བྷར་ཛིན་བཤད་མཛོད།

འབུམ་རམས་པ་ཨེ་ལེག་ཛན་ཌར་བྷར་ཛིན་གྱི་ནང་བསྟན་བཤད་མཛོད།

དྲ་ཤོག་དེའི་ནང་གི་ཡིག་ཐོག་ཅི་ཡོད་ལ་ཁ་ཕོད་པ། ཁ་ལོ་བ་གཙོ་བོར་མཆོངས། ཁ་ལོ་བ་གཙོ་བོར་རྒྱུགས།

དྲ་ཤོག་ངོ་གདོང་། > རྩོམ་པ་པོ། > ནང་ཆོས་ལ་ཞུགས་པ།

ནང་ཆོས་ལ་ཞུགས་པ།

ནང་ཆོས་ལ་ཞུགས་པ།
སིངྒ་པུར། ཕྱི་ལོ་ ༡༩༨༨ ཟླ་ ༨ ཚེས་ ༡༠ ཉིན།
Berzin, Alexander and Chodron, Thubten.
Glimpse of Reality.
Singapore: Amitabha Buddhist Centre, 1999
ལས་ཟུར་འདོན་ཞུས་ཏེ་བསྐྱར་ཞིབ་གནང་བ།

[ སྐུ་ཚེ་གཉིས་རིང་གི་དགེ་བའི་ཤེས་གཉེན་དང་འབྲེལ་བ་ཞེས་པ་དང་ ཁྱེད་རང་སྐྱེ་བ་ཕྱི་མར་ཡིད་ཆེས་ཡོད་དམ་ཞེས་པར་གཟིགས།]

ང་རང་ལོ་ན་གཞོན་པའི་སྐབས་དེར། ཨེ་ཤི་ཡའི་རིག་གཞུང་ལ་དོ་དབྱིངས་ཆེན་པོ་ཡོད། རང་ལོ་བཅུ་གསུམ་ཙམ་ལ་ཧ་ཐ་ཡོ་ག་ (hatha yoga) ཉམས་ལེན་བྱེད་འགོ་བཙུགས་པ་ཡིན། ལོ་ངོ་བཅུ་དྲུག་ལ་ར་ཌ་གར་སི་ (Rutgers) གཙུག་ལག་སློབ་གྲྭ་ཆེན་མོར་འཛུལ་ཞུགས་བྱས་ཏེ། དེར་ལོ་གཉིས་རྫས་སྦྱོར་རིག་པ་སྦྱངས་པ་ཡིན། རང་ངོས་ནས་དོ་དབྱིངས་ཆེན་པོ་ཡོད་པའི་ཨེ་ཤི་ཡའི་རིག་གཞུང་དར་ཁྱབ་སྐོར་གྱི་སློབ་གཞི་བླངས་ནས་དོན་གཉེར་བྱས་པ་ཡིན། ཐེངས་གཅིག་གསུང་བཤད་ཅིག་གི་སྐབས། དགེ་རྒན་ཆེན་མོས་ཡིག་སྒྱུར་གྱི་བྱ་གཞག་ཐོག་ནས་རྒྱལ་ཁབ་གཅིག་ནས་གཅིག་ལ་ནང་ཆོས་དར་ཚུལ་དང་རིག་གཞུང་འདྲ་མིན་ཁྲོད་ནང་ཆོས་ཇི་ལྟར་གནས་ཚུལ་སྐོར་འགྲེལ་བཤད་སྐྱོན་སོང་བས། དེ་མ་ཐག་ང་རང་བསམ་བློ་ཞིབ་མོར་གཏོང་དགོས་བྱུང་བ་དང་། དེ་ལ་བརྟེན་ནས་ནང་ཆོས་དཔྱིལ་ཕྱིན་པ་ཞིག་སྦྱོང་འདོད་ཀྱི་ཆོད་སེམས་བརྟན་པོ་ཞིག་རང་རྒྱུད་ལ་སྐྱེས་བྱུང་།

པི་རིན་སི་ཊོན་ (Princeton) གཙུག་ལག་སློབ་གྲྭ་ཆེན་མོས་ཨེ་ཤི་ཡའི་ཤེས་ཡོན་སྡེ་ཚན་གྱི་ལས་གཞི་ཞིག་དབུ་འབྱེད་གནང་བ་དང་། ངས་འཚང་སྙན་ཕུལ་བས་རྒྱ་མིའི་རིག་གནས་ཚན་པའི་ཁོངས་ཞུགས་ཐུབ་པ་བྱུང་། སྐབས་དེར་རྒྱ་ནག་ནང་ནང་ཆོས་ཇི་ལྟར་དར་ཚུལ་དང་། རྒྱ་ནག་རིག་གཞུང་གིས་དེ་ལ་ཤུགས་རྐྱེན་ཐེབས་ཚུལ། དེ་བཞིན་ནང་ཆོས་ཀྱིས་ཕྱིས་སུ་རྒྱ་ནག་གི་ལྟ་གྲུབ་ལ་ཤུགས་རྐྱེན་ཐེབས་ཚུལ་བཅས་ཀྱི་སྐོར་ང་རང་དོ་དབྱིངས་ཧ་ཅང་ཆེན་པོ་ཡོད་ཅིང་། ཉིན་རེའི་འཚོ་བའི་ཁྲོད་ནང་ཆོས་ཉམས་ལེན་བྱ་ཚུལ་སློབ་སྦྱོང་བྱེད་འདོད་ཆེན་པོ་ཡོད། པི་རིན་སི་ཊོན་ནང་བསྡད་པའི་སྐབས། ཨུ་རུ་སུའི་ས་ཁུལ་ལྦོལ་གཱ་ (Volga) ཞེས་པ་ནས་ཡིན་པའི་ཁལ་མིག་སོག་པོའི་དགེ་བཤེས་དབང་རྒྱལ་ལགས་ཞུ་བ་ཞིག་དེ་གར་ཡོད་པ་ངས་ཤེས་ཀྱི་མེད། ཁོང་གིས་ཨ་རིའི་ནང་བོད་དང་སོག་པོའི་དགོན་པ་ཐོག་མ་དེའི་དབུ་ཁྲིད་གནང་ཡོད། ངས་གང་བྱེད་ཐུབ་པ་ནི་གལ་སྲིད་ནང་ཆོས་ལ་བསམ་བློ་བཏང་བ་དང་ཉམས་ལེན་བྱས་ན་ག་རེ་འབྱུང་གི་ཡོད་མེད་ཚོད་དཔག་བྱེད་པ་ལས་མི་འདུག

དུས་སྐབས་བར་མའི་རྒྱ་ནག་གི་ལྟ་གྲུབ་དང་ལོ་རྒྱུས་ལྟ་བུའི་ཤར་ཨེ་ཤི་ཡའི་སྐད་ཡིག་ཐོག་གཙུག་ལག་རབ་འབྱམས་པའི་བསླབ་པ་ཐར་སོན་སླད་ཕྱི་ལོ་ ༡༩༦༥ ལོར་ང་རང་ཧར་ཝར་ཌི་ (Harvard) གཙུག་ལག་སློབ་གྲྭ་ཆེན་མོར་འཛུལ་ཞུགས་བྱས་པ་ཡིན། རྒྱ་ནག་ནང་རྒྱ་གར་ནས་ནང་ཆོས་དར་ཚུལ་ཤེས་རྟོགས་བྱེད་པའི་སླད། ལོ་དང་པོའི་རྗེས། ངས་ལེགས་སྦྱར་སྐད་དང་རྒྱ་གར་གྱི་ནང་ཆོས་ཞིབ་ཚགས་པོ་སློབ་སྦྱོང་བྱ་རྒྱུར་ཐག་གཅོད་བྱས་པ་ཡིན། དེས་ན། ངས་ལེགས་སྦྱར་དང་རྒྱ་གར་གྱི་ནང་ཆོས་ལ་ཐོས་བསམ་སློབ་གཉེར་འགོ་བཙུགས་པ་ཡིན། ངའི་རིག་གཅིག་རྐང་འཛིན་གྱི་འབུམ་རམས་པའི་ལག་ཁྱེར་ཆེད། ཤར་ཨེ་ཤི་ཡའི་སྐད་ཡིག་སྡེ་ཚན་དང་ལེགས་སྦྱར་དང་རྒྱ་ནག་གི་རིག་གནས་ཟུང་དུ་སློབ་སྦྱོང་བྱས་པ་ཡིན།

རྒྱ་གར་གྱི་ནང་པའི་རིག་གནས་སློབ་སྦྱོང་བྱེད་པའི་ཞར་ལ་ངས་ཕྱི་ལོ་ ༡༩༦༧ ལོར་བོད་སྐད་སློབ་གཉེར་འགོ་བཙུགས་པ་ཡིན། དེ་ནས་ངས་དགེ་བཤེས་དབང་རྒྱལ་ལགས་ཞལ་ཚོར་བ་དང་། ང་རང་ནེའུ་ཇར་སི་གཉེན་འཕྲད་དུ་ག་དུས་བསྐྱོད་ཀྱང་ཁོང་མཇལ་བར་འགྲོ་གི་ཡོད། སྟབས་མི་ལེགས་པ་ཞིག་ལ། དད་གུས་བྱ་ཡུལ་གྱི་སློབ་དཔོན་ཁོང་གི་དྲུང་ནས་སློབ་སྦྱོང་བྱེད་པར་ང་རང་གནས་སྡོད་ཧར་ཝར་ཌི་ཧ་ཅང་ཐག་རིང་པོ་ཡོད། འོན་ཏེ་བོད་རྒྱུད་ནང་བསྟན་གྱི་སྲོལ་རྒྱུན་ཁྲོད་ནུབ་ཕྱོགས་པ་ནང་པའི་རབ་བྱུང་ཐོག་མ་ཡིན་པ་དགེ་བཤེས་ལགས་ཀྱི་དགེ་ཕྲུག་རོ་བར་ཌེ་ ཐར་མན་ (Robert Thurman) ལགས་ཧ་ཝར་ཌེར་ང་རང་གི་འཛིན་གྲོགས་ཡིན། ཁོང་གིས་ང་ལ་༸གོང་ས་༸ཏཱ་ལའི་བླ་མ་མཆོག་དང་རྒྱ་གར་འཕགས་ཡུལ་དུ་བཙན་བྱོལ་བོད་པའི་སྤྱི་ཚོགས་ནང་ནང་ཆོས་ནི་ད་ལྟའི་ཆར་ཆ་ཚང་ལ་མ་ནོར་བར་གནས་ཚུལ་འགྲེལ་བརྗོད་བྱས་བྱུང་། དེ་བཞིན་ཁོང་རང་ཉིད་རྒྱ་གར་ནང་སློབ་སྦྱོང་ཇི་ལྟར་གནང་ཚུལ་འགྲེལ་བཤད་བརྒྱབ་པ་དང་། གལ་སྲིད་ང་རང་དེ་གར་གཅིག་མཚུངས་སློབ་སྦྱོང་བྱེད་འདོད་ན། སྣང་དག་ཡོད་མ་རེད་ཅེས་གསུངས་ཀྱི་འདུག དེས་ལ་ངེས་ཤེས་བརