏེ་ཐེ་ཚོམ་སེལ་ཐུབ་པ་སེམས་ལ་མི་འཆར་ཚེ། ང་ཚོས་ཅི་ཞིག་བྱེད་ཐབས་བྱེད་ཀྱི་ཡོད་དམ། གལ་ཏེ་ང་ཚོས་སོ་སོའི་ཐེ་ཚོམ་སེལ་ཐུབ་པའི་རེ་བ་ཞིག་ཁོ་ནར་བརྟེན་ནས་འགྲོ་གི་ཡོད་ཚེ། དེ་ནི་ཤིན་ཏུ་བརྟན་པོ་ཞིག་ག་ལ་ཡིན། དེ་ནི་རེ་འདོད་ཀྱི་བསམ་ཕྱོགས་ཤིག་རེད།

ང་ཚོས་ཕལ་ཆེར་རང་དབང་ཞེས་པ་དེ་ཐབས་ལམ་འགའ་ཞིག་གི་ཐོག་ནས་འོང་གི་ཡོད་པར་སེམས་སྲིད། ང་ཚོས་ཕལ་ཆེར་གང་ཟག་གང་ཡང་རུང་བ་ཞིག་གིས་ང་ཚོ་སྐྱོབ་སྲིད་པར་སེམས་སྲིད་ཅིང་། དེ་ཡང་སོ་སོ་ལས་མཐོ་བའི་ལྷའི་རྣམ་པ་སྟེ། དཀོན་མཆོག་ལྟ་བུ་ཡིན་པར་འདོད་པ་དང། དེ་ལ་བརྟེན་ནས་ང་ཚོ་དད་སེམས་ཆེ་བའི་དད་ལྡན་པ་ཆགས་པར་སེམས་སྲིད། དེ་མིན་སོ་སོའི་ཐེ་ཚོམ་ལས་སྐྱོབ་ཆེད་ང་ཚོས་ཆོས་ཕྱོགས་ཀྱི་དགེ་རྒན་ཞིག་གམ་ཆོས་གྲོགས་ཤིག ཡང་ན་གང་ཟག་ཅི་ཡང་རུང་བ་འཚོལ་སྲིད། གནས་སྟངས་དེ་འདྲའི་སྐབས་སུ་གང་ཟག་གཞན་ལ་བརྟེན་མཁན་དུ་འགྱུར་སླ་བ་དང་ན་ཚོད་མ་ཟིན་པའི་ (immaturely) སྤྱོད་ཚུལ་དུ་འགྱུར་སླ་བས། ང་ཚོས་རྒྱུན་དུ་འ་ཆད་འུ་ཐུག་གིས་སོ་སོ་འགྱུར་ཟིན་པའི་ནང་སྣང་མེད་དུ་སྐྱུར་བ་ལས་སྐྱོབ་ཆེད་གང་ཟག་ཞིག་འཚོལ་གྱི་ཡོད། ང་ཚོས་ཐེ་ཚོམ་ལས་མ་བྲལ་བའི་གང་ཟག་ཞིག་འདེམས་སྲིད་པ་དང་ཁོའམ་མོས་སོ་སོའི་སེམས་ཚོར་ངན་པ་དང་བསམ་ཕྱོགས་ངན་པར་བརྟེན་ནས་ང་ཚོའི་བཅོས་མིན་གཞན་བརྟེན་ (naive dependence) གྱི་ཁེ་ཕན་ལེན་གྱི་ཡོད། དེ་ནི་མཇུག་སྐྱོང་བྱེད་པའི་ལམ་བརྟན་པོ་ཞིག་མིན། ང་ཚོས་སོ་སོའི་ཐེ་ཚོམ་ཡོངས་རྫོགས་སེལ་ཆེད་དུ་ཆོས་ཕྱོགས་ཀྱི་དགེ་རྒན་ཞིག་གམ་འབྲེལ་བ་ཞིག་འཚོལ་མི་ཐུབ། ང་ཚོས་སོ་སོ་རང་ཉིད་ཀྱི་ཐེ་ཚོམ་སེལ་དགོས།

ཆོས་ཕྱོགས་ཀྱི་དགེ་རྒན་ཞིག་གམ་ཟླ་བོ་ཞིག་དང་ལྷན་དུ་ཡོད་པའི་འབྲེལ་བ་ཞིག་གིས་ཕན་ནུས་ལྡན་པའི་གནས་སྟངས་ཤིག་མཁོ་སྤྲོད་ཐུབ། འོན་ཀྱང་འབྲེལ་བ་དེ་ལྷད་མེད་ཅིག་ཡིན་པའི་སྐབས་ཁོ་ནར་འོང་བ་ཡིན། དེ་ལ་ལྷད་ཡོད་ཚེ་གནས་སྟངས་ཇེ་སྡུག་ཏུ་གཏོང་གི་ཡོད། དེས་ཐེ་ཚོམ་ཆེ་རུ་གཏོང་བ་ཡིན། ཐོག་མར་ང་ཚོས་སོ་སོའི་དགེ་རྒན་ཡང་དག་པ་དང་ཟླ་བོ་ཡང་དག་པ་ཡིན་པར་སེམས་བཞིན་དུ་དེ་ལས་གཞན་དུ་ཁས་མི་ལེན་པའི་དགག་བྱ་གཏིང་ཚུགས་པ་ཞིག་ཏུ་གནས་ཐུབ་ནའང། རིམ་བཞིན་ང་ཚོའི་བཅོས་ལྷད་བྲལ་བའི་རང་བཞིན་ལ་མདོག་གྱུར་གྱི་ཡོད། ང་ཚོས་གང་ཟག་གཞན་གྱི་ཞན་ཆ་དང་གཞན་གྱིས་སོ་སོའི་ཐེ་ཚོམ་ཡོངས་རྫོགས་སེལ་རྒྱུ་མིན་པར་མཐོང་འགོ་ཚུགས་པའི་སྐབས་གདོང་ཐུག་བྱེད་ཀྱི་ཡོད། ང་ཚོར་བསླུ་བྲིད་བྱས་པའི་ཚོར་སྣང་ཡོང་གི་ཡོད། ང་ཚོ་དད་པ་དང་ཡིད་ཆེས་ཀྱིས་བསླུས་པ་རེད། དེ་ནི་ཚོར་སྣང་ཞེ་སྐྲག་ཚ་པོ་ཞིག་རེད། ཐོག་མ་ཉིད་ནས་དེར་གཟུར་རྒྱུའི་ (avoid) འབད་རྩོལ་བསྟེན་རྒྱུ་ནི་གལ་འགངས་ཤིན་ཏུ་ཆེ། ང་ཚོས་སྔོན་འགོག་ཐབས་ལམ་གྱི་ཚུལ་དུ་དམ་ཆོས་ཉམས་ལེན་བྱེད་དགོས་པ་ཡིན། གང་ཞིག་ཐུབ་པ་དང་གང་ཞིག་མི་ཐུབ་པ་ང་ཚོས་ཤེས་རྟོགས་ཐུབ་དགོས། ཆོས་ཕྱོགས་དགེ་རྒན་གྱིས་ཅི་ཞིག་སྒྲུབ་ཐུབ་པ་དང་ཅི་ཞིག་སྒྲུབ་མི་ཐུབ་བམ། གདོང་ཐུག་ལས་གཡོལ་ཆེད་ང་ཚོས་སྔོན་འགོག་ཐབས་ལམ་ལག་བསྟར་བྱེད་དགོས་སོ། །

ང་ཚོས་ཐེ་ཚོམ་བྲལ་བའི་སེམས་ཀྱི་གནས་སྐབས་ཤིག་གོང་སྤེལ་གཏོང་དགོས། ཐེ་ཚོམ་གྱི་འགལ་བ་ཤེས་རྟོགས་ཀྱིས་ཐེ་ཚོམ་སྐྱེ་བའི་མགོ་གནོན་བྱེད། ང་ཚོའི་ཆོས་བྱེད་ཚུལ་དེ་སོ་སོའི་བསམ་ཕྱོགས་དང་། སེམས་ཚོར་ངན་པ། རྒྱ་ཡན་དུ་ཤོར་བའི་སེམས་ཀྱི་གཡོ་བའམ་དབང་རྩ་འཁྲུགས་པའི་སྤྱོད་ཚུལ་ལ་ཁ་ནང་བལྟས་ཀྱི་དཔྱད་པ་དང་དོ་སྣང་ཆེན་པོ་དགོས་པ་ཡིན། དེའི་དོན་ནི་སོ་སོ་རང་ཉིད་ནས་ཡིད་དུ་མི་འོང་ཞིང་ཁས་ལེན་མི་ཐུབ་པའི་གནས་རྣམས་མཐོང་འདོད་ཡོད་པ་ཞིག་དགོས། ང་ཚོས་སོ་སོའི་དཀའ་ངལ་རྐྱེན་སློང་བྱེད་བཞིན་པའི་གནས་སམ་སོ་སོའི་དཀའ་ངལ་གྱི་མཚན་མར་དོ་སྣང་བྱུང་བའི་ཚེ། དེ་དག་འཇོམས་བྱེད་ཀྱི་གཉེན་པོ་སྤྱོད་དགོས། དེ་དག་ཚང་མ་སློབ་སྦྱོང་དང་སྒོམ་ཉམས་ལེན་གཞི་རྩར་བྱེད་ཀྱི་ཡོད། ང་ཚོས་སེམས་ཚོར་དང་བསམ་ཕྱོགས་ངན་པ་ངོས་འཛིན་དང་དེ་གང་ལས་བྱུང་བ་ཤེས་རྟོགས་བྱེད་དགོས་པ་ཡིན་ནོ། །

སྒོམ་སྒྲུབ།

སྒོམ་གྱི་དོན་ནི། ང་ཚོས་སྟངས་འཛིན་བྱས་པའི་གནས་སྟངས་ཤིག་གི་ནང་ཁ་གཏད་སྣ་ཚོགས་སྤྱོད་རྒྱུ་ཉམས་སུ་བླངས་ཏེ་དེ་དག་སྤྱོད་ཚུལ་ལ་གོམས་འདྲིས་ཆགས་པ་དང་དེ་ནས་མི་ཚེ་ངོ་མའི་ནང་ལག་བསྟར་བྱེད་ཐུབ། དཔེར་ན། གལ་ཏེ་གང་ཟག་གཞན་གྱིས་སོ་སོའི་འདོད་མོས་ལྟར་མ་བྱས་ཚེ་དེ་ལ་དམིགས་ནས་ཁོང་ཁྲོ་ལངས་པ་ཡིན་ན། སྒོམ་གྱི་ནང་ང་ཚོས་གནས་སྟངས་དེ་དག་ལ་བསམ་བློ་གཏོང་བ་དང་དེ་དག་ལ་བསམ་ཚུལ་འདྲ་མིན་ཞིག་ནས་དཔྱོད་རྒྱུའི་འབད་རྩོལ་བསྟེན་གྱི་ཡོད། གང་ཟག་གཞན་གྱིས་རྒྱུ་མཚན་འདྲ་མིན་མང་པོར་བརྟེན་ནས་བློར་མི་འགྲོ་བའི་བྱ་སྤྱོད་སྤེལ་གྱིན་ཡོད། ཁོའམ་མོས་ང་ཚོར་མི་དགའ་བ་རྒྱུ་མཚན་དུ་བྱས་ནས་བྱ་སྤྱོད་སྤེལ་གྱིན་ཡོད་པའི་ངེས་པ་མེད། སྒོམ་གྱི་ནང་། ང་ཚོས་ལྟ་སྟངས་དེ་ལྟ་བུ་སྟེ། ད་ནས་ངའི་གྲོགས་པོས་ང་ལ་དགའ་པོ་བྱེད་མི་འདུག གང་ལ་ཞེ་ན། ཁོའམ་མོས་ང་ལ་ཁ་པར་བཏང་མ་བྱུང། ཞེས་པ་ལ་སོགས་པ་མཇུག་བསྡུ་བའི་འབད་རྩོལ་བསྟེན་གྱི་ཡོད།

གལ་ཏེ་ང་ཚོས་གནས་སྟངས་དེ་རིགས་བརྒྱུད་པའི་སྐབས་སེམས་གྱི་གནས་སྐབས་དེ་བཞིན་ལྷོད་པོ་དང། གོ་རྟོགས་ལྡན་པ། བཟོད་བསྲན་ཅན་ཞིག་ཏུ་ཉམས་ལེན་བྱེད་ཐུབ་ཚེ། སོ་སོའི་གྲོགས་པོ་ཞིག་གིས་བདུན་ཕྲག་གཅིག་གི་རིང་ཁ་པར་མ་བཏང་ཀྱང་ང་ཚོར་ཁོང་ཁྲོའི་སེམས་སྐྱེ་གི་མེད། ང་ཚོར་ཁྲོ་སེམས་སྐྱེ་འགོ་ཚུགས་པའི་སྐབས་གང་ཟག་དེར་ལས་བྲེལ་ཤིན་ཏུ་ཆེན་པོ་ཡོད་སྲིད་པར་དྲན་པ་དང་། ང་ཚོ་གང་ཟག་དེའི་མི་ཚེའི་ནང་གལ་འགངས་ཆེ་ཤོས་ཀྱི་མི་ཡིན་སྙམ་པའི་བསམ་བློ་ནི་བདག་གཅེས་འཛིན་ཡིན་པར་དྲན་གྱི་ཡོད། དེས་ང་ཚོའི་ཁྲོ་སེམས་འཇོམས་པར་ཕན་ཐོགས་བྱེད་ཀྱི་ཡོད་པ་རེད།

དམ་ཆོས་ནི་དུས་ཡུན་ཧྲིལ་པོའི་འཚོ་ཐབས་ཤིག་ཡིན།

དམ་ཆོས་ཉམས་ལེན་ནི་དགའ་མོས་ཡོད་པའི་ཞོར་ལས་ཤིག་མ་རེད་ལ། དེ་ནི་ལུས་རྩལ་གྱི་ཚུལ་དུའམ་བག་ཡངས་ཆེད་དུ་བྱེད་རྒྱུའི་རིགས་ཤིག་ཀྱང་མིན། ང་ཚོས་ཆོས་ཚོགས་སུ་ཚོགས་པ་ཞིག་གི་ཁོངས་སུ་གཏོགས་པའི་ཆ་ནས་སམ་སྤྱི་ཚོགས་ཀྱི་དཀྱིལ་འཁོར་ཞིག་གི་ནང་འཚུད་རྒྱུའི་དོན་དུ་འགྲོ་གི་མེད། དེར་ཕྱིན་ན་སྐྱིད་པོ་ཡོད་སྲིད། འོན་ཀྱང་དེ་ནི་དམིགས་ཡུལ་མ་རེད། མ་ཟད་ང་ཚོས་ཆོས་ཚོགས་སུ་དུག་རྫས་ལ་ལངས་ཤོར་བ་ལྟ་བུ་སྟེ། སོ་སོ་སྐྱིད་པོ་བཟོ་མཁན་གྱི་དགེ་རྒན་ཡིད་དབང་འགུགས་ནུས་ཀྱི་ཁྱད་ཆོས་དང་སྤྲོ་སྣང་སྐྲུན་ནུས་ཀྱི་ཁྱད་ཆོས་ལྡན་པ་ལས་སེམས་སྐུལ་གྱི་ཆགས་སེམས་ཀྱི་ཐོག་ནས་འགྲོ་གི་མེད། གལ་ཏེ་ང་ཚོས་དེ་ལྟར་བྱས་ཚེ་ང་ཚོ་ཁྱིམ་དུ་ལོག་རྗེས་མྱུར་དུ་ཆོ་མེད་དུ་ཚོར་བ་དང། དེ་ནས་ང་ཚོར་སེམས་ཆགས་ཡུལ་གཞན་ཞིག་དགོས། དམ་ཆོས་ནི་དུག་རྫས་ཤིག་མིན་ལ། དགེ་རྒན་རྣམས་ཀྱང་དུག་རྫས་མ་རེད། དམ་ཆོས་ཉམས་ལེན་ནི་དུས་ཡུན་ཧྲིལ་པོའི་ལས་ཀ་ཞིག་ཡིན། ང་ཚོས་སོ་སོའི་མི་ཚེའི་ནང་གི་བྱ་དངོས་ཅི་རིགས་ཀྱི་ཐད་སོ་སོའི་ལྟ་སྟངས་ཀྱི་ཐོག་ལ་ཤུགས་རྒྱག་གི་ཡོད་པའི་སྐོར་ལ་སྐད་ཆ་ཤོད་བཞིན་ཡོད། གལ་ཏེ་ང་ཚོས་སེམས་ཅན་ཐམས་ཅད་ལ་བརྩེ་བའི་སེམས་གོང་སྤེལ་གཏོང་བའི་ཐོག་ནུས་པ་འདོན་གྱི་ཡོད་ཚེ། དཔེར་ན། ང་ཚོས་དེ་སོ་སོའི་ཁྱིམ་ཚང་ནང་ལག་བསྟར་བྱེད་དགོས་པ་ཡིན། མི་མང་པོ་ཞིག་གིས་སོ་སོའི་ཉལ་ཁང་ནས་བསྡད་ནས་བརྩེ་བའི་ཐོག་སྒོམ་རྒྱག་གི་ཡོད་ནའང། སོའི་ཕ་མའམ་ཁྱིམ་ཐབ་དང་ལྷན་དུ་འཆམ་མཐུན་བྱེད་ཐུབ་ཀྱི་མེད། དེ་ནི་སེམས་སྐྱོ་དགོས་པའི་གནད་དོན་ཞིག་རེད།

མཐའ་གཉིས་སྤོང་བ།

ཁྱིམ་དང་ལས་ཀའི་སྐབས་ཀྱི་སོ་སོའི་མི་ཚེའི་གནས་སྟངས་ངོ་མར་དམ་ཆོས་ཉམས་སུ་ལེན་པའི་འབད་བརྩོན་བསྟེན་པའི་དུས་ང་ཚོས་མཐའ་གཉིས་སྤོང་དགོས་པ་ཡིན། མཐའ་གཅིག་ནི། གཞན་གྱི་ཐོག་ཏུ་སྐྱོན་ཆ་ཡོངས་རྫོགས་འགེལ་བ་དེ་ཡིན། མཐའ་གཞན་ནི། དེ་དག་སོ་སོའི་ཐོག་ཏུ་འགེལ་རྒྱུ་དེ་ཡིན་པ་རེད། ང་ཚོའི་མི་ཚེའི་ནང་གང་བྱུང་བ་ནི་ཧ་ཅང་གིས་རྙོག་འཛིང་ཅན་ཞིག་རེད། ཕྱོགས་གཉིས་ཀས་རྐྱེན་སློང་བྱེད་ཀྱི་ཡོད་པ་སྟེ། གཞན་གྱིས་རྐྱེན་སློང་བྱེད་ཀྱི་ཡོད་ལ། ང་ཚོས་ཀྱང་རྐྱེན་སློང་བྱེད་ཀྱི་ཡོད། ང་ཚོས་གཞན་གྱི་སྤྱོད་ཚུལ་དང་བསམ་ཚུལ་འགྱུར་བ་གཏོང་རྒྱུའི་འབད་རྩོལ་བྱེད་བྱས་ནའང། ང་ཚོ་ཚང་མའི་མྱོང་བ་ལས་གྲུབ་པ་ལྟར་དེ་ནི་ཧ་ཅང་དཀའ་བའི་གནས་ཏེ། དམིགས་བསལ་དུ་གལ་སྲིད་ང་ཚོས་སོ་སོ་རང་ཉིད་སྐྱོན་མེད་སྐྱེས་བུ་དམ་པའི་ངོ་བོར་བརྫུས་པ་དང་གཞན་ལ་སྡིག་ཉེས་ཅན་དུ་སྐྱོན་འཛུགས་བྱས་པ་ལྟ་བུའི་ཐོག་ནས་ཡོང་གི་ཡོད། སོ་སོ་རང་ཉིད་ལ་འགྱུར་བ་གཏོང་རྒྱུའི་འབད་རྩོལ་བསྟེན་རྒྱུ་དེ་ལས་སླ། གལ་ཏེ་གང་ཟག་གཞན་རྣམས་ང་ཚོའི་བསམ་འཆར་ཉན་ཐུབ་མཁན་ཞིག་དང་བསམ་འཆར་དེ་ལ་བརྟེན་ནས་ཁོང་ཚོ་དྲག་ཤུལ་ཅན་དུ་མི་འགྱུར་བ་ཡིན་ན་ང་ཚོས་མི་གཞན་ལ་བསམ་འཆར་འདོན་ཐུབ། འོན་ཀྱང་ནུས་ཤུགས་ཆེ་བ་དེ་སོ་སོ་རང་ཉིད་ཀྱི་ཐོག་ཏུ་འདོན་དགོས།

སོ་སོ་རང་ཉིད་ཀྱི་ཐོག་ཏུ་ནུས་ཤུགས་འདོན་པའི་སྐབས་སུ་ང་ཚོས་མཐའ་གཞན་གཉིས་ཏེ། སོ་སོའི་ཚོར་སྣང་ལ་ཡོངས་སུ་གཉིས་སྣང་ནུབ་པ་དང་དེ་དག་ནམ་ཡང་ཤེས་རྟོགས་མ་བྱུང་བ་གཉིས་སོ། དང་པོ་ནི། རང་གཅེས་འཛིན་གྱི་གཉིས་སྣང་ནུབ་པ་ཡིན། ང་ཚོས་སོ་སོས་ཅི་ཞིག་ཚོར་མིན་གཅིག་པུར་དོ་འཁུར་བྱེད་ཅིང། གང་ཟག་གཞན་ཚོས་ཅི་ཞིག་ཚོར་གྱིན་ཡོད་མེད་ལ་སྣང་མེད་གཏོང་གི་ཡོད། སོ་སོས་ཅི་ཞིག་ཚོར་མིན་དེ་གཞན་གྱི་ཚོར་སྣང་ལས་ཧ་ཅང་གི་གལ་ཆེ་བའི་བསམ་བློར་ཕྱོགས་ཀྱི་ཡོད་པ་རེད། ཕྱོགས་གཞན་དེར་ང་ཚོས་སོ་སོའི་ཚོར་སྣང་ལ་འབྲེལ་མེད་དོན་གཞན་དུ་བསྐྱུར་བའམ་སྦིར་སྨན་གྱིས་ཚོར་ཤེས་བཅོམ་པ་བཞིན་དུ་གང་ཡང་ཚོར་གྱི་མེད་པ་རེད། མཐའ་དེ་རྣམས་སྤོང་ཕྱིར་ལམ་དབུ་མ་ཞིག་དགོས། དེ་ནི་ཧ་ཅང་གི་ལས་སླ་པོ་ཞིག་མིན།

གལ་ཏེ་ང་ཚོས་རྟག་ཏུ་སོ་སོ་རང་ཉིད་ལ་ལྟ་ཞིབ་བྱེད་ཀྱིན་བསྡད་ཚེ་དེས་གཉིས་སུ་སྣང་བའི་སྣང་བ་ཞིག་སྐྲུན་གྱི་ཡོད་པ་སྟེ། སོ་སོ་རང་ཉིད་དང་སོ་སོས་ཅི་ཞིག་ཚོར་བའམ་བྱེད་པ་གཉིས་སོ། དེ་ལ་བརྟེན་ནས་མི་གཞན་ཞིག་དང་འབྲེལ་བ་ངོ་མ་ཞིག་མི་སླེབས་པའམ་མི་གཞན་དང་ལྷན་དུ་འདྲིས་མི་ཐུབ། ང་ཚོའི་དམིགས་པའི་ཆ་ཀུན་སློང་དང་དེ་བཞིན་གྱི་ཐོག་ལ་འཇོག་པའི་སྐབས་ཐབས་ངོ་མ་ནི་བཅོས་མིན་དང་ལྷག་བསམ་གྱི་ཐོག་ནས་འབྲེལ་བ་དང་བྱ་སྤྱོད་སྤེལ་དགོས་པ་དེ་ཡིན། དེ་ལྟ་ནའང་། ང་ཚོས་དེ་ལྟར་བྱེད་པའི་འབད་རྩོལ་བསྟེན་ཚུལ་ཡང། སོ་སོ་མི་གཞན་དང་མཉམ་དུ་མེད་པ་ལྟ་བུའི་ཚུལ་བཟུང་སྟེ་གས་ཆག་ཤོར་བའི་ལམ་ཞིག་མ་ཆགས་པའི་ཐོག་ནས་བྱེད་དགོས། ད་དུང་ངས་ཐེར་འདོན་བྱེད་དགོས་པ་ཞིག་ལ། གལ་ཏེ་ང་ཚོས་གང་ཟག་གཞན་ཞིག་དང་འབྲེལ་བ་བྱེད་པའི་བརྒྱུད་རིམ་ནང་སོ་སོའི་ཀུན་སློང་དང་ཚོར་སྣང་ལ་དཔྱོད་ཀྱིན་ཡོད་ཚེ། སྐབས་རེ་གང་ཟག་དེར་བརྗོད་ན་ཕན་ཐོགས་ཡོང་ངེས། དེ་ལྟ་ནའང། གང་ཟག་དེར་བརྗོད་དགོས་འདུག་སྙམ་པའི་ཚོར་སྣང་ནི་རང་གཅེས་འཛིན་ཞིག་རེད། ང་ཚོས་ཅི་ཞིག་ཚོར་གྱིན་ཡོད་པ་དེར་མི་གཞན་ཚོས་རྒྱུན་དུ་དགའ་མོས་འོང་གི་མེད། ཁོང་ཚོས་ཤེས་འདོད་ཡོད་པར་སྙམ་པ་ནི་རང་ཤེས་རེད། སོ་སོས་རང་འདོད་བཞིན་དུ་བྱ་སྤྱོད་སྤེལ་འགོ་འཛུགས་ཀྱིན་ཡོད་པ་དོ་སྣང་བྱུང་བའི་སྐབས་ང་ཚོས་དེ་འགོག་དགོས། ང་ཚོས་དེ་ཁྱབ་བསྒྲགས་བྱེད་དགོས་དོན་མེད།

མཐའ་གཞན་གཉིས་ནི། ང་ཚོ་ཕྱོགས་ཡོངས་ནས་ངན་པའམ་ཕྱོགས་ཡོངས་ནས་བཟང་པོ་ཡིན་པ་དེ་རེད། གལ་ཏེ་ང་ཚོས་སོ་སོའི་དཀའ་ངལ་དང། སོ་སོའི་དཀའ་རྙོག།སོ་སོའི་སེམས་ཚོར་ངན་པ་རྣམས་ལ་ང་ཚོས་དོ་གལ་ཆེ་ཙམ་སྤྲད་ཚེ། ང་ཚོར་སོ་སོ་ཡག་པོ་མིན་པའི་ཚོར་སྣང་སླེབ་འགོ་ཚུགས་ངེས། དེ་ལས་སླ་པོའི་ངང་ནག་ཉེས་ཀྱི་ངོ་བོར་སྐྱེད་ཚུལ་ནི། ངས་ཉམས་ལེན་བྱེད་དགོས་འདུག གལ་ཏེ་དེ་ལྟར་མ་བྱས་ཚེ། ང་མི་ངན་པ་ཞིག་རེད། ཅེས་སེམས། དེ་ནི་ཉམས་ལེན་ལ་ཧ་ཅང་གིས་དབང་རྩ་འཁྲུག་པའི་ནད་ཀྱི་གཞི་རྩ་ཞིག་ཡིན་པ་རེད།

ང་ཚོས་མཐའ་གཞན་དེ་ཡང་སེལ་དགོས་པ་སྟེ། དེས་ང་ཚོའི་བཟང་ཕྱོགས་ལ་དོ་གལ་ཆེན་པོ་སྤྲོད་ཀྱི་ཡོད་པ་ནི། ང་ཚོ་ཕྱོགས་ཡོངས་ནས་ཡང་དག་པ་ཡིན། སོ་སོའི་ཁམས་བདེ་བར་གཤེགས་པའི་སྙིང་པོར་ལྟོས་དང། ཐམས་ཅད་ངོ་མཚར་ཅན་རེད། ཅེས་སེམས། དེ་ནི་ཉེན་ཚབས་ཆེན་པོ་ཞིག་རེད། གང་ལ་ཞེ་ན། དེས་ཤུགས་བསྟན་དུ་ང་ཚོས་གང་ཡང་བློས་གཏོང་བྱེད་མི་དགོས་ཅིང། ང་ཚོའི་ངན་ཕྱོགས་ཀྱི་རིགས་གང་ཡང་འགོག་མི་དགོས་པར་ང་ཚོས་བྱེད་དགོས་པ་ནི་སོ་སོའི་ཁམས་བདེ་བར་གཤེགས་པའི་སྙིང་པོ་མཐོང་རྒྱུ་སྟེ། ང་ནི་ངོ་མཚར་ཅན་ཞིག་ཡིན། ང་ནི་ཡང་དག་པ་ཡིན། ངས་རང་ཉིད་ཀྱི་ངན་ཕྱོགས་ཀྱི་སྤྱོད་ཚུལ་འགོག་དགོས་ཀྱི་མེད། ཅེས་སེམས་ན་མི་འགྲིག ང་ཚོར་བཏང་སྙོམས་ཤིག་དགོས་ཀྱི་ཡོད། གལ་ཏེ་ང་ཚོ་སོ་སོ་རང་ཉིད་ཀྱི་ཐོག་ཧ་ཅང་གིས་བློ་ཞུམ་པའི་ཚོར་སྣང་ཞིག་འོང་བཞིན་ཡོད་ན་ང་ཚོས་སོ་སོའི་ཁམས་བདེ་གཤེགས་སྙིང་པོ་དྲན་གསོ་བྱེད་དགོས་ཤིང། གལ་ཏེ་ང་ཚོར་སྣང་མེད་ཀྱི་ཚོར་སྣང་ཕྲན་ཙམ་འོང་བཞིན་ཡོད་ན་ང་ཚོས་སོ་སོའི་ངན་ཕྱོགས་ཀྱི་རིགས་ལ་ནན་པོ་བྱེད་དགོས།

འགན་འཁྲི་ལེན་པ།

གཞི་རྩའི་ཐོག་ནས་སོ་སོའི་ཡར་རྒྱས་དང་སོ་སོའི་དཀའ་རྙོག་སེལ་རྒྱུར་ང་ཚོས་སོ་སོའི་འགན་འཁྲི་སོ་སོས་ལེན་དགོས། ང་ཚོར་གཞན་ལ་ཕན་གྲོགས་བྱེད་དགོས་པ་ནི་སྨོས་མེད་དུ་སོང། དེ་རང་ཉིད་གཅིག་པུས་བྱེད་རྒྱུ་ནི་ལས་སླ་པོ་ཞིག་མིན། ང་ཚོར་ཆོས་ཕྱོགས་ཀྱི་བཤེས་གཉེན་ནམ་སོ་སོའི་ཆོས་ཕྱོགས་སྤྱི་ཚོགས་ཀྱི་གང་ཟག་བསམ་ཚུལ་མཚུངས་པ་དང་སོ་སོའི་དཀའ་ངལ་སོ་སོས་སེལ་ཐབས་བྱེད་པ་མ་གཏོགས་གཞན་ལ་ཁག་མི་དཀྲི་མཁན་ཚོའི་ཕན་གྲོགས་འཐོབ་ཐུབ། རྒྱུ་མཚན་དེ་ལ་བརྟེན་ནས་མཉམ་སྦྲེལ་འབྲེལ་ལམ་ནང་བསམ་བློའི་འཁྱེར་སོ་གཅིག་མཚུངས་སུ་མཉམ་སྤྱོད་བྱེད་མཁན་ཏེ། ཁྱད་པར་དུ་དཀའ་རྙོག་ཅི་འདྲ་ཞིག་གི་འབྱུང་ནའང་གཞན་ལ་ཁག་མི་དཀྲི་མཁན་ཞིག་དགོས་པ་གལ་ཆེ། གལ་ཏེ་རོགས་ཟླ་གཉི་གས་ཕན་ཚུན་ཁག་དཀྲི་རེས་བྱེད་ཀྱིན་ཡོད་ཚེ། དེས་ལས་དོན་ལམ་ལྷོང་རྩ་བ་ནས་འོང་ཐབས་མེད། གལ་ཏེ་གང་ཟག་དེ་གཉིས་ལས་གཅིག་གིས་སོ་སོའི་སྐྱོན་སེལ་བ་དང་གཞན་དེས་ཁག་དཀྲི་ཚེ། དེས་ཀྱང་ལས་དོན་སྒྲུབ་མི་ཐུབ། གལ་ཏེ་ང་ཚོ་གང་ཟག་གཞན་དེས་སྐྱོན་འཛུགས་བྱེད་པའི་འབྲེལ་ལམ་ཞིག་གི་ནང་འཚུད་ཟིན་ནའང། ང་ཚོས་སོ་སོའི་ངོས་ནས་ལེགས་སྐྱེས་ཅི་ཞིག་འབུལ་ཐུབ་མིན་ལ་ལྟ་བཞིན་ཡོད་པས་འབྲེལ་ལམ་དེ་གཅོད་དགོས་པའི་རྒྱུ་མཚན་ཆགས་ཀྱི་མེད། འོན་ཀྱང་དེ་དེ་ལས་ཀྱང་དཀའ་ངལ་ཆེ་བ་ཞིག་རེད། ང་ཚོས་འབྲེལ་ལམ་དེའི་ནང་ཐམས་ཅད་བློས་གཏོང་བྱེད་རྒྱུར་གཟུར་རྒྱུའི་ཐབས་ཤེས་གཏོང་དགོས། ངས་དེ་དག་ཚང་མ་བཟོད་བསྲན་བྱེད་ཀྱིན་ཡོད། དེ་ནི་དཀའ་ལས་ཁག་པོ་རེད། ཅེས་སེམས་པ་ནི། ཡོངས་རྫོགས་དབང་རྩ་འཁྲུག་པའི་བྱ་སྤྱོད་དུ་གྲུབ་ངེས།

བྱིན་རླབས་ཐོབ་པ།

ཆོས་ཕྱོགས་ཀྱི་བཤེས་གཉེན་དང་། སོ་སོ་དང་བློ་མཐུན་པའི་ཆོས་ཕྱོགས་ཀྱི་སྡེ། དེ་བཞིན་གྲོགས་པོ་གྲོགས་མོ་རྣམས་ལས་ང་ཚོར་འཐོབ་ཐུབ་པའི་རྒྱབ་སྐྱོར་ཀྱི་རིགས་ལ་སེམས་སྐུལ་ (inspiration) ཞེས་བརྗོད་ཀྱི་ཡོད། སངས་རྒྱས་ཀྱི་བསྟན་པའི་ནང་དཀོན་མཆོག་གསུམ་དང་དགེ་བའི་བཤེས་གཉེན་སོགས་པ་ལས་བྱིན་རླབས་ (inspiration) འཐོབ་རྒྱུར་ནན་བཤད་ཆེན་པོ་བྱེད་ཀྱི་ཡོད། བོད་པའི་ཐ་སྙད་བྱིན་རླབས་ཞེས་པ་རྒྱུན་དུ་blessingཞེས་པའི་དབྱིན་ཇིའི་ཐ་སྙད་དུ་བསྒྱུར་གྱི་ཡོད། དེ་ནི་འཚམས་པོ་མེད་པའི་འགྱུར་ཞིག་རེད། ང་ཚོར་བྱིན་རླབས་དགོས། ང་ཚོར་གོང་དུ་འགྲོ་བའི་ནུས་ཤུགས་དགོས།

དམ་ཆོས་ཀྱི་ལམ་དེ་ལས་སླ་པོ་ཞིག་མིན། དེས་ཡིད་དུ་མི་འོང་པའི་མི་ཚེར་དཔྱོད་ཀྱིན་ཡོད། ང་ཚོར་བྱིན་རླབས་ཀྱི་འབྱུང་ཁུངས་བརྟན་པོ་ཞིག་དགོས། གལ་ཏེ་ང་ཚོའི་བྱིན་རླབས་ཀྱི་འབྱུང་ཁུངས་དེ་དགེ་རྒན་གྱི་རྫུ་འཕྲུལ་གྱི་སྒྲུང་ཡ་མཚན་ཅན་ཤོད་པ་དང་དགེ་རྒན་རང་ཉིད་ཀྱི་སྐོར་རམ་ནང་པའི་ཆོས་འབྱུང་ནང་གང་ཟག་གཞན་གྱི་སྐོར་སོགས་ཤོད་པ་དེ་བྱིན་རླབས་ཀྱི་འབྱུང་ཁུངས་བརྟན་པོ་ཞིག་ཆགས་མི་ཐུབ། དེ་ཏན་ཏན་སྤྲོ་སེམས་འཁོལ་བ་འོང་སྲིད་ནའང། དེས་ང་ཚོར་ཕན་ནུས་ཇི་ལྟར་འཐོན་མིན་ལ་ང་ཚོས་བརྟག་དཔྱད་བྱེད་དགོས། མི་མང་པོ་ཞིག་ལ་དེས་རྟོག་བཏགས་ཀྱི་འཇིག་རྟེན་ཞིག་བསྣན་ནས་དེའི་ནང་ང་ཚོས་རྫུ་འཕྲུལ་གྱི་ལམ་ནས་ཐར་པ་རེ་སྒུག་བྱེད་བཞིན་ཡོད། སྒྱུ་མ་མཁན་གཙོ་བོ་ཁ་ཤས་ཀྱིས་ཁོང་རང་ཚོའི་རྫུ་འཕྲུལ་གྱི་ནུས་པར་བརྟེན་ནས་ང་ཚོ་སྐྱོབ་རྒྱུའམ། ཡང་ན་ང་ཚོས་གློ་བུར་དུ་རྫུ་འཕྲུལ་གྱི་གནས་དེ་རྣམས་སོ་སོ་རང་ཉིད་ནས་ཁོང་དུ་ཆུད་ཐུབ་པའི་འཆར་སྣང་སྐྱེ་གི་ཡོད། ང་ཚོས་ཡ་མཚན་ཅན་གྱི་སྒྲུང་དེ་དག་ལ་གུས་བརྩི་ཞུ་བ་དང་ལྷན་དུ་ཡིད་གཟབ་བྱེད་དགོས། དེས་ང་ཚོའི་དད་པ་ལ་སོགས་པར་བློ་སྟོབས་སྤེལ་སྲིད་པས་དེ་ཕན་ཐོགས་ཡོང་ངེས། འོན་ཀྱང་དེ་བྱིན་རླབས་ཀྱི་གཞི་རྩ་བརྟན་པོ་ཞིག་མིན། ང་ཚོར་གཞི་རྩ་བརྟན་པོ་ཞིག་དགོས།

མཚན་གཞི་ཚད་ལྡན་ཞིག་ནི་སྟོན་པ་བཅོམ་ལྡན་འདས་ཉིད་ཡིན་པ་རེད། སྟོན་པས་སྒྲུང་ཡ་མཚན་ཅན་གསུངས་ནས་འདུལ་བྱ་རྣམས་ལ་བློ་སྟོབས་སྤེལ་བའམ་ཁོང་ཚོ་ཡིད་དབང་འཕྲོག་ཏུ་འཇུག་རྒྱུའི་འབད་རྩོལ་གནང་མེད། ཁོང་གིས་གང་སར་བསྐྱོད་ནས་དྲིལ་བསྒྲགས་གནང་མེད་པ་དང་གདུལ་བྱ་རྣམས་བྱིན་གྱིས་རློབ་པ་ལ་སོགས་པའི་རིགས་གནང་མེད། ནང་པའི་ཆོས་ཀྱི་མགོ་ནས་མཇུག་བར་དུ་བསྐྱར་ཟློས་བྱས་པའི་སངས་རྒྱས་དང་ཕྱོགས་མཚུངས་པའི་དཔེར་སྤྱད་པ་ནི། སངས་རྒྱས་ཤིག་ཉི་མ་དང་མཚུངས་པ་དེ་ཡིན། ཉི་མས་མི་རྣམས་ལ་ཚ་དྲོད་སྤྲོད་ཐབས་བྱེད་ཀྱི་མེད། ཉི་མའི་ངོ་བོའི་ཆ་ནས་རང་བཞིན་གྱིས་སྐྱེ་འགྲོ་ཚང་མར་ཚ་དྲོད་རང་ཆས་སུ་སྦྱིན་གྱི་ཡོད། སྒྲུང་ཡ་མཚན་ཅན་ཐོས་པའམ་སྐུ་འདྲའི་འོག་ཏུ་སྤྱི་བོ་གཏུགས་པའམ་ཡང་ན་སྐེ་ལ་ལྗགས་མདུད་དམར་པོ་བཏགས་པ་ལ་བརྟེན་ནས་མཐོ་སྣང་ཞིག་སླེབ་སྲིད་ནའང་། དེ་ནི་བརྟན་པོ་ཞིག་མ་རེད། བྱིན་རླབས་ཀྱི་འབྱུང་ཁུངས་བརྟན་པོ་ཞིག་ནི་རང་གི་བླ་མ་མི་ཞིག་ཡིན་པའི་ངོ་བོའི་ཐོག་རང་ཆས་སུ་དང་རང་བཞིན་གྱི་ཐོག་ནས་ཁོའམ་མོའི་གཤིས་རྒྱུད་དེ་བཞིན་དམ་ཆོས་ཉམས་ལེན་བྱས་པའི་འབྲས་བུར་སོང་བ་དེ་ཡིན་པ་རེད། དེ་ནི་བྱིན་རླབས་འཇུག་ཚུལ་ཡིན་ཞིང། མི་ཞིག་གིས་ང་ཚོར་སྤྲོ་སྣང་སྦྱིན་པའི་བྱ་སྤྱོད་ག་ལ་ཡིན། དེ་སྤྲོ་སེམས་འཁོལ་བའི་ཡ་མཚན་ཅན་གྱི་སྒྲུང་ཞིག་མིན་ནའང། དེས་ང་ཚོར་བྱིན་རླབས་བརྟན་པོ་ཞིག་འཇུག་གི་ཡོད་པ་རེད།

ང་ཚོ་ཡར་རྒྱས་འགྲོ་བའི་སྐབས་སོ་སོ་ཡར་རྒྱས་ཀྱིས་སོ་སོར་བློ་སྟོབས་སྦྱིན་ཐུབ་པ་སྟེ། རྫུ་འཕྲུལ་གྱི་ནུས་པ་ལས་མ་ཡིན་ནའང་གཤིས་རྒྱུད་དལ་འགྱུར་ལས་སོ། ནང་ཆོས་ལས་རྟག་ཏུ་སོ་སོའི་བཟང་ཕྱོགས་ཀྱི་བྱ་སྤྱོད་ལ་རྗེས་སུ་ཡི་རང་བྱེད་པའི་ནན་བཤད་བྱེད་ཀྱི་ཡོད། ཡར་རྒྱས་ལ་མཚམས་དང་ཚད་ནམ་ཡང་མེད་པར་དྲན་དགོས་པ་ནི་ཤིན་ཏུ་གལ་ཆེ། དེ་ཉིན་ལྟར་དྲག་ཏུ་འགྲོ་བ་ཙམ་མིན། འཇིག་རྟེན་འཁོར་བའི་ཆོས་ཉིད་གཅིག་ནི་ང་ཚོ་འཁོར་བ་ལས་ཡོངས་སུ་མ་འགྲོལ་བའི་བར་དུ་ང་ཚོའི་སེམས་ཀྱི་ཉམས་འགྱུར་དྲག་ཞན་ཅི་རིགས་སུ་འགྱུར་གྱི་ཡོད། འཁོར་བ་ལས་ཡོངས་སུ་འགྲོལ་བ་ནི་ཧ་ཅང་གི་གནས་མཐོན་པོར་སོན་པ་ཞིག་རེད། ང་ཚོར་སྐབས་རེ་སྐྱིད་པོ་དང་སྐབས་རེ་སྡུག་པོ་ཚོར་གྱི་ཡོད་པ་ང་ཚོས་སེམས་དགོས། ང་ཚོས་སྐབས་རེ་བཟང་ཕྱོགས་ཀྱི་ལམ་ནས་བྱ་བ་བྱེད་ཐུབ་པ་དང་དུས་གཞན་དུ་ང་ཚོའི་བློ་འགྲིམ་ཆེ་བའི་གོམས་གཤིས་ཤུགས་ཧ་ཅང་ཆེན་པོར་འགྱུར་གྱི་ཡོད། དེ་དྲག་ཞན་ཅི་རིགས་སུ་འགྱུར་གྱི་ཡོད། རྫུ་འཕྲུལ་རྒྱུན་དུ་འབྱུང་གི་མེད་པ་རེད།

འཇིག་རྟེན་པའི་ཆོས་བརྒྱད་སྤོང་བའི་གཉེན་པོའི་ཆོས་ལས། གལ་ཏེ་ལམ་ལྷོང་བྱུང་ཚེ་སྤྱང་ཤོས་དང་ཡག་ཤོས་ཡིན་པའི་བློ་སྐྱེ་མི་རུང་བ་དང་ལམ་ལྷོང་མ་བྱུང་ཚེ་ཡིད་ཞུམ་དུ་འགྱུར་མི་ཉན་པར་ནན་གསུངས་མཛད། དེ་ནི་མི་ཚེའི་རང་བཞིན་ཡིན། ང་ཚོས་ཕུགས་རྒྱང་རིང་པོའི་ཕན་ནུས་ལ་ལྟ་དགོས་པ་ལས་འཕྲལ་སེལ་གྱི་ཕན་ནུས་ལ་ལྟ་མི་ཉན། དཔེར་ན། གལ་ཏེ་ང་ཚོས་ལོ་ལྔའི་རིང་ཉམས་ལེན་བྱེད་ཀྱིན་བསྡད་ཚེ་དེའི་སྔོན་གྱི་ལོ་ལྔ་དང་བསྡུར་བ་བྱེད་པའི་སྐབས་ཡར་རྒྱས་ཆེན་པོ་ཕྱིན་ཡོད། གལ་ཏེ་ང་ཚོས་གནས་ཚུལ་ཐག་གཅོད་བྱེད་རྒྱུར་ཞི་འཇམ་པ་དང་ཡིད་སེམས་གསལ་བ་སྤྱོད་ཐུབ་ཀྱི་ཡོད་པ་ཤེས་ཚེ་ང་ཚོར་སྐབས་རེ་བློ་མི་བདེ་བ་བྱུང་སྲིད་ནའང། དེས་ང་ཚོས་ཡར་རྒྱས་གང་ཙམ་བཏང་ཡོད་པ་ཤུགས་ཀྱི་སྟོན་གྱི་ཡོད། དེ་ནི་བློ་སྟོབས་སྟེར་མཁན་ཞིག་རེད། ང་ཚོ་བཅོས་མ་བྱེད་རྒྱུར་དགའ་པོ་ཡོད་པ་དང་བཅོས་མའི་བྱ་སྤྱོད་ལ་གོམས་འདྲིས་ཆེན་པོ་ཡོད་ནའང། དེ་ནི་བཅོས་མ་ཞིག་མ་ཡིན་པར་བྱིན་རླབས་བརྟན་པོ་ཞིག་ཡིན།

ཚིག་ཐོག་དོན་འཁྱོལ།

ང་ཚོས་གང་ཐུབ་ཀྱིས་ཚིག་ཐོག་དོན་འཁྱོལ་དང་དམའ་ས་བཟུང་དགོས། རྡོ་རྗེ་སེམས་དཔའི་ཉམས་ལེན་ལྟ་བུའི་ཁྲུས་གསོལ་ཉམས་ལེན་སྐབས་རྡོ་རྗེ་སེམས་དཔའ་ཉིད་ཀྱིས་སོ་སོར་ཁྲུས་གསོལ་བྱེད་ཀྱི་ཡོད་པའི་བློ་སྐྱེ་མི་ཉན་པ་གལ་ཆེ། དེ་ནི་ཕྱི་ཚུལ་གྱི་རྣམ་པ་མིན་པར་སེམས་དཔའ་ཆེན་པོས་ང་ཚོ་སྐྱོབ་པ་དང་ཁྲུས་གསོལ་གྱི་ཐོག་ནས་བྱིན་གྱིས་རློབ་རྒྱུ་ཡིན་པར་སེམས་ཚེ། དེ་ནི་བརྒྱུད་རིམ་ཞིག་གཏན་ནས་མིན། རྡོ་རྗེ་སེམས་དཔས་ཐེ་ཚོམ་གྱི་དྲི་མ་ལྷན་སྐྱེས་སུ་མ་ཞུགས་པའི་གསལ་ཞིང་རིག་པའི་སེམས་ཀྱི་རང་བཞིན་དག་པ་མཚོན་གྱི་ཡོད། ཐེ་ཚོམ་ནི་སེལ་ཐུབ། སེལ་ཚུལ་ནི་ང་ཚོས་ཉེས་པ་དང་ངན་ཕྱོགས་ཀྱི་ནུས་པ་དང་དེ་དེ་བཞིན་ལ་སོགས་པ་ལམ་ལྷོང་ཡོང་དུ་བཅུག་ཐུབ་པའི་སོ་སོ་རང་ཉིད་ཀྱི་རྩོལ་བ་ལ་བསྟེན་ནས་སེམས་ཀྱི་རང་བཞིན་དག་པ་ངོས་འཛིན་བྱེད་པའི་ཐོག་ནས་སེལ་དགོས། དེས་དག་སེལ་གྱི་བརྒྱུད་རིམ་ལམ་ལྷོང་ཡོང་བ་བཟོ་ཐུབ།

མདོར་ན། ཉམས་ལེན་དེ་དག་དོན་འཁྱོལ་དང་ཉིན་རེའི་འཚོ་བའི་ནང་དམ་ཆོས་ཉམས་སུ་ལེན་ཐབས་བྱེད་པའི་སྐབས་ང་ཚོས་སོ་སོ་གནས་རིམ་གང་དུ་ཡོད་པ་ངོས་འཛིན་དང་དང་ལེན་བྱེད་དགོས། ཟོག་རྫུ་བྱེད་པའམ་སོ་སོའི་ད་ལྟའི་གནས་རིམ་ལས་ངེས་པར་དུ་མཐོ་བ་ཡོད་པར་སེམས་མི་ཉན་པ་ནི་གནད་ཆེའོ། །

ཡེ་ཤུ་རྣམ་དག་ཆོས་ལུགས་ཀྱི་རྒྱབ་ལྗོངས་ལས་དམ་པའི་ཆོས་ལ་འཇུག་པ།

འདིར་ཡོད་ང་ཚོ་ཕལ་མོ་ཆེ་རྣམ་དག་ཆོས་ལུགས་ (Catholic) ཀྱི་རྒྱབ་ལྗོངས་ཤིག་ལས་འོང་བ་ཤ་སྟག་ཡིན། ང་ཚོས་དམ་ཆོས་ལ་འཇུག་པ་དང་སློབ་སྦྱོང་བྱེད་འགོ་འཛུགས་པའི་སྐབས་རྣམ་དག་ཆོས་ལུགས་བསྐྱུར་ནས་ནང་ཆོས་ལ་སྒྱུར་དགོས་པར་སེམས་མི་ཉན། དེ་ལྟ་ནའང། ཉམས་ལེན་གཉིས་མཉམ་བསྲེ་མི་བྱེད་པ་གལ་ཆེ། ང་ཚོས་ཡེ་ཤུའི་མཆོད་ཁང་ནང་མར་མ་བསྡད་པའི་སྔ་རོལ་དུ་མཆོད་གཤོམ་ལ་ཕྱག་གསུམ་འཚལ་སྲོལ་མེད། དེ་བཞིན་དུ་ནང་ཆོས་ཉམས་ལེན་བྱེད་པའི་སྐབས་ང་ཚོས་ཡེ་ཤུའི་ཡུམ་ཡིད་ལ་འཆར་བ་མི་བྱེད་པར་སང་རྒྱས་ཀྱི་སྐུ་རྟེན་ཡིད་ལ་འཆར་བ་བྱེད་ཀྱི་ཡོད། ང་ཚོས་དེ་གཉིས་སོ་སོར་ཉམས་ལེན་བྱེད། ང་ཚོ་ཡེ་ཤུའི་མཆོད་ཁང་དུ་འགྲོ་བ་ཚེ་དེ་རང་དུ་འགྲོ་བ་མ་གཏོགས་དེ་མིན་སྤོང་དགོས་ཤིང། ནང་པའི་སྒོམ་ཉམས་ལེན་བྱེད་པའི་སྐབས་དེ་རང་བྱེད་པ་མ་གཏོགས་དེ་མིན་སྤོང་དགོས། དེར་ཐུན་མོང་བའི་ཁྱད་ཆོས་དུ་མ་ཡོད་པ་ནི། བརྩེ་བར་ནན་བཤད་དང། གཞན་ལ་ཕན་འདོགས་པ་སོགས་ཇི་སྙེད་ཅིག་ཡོད། གཞི་རྩའི་རིམ་པའི་ཐོག་རྩོད་རྙོག་གང་ཡང་མེད། གལ་ཏེ་ང་ཚོས་བརྩེ་བ་དང། བྱམས་པ། གཞན་ལ་ཕན་འདོགས་པ་ཉམས་ལེན་བྱེད་ཀྱི་ཡོད་ཚེ། ང་ཚོ་རྣམ་དག་ཆོས་ལུགས་པ་ཡག་པོ་ཞིག་དང་ནང་པ་ཡག་པོ་ཞིག་ཡིན། དེ་ལྟ་ནའང། ང་ཚོས་རིམ་བཞིན་འདམ་ག་བྱེད་དགོས་ཀྱི་ཡོད། འོན་ཀྱང་ཆོས་ཀྱི་བྱ་བའི་ཡར་རྒྱས་ཆེན་པོ་གཏོང་དོན་དུ་ནུས་པ་ཡོངས་རྫོགས་འདོན་རྒྱུའི་སྟ་གོན་བསྒྲུབས་པའི་རྗེས་འདམ་ག་བྱེད་དགོས་པ་ཡིན། གལ་ཏེ་ང་ཚོ་ཐོག་བརྩེགས་ཅན་གྱི་ཁང་པའི་རྩེ་ཐོག་ཏུ་འགྲོ་མཁན་ཡིན་ཚེ། ང་ཚོས་དུས་ཅིག་ལ་སྐས་འཛེག་རིམ་པ་གཉིས་འཛེག་མི་ཐུབ། ཁོ་བོའི་བསམ་པར་དེ་ནི་ཕན་ཆེ་བའི་དམིགས་པ་ཞིག་ཏུ་སེམས། གལ་ཏེ་ང་ཚོས་གཞི་རྩའི་རིམ་པ་ཙམ་གྱི་ཐོག་བྱ་བ་སྒྲུབ་ཀྱི་ཡོད་ཚེ་སྐྱོན་གང་ཡང་མེད། ང་ཚོས་དེའི་ཐོག་སེམས་ཁྲལ་བྱེད་དགོས་མེད་ཅིང། ཕྱོགས་གཉི་ག་ནས་ཕན་པ་སྒྲུབ་ཐུབ་པ་ཡིན་ནོ། །

ནོར་འཁྲུལ་ཅན་གྱི་ལར་ཞེན་སྤོང་བ།

ང་ཚོའི་འཚོ་བའི་ནང་ཆོས་ཉམས་སུ་ལེན་པའི་སྐབས་ཡིད་གཟབ་བྱེད་དགོས་པ་ཞིག་ནི་སོ་སོའི་ཕ་མེས་ཀྱི་ཆོས་ཡག་པོ་མེད་པའམ་ཞན་པའི་ཐོག་ནས་སྣང་མེད་དུ་སྐྱུར་མི་ཉན། དེ་ལྟར་བྱས་ཚེ་ནོར་འཁྲུལ་ཆེན་པོ་ཞིག་རེད། དེས་ན་ང་ཚོ་ནང་པ་རྨོངས་ཞེན་ཅན་ཞིག་དང་རྣམ་དག་ཆོས་ལུགས་ཀྱི་ཁ་གཏད་རྨོངས་ཞེན་ཅན་ཞིག་ཏུ་འགྱུར་ངེས། དམར་ཤོག་དང་མང་གཙོའི་ནང་དུ་མི་རྣམས་ཀྱིས་དེ་ལྟར་བྱེད་ཀྱི་ཡོད་པ་རེད། སེམས་ཁམས་ཀྱི་ཆ་ལག་གྲུབ་ཚུལ་ཏེ་ནོར་འཁྲུལ་ཅན་གྱི་ལར་ཞེན་ (misplaced loyalty) ཞེས་བརྗོད་པས་ཁ་ལོ་སྒྱུར་གྱི་ཡོད། སོ་སོའི་ཁྱིམ་ཚང་དང་སོ་སོའི་རྒྱབ་ལྗོངས་ལ་སོགས་པར་ལར་ཞེན་བྱེད་འདོད་ཀྱི་བག་ཆགས་ཤིག་ཡོད་པར་བརྟེན་ང་ཚོས་རྣམ་དག་ཆོས་ལུགས་ཁས་མི་ལེན་ཀྱང་དེ་ལ་ལར་ཞེན་བྱེད་འདོད་ཡོད། གལ་ཏེ་ང་ཚོས་སོ་སོའི་རྒྱབ་ལྗོངས་ལ་ལར་ཞེན་མི་བྱེད་པ་དང་དེ་དག་ཡག་པོ་མེད་པར་བརྩིས་ནས་ཡོངས་སུ་འདོར་བ་ཡིན་ཚེ། ང་ཚོས་སོ་སོ་རྦད་དེ་སྡུག་ཅག་ཡིན་པར་ཚོར། གང་ལ་ཞེ་ན། དེ་ནི་བློ་བག་ཤིན་ཏུ་མི་བདེ་བ་ཞིག་སྟེ། ང་ཚོར་སྣང་མེད་དུ་ང་ཚོའི་རྒྱབ་ལྗོངས་ལ་ལར་ཞེན་སྐྱེ་ཐུབ་པའི་གནས་ཤིག་འཚོལ་དགོས་པའི་ཚོར་སྣང་འབྱུང་ངེས།

བག་ཆགས་ཀྱིས་སྣང་མེད་ཐོག་ནས་ང་ཚོའི་རྒྱབ་ལྗོངས་ཀྱི་ཁེ་ཕན་ཆུང་བའི་གནས་སྟངས་ལ་ལར་ཞེན་ཡོད། དཔེར་ན། ང་ཚོས་རྣམ་དག་ཆོས་ལུགས་སྐྱུར་སྲིད། འོན་ཀྱང་ང་ཚོས་ནང་ཆོས་ནང་དུ་དམྱལ་བའི་འཇིགས་པ་ཤུགས་ཆེ་ཞིག་འཁྱེར་གྱི་ཡོད། དེ་སྔོན་རྣམ་དག་ཆོས་ལུགས་ཀྱི་རྗེས་འཇུག་གཙང་མ་ཡིན་པའི་ངའི་ངོ་ཤེས་ཞིག་གིས་ནང་པའི་ཆོས་ལ་སེམས་ཐག་གཙང་བཅད་ཀྱིས་བཞུགས་པ་དང་། དེས་ན། ངས་རྣམ་དག་ཆོས་ལུགས་བློས་བཏང་བས་རྣམ་དག་ཆོས་ལུགས་ཀྱི་དམྱལ་བར་ལྷུང་ངེས་ཤིང། གལ་ཏེ་ངས་ནང་ཆོས་བློས་བཏང་ནས་རྣམ་དག་ཆོས་ལུགས་ལ་བཞུགས་ཚེ་ནང་པའི་དམྱལ་བར་ལྷུང་ངེས། སྙམ་པའི་ལྟ་བའི་དཀའ་ཉེན་གྱི་གནས་སུ་ལྷུང། དེ་ཁྱད་མཚར་པོ་ཞིག་ཡོད་ནའང། མོ་ལ་མཚོན་ན་དཀའ་ངལ་དེ་དངོས་གནས་ཆེན་པོ་ཞིག་རེད།

ང་ཚོས་ཡང་ནས་ཡང་དུ་ནང་ཆོས་ཉམས་ལེན་ནང་དུ་རྣམ་དག་ཆོས་ལུགས་ཀྱི་ལྟ་ཕྱོགས་ཆེ་གེ་མོ་ཞིག་སྣང་མེད་དུ་འཁྱེར་ཡོང་གི་ཡོད། ཡོངས་གྲགས་ཆེ་ཤོས་དག་ནི་ཉེས་པ་དང་། རྫུ་འཕྲུལ་དང་གཞན་གྱིས་རང་ཉིད་སྐྱོབ་རྒྱུ་འཚོལ་བ་རྣམས་སོ། གལ་ཏེ་ང་ཚོས་ཉམས་ལེན་མ་བྱས་ཚེ། ང་ཚོར་ཉམས་ལེན་བྱེད་དགོས་སྙམ་པ་ཚོར་བ་དང། གལ་ཏེ་ང་ཚོར་དེ་ལྟར་མ་ཚོར་ཚེ། ང་ཚོ་ཉེས་ཅན་ཡིན་སྙམ་པའི་ལྟ་བ་རྣམས་ནི་ནམ་ཡང་ཕན་ནུས་ལྡན་པ་ཞིག་མིན། ང་ཚོས་དེ་བྱེད་བཞིན་པའི་སྐབས་ངོས་འཛིན་བྱེད་དགོས། ང་ཚོས་སོ་སོའི་རྒྱབ་ལྗོངས་ལ་དཔྱོད་དགོས་པ་དང། བཟང་ཕྱོགས་ཀྱི་གནས་རྣམས་དྭངས་ལེན་བྱེད་དགོས། དེ་ལ་བརྟེན་ནས་ང་ཚོས་ངན་ཕྱོགས་ལས་ལྡོག་པའི་བཟང་ཕྱོགས་ཀྱི་རྣམ་པ་དག་ལ་ལར་ཞེན་བྱེད་ཐུབ། ང་ཚོས། ང་ལ་ཉེས་པ་དང་རྫུ་འཕྲུལ་འཚོལ་བའི་གཤིས་ཀ་འཇགས་ཡོད། སྙམ་པའི་བསམ་བློ་ལྡོག་སྟེ། ང་ལ་རྣམ་དག་ཆོས་ལུགས་ཀྱི་བརྩེ་བ་དང། བྱམས་པ། དཀའ་ངལ་ཅན་ལ་ཕན་པ་སྒྲུབ་པའི་འགན་འཁྲི་ཡོད། སྙམ་པའི་བློ་སྐྱེ་ཐུབ།

ང་ཚོས་སོ་སོའི་ཁྱིམ་ཚང་ལ་མཚོན་ནའང་གཅིག་མཚུངས་སུ་བྱེད་ཐུབ། ང་ཚོས་ཁོང་ཚོར་དགག་པ་རྒྱག་སྲིད་པ་དང་དེ་ནས་ཁོང་ཚོའི་བཟང་ཕྱོགས་ཀྱི་སྲོལ་རྒྱུན་ལ་དོ་སྣང་གྱིས་ལར་ཞེན་ལས་ལྡོག་སྟེ་ངན་ཕྱོགས་ལ་སྣང་མེད་ཀྱིས་ལར་ཞེན་བྱེད་སྲིད། དཔེར་ན། གལ་ཏེ་ཁོང་ཚོས་ང་ཚོར་སྤྲད་པའི་རྣམ་དག་ཆོས་ལུགས་ཀྱི་རྒྱབ་ལྗོངས་ལ་བཀའ་དྲིན་བསམ་ཤེས་ཐུབ་པ་ང་ཚོས་ངོས་ལེན་བྱེད་ཀྱི་ཡོད་ཚེ། དེས་ན་ང་ཚོས་སོ་སོའི་འདས་པ་དང་རྙིག་འཛིང་མེད་པ་དང་སོ་སོའི་ཡར་རྒྱས་ལ་རྒྱུན་དུ་ཉེན་ཚབས་ཆེ་བའི་ཚོར་སྣང་ངན་པ་རྣམས་མེད་པར་སོ་སོ་རང་ཉིད་ཀྱི་ལམ་དུ་སྐྱོད་ཐུབ།

དེ་ཡི་སེམས་ཁམས་ཀྱི་ཕན་ནུས་ཤེས་རྟོགས་ཐུབ་ཐབས་བྱེད་དགོས་པ་ནི་གལ་འགངས་ཆེ། གལ་ཏེ་ང་ཚོས་ངན་ཕྱོགས་ནས་སོ་སོའི་འདས་པ་སྟེ། སོ་སོའི་ཁྱིམ་ཚང་དང། སོ་སོའི་ཕ་མེས་ཀྱི་ཆོས་ལུགས། ཡང་ན་དེ་མིན་ཅི་ཡང་རུང་བའི་ཐོག་བསམ་བློ་འཁོར་ཚེ། སོ་སོ་རང་ཉིད་ཀྱི་ཕྱོགས་སུ་བསམ་ཕྱོགས་ངན་པ་སླེབ་རྒྱུར་བློ་ཁ་ཕྱོགས་པར་བྱེད། ཕྱོགས་གཞན་ཞིག་ནས་གལ་ཏེ་ང་ཚོས་སོ་སོའི་རྒྱབ་ལྗོངས་དང་འདས་པའི་བཟང་ཕྱོགས་ཀྱི་ཆོས་རྣམས་ངོས་ལེན་བྱེད་ཐུབ་ཚེ། སོ་སོ་རང་ཉིད་ཀྱི་ཕྱོགས་སུ་བསམ་ཕྱོགས་བཟང་པོ་སླེབ་རྒྱུར་བློ་ཁ་མང་བ་ཕྱོགས་པར་བྱེད། དེས་ང་ཚོའི་ཆོས་ཕྱོགས་ཀྱི་ལམ བརྟན་དུ་འགྲོ་རྒྱུར་ཕན་ཐོགས་བྱེད་དོ། །

མཇུག་སྡོམ་མཆན།

ང་ཚོས་ཐེམ་པ་རིམ་འཛེག་གིས་དལ་བུའི་ངང་མུ་མཐུད་འགྲོ་དགོས། སྤྱིར་འདས་པའི་སློབ་དཔོན་དམ་པ་རྣམས་ཀྱིས་ ཆོས་ཤིག་ཐོས་མ་ཐག་ལམ་སེང་ཉམས་ལེན་གྱི་ཐོག་ཏུ་འགེལ་དགོས། ཞེས་གསུངས་ཡོད་ནའང། ང་ཚོས་ཚད་མཐོ་བའི་གསུང་ཆོས་ཐོས་པ་དང་། ༼སྔགས་ཀྱི་དབང་ཞུ་བ་ལ་སོགས་པ༽ ་དེ་དང་འདྲ་བ་བྱེད་པའི་སྐབས་ང་ཚོས་གང་ཞིག་སོ་སོར་ཚད་མཐོ་དྲག་མིན་ནམ་གང་ཞིག་སོ་སོས་ད་ལྟ་ཉམས་ལེན་ཐོག་འགེལ་ཐུབ་མིན་ཐད་བློ་ཐག་གཅོད་དགོས་པ་ཡིན། གལ་ཏེ་གང་ཞིག་སོ་སོར་ཚད་མཐོ་དྲག་ཡོད་ཚེ། ང་ཚོས་ཉམས་ལེན་ཐོག་འགེལ་ཐུབ་རྒྱུར་སོ་སོ་རང་ཉིད་ནས་གྲ་སྒྲིག་བྱ་དགོས་པའི་རིམ་པ་རྣམས་དབྱེ་འབྱེད་བྱེད་དགོས་པ་དང། དེ་ནས་རིམ་པ་དེ་རྣམས་ལ་འཇུག་དགོས། མདོར་བསྡུས་ནས། བདག་གི་དགེ་བའི་བཤེས་གཉེན་ཆེན་པོ་དགེ་བཤེས་ངག་དབང་དར་རྒྱས་ལགས་ཀྱིས། གལ་ཏེ་ང་ཚོས་འཆར་སྣང་གི་ཐབས་ལམ་ཉམས་སུ་བླངས་ཚེ། ང་ཚོར་འབྲས་བུ་དེ་མཚུངས་ཞིག་འཐོབ་ཅིང། གལ་ཏེ་ང་ཚོས་ཚིག་ཐོག་དོན་འཁྱོལ་གྱི་ཐབས་ལམ་ཉམས་སུ་བླངས་ཚེ། འབྲས་བུའང་ཚིག་ཐོག་དོན་འཁྱོལ་ཞིག་འཐོབ་པ་ཡིན། ཞེས་གསུངས་སོ།། །།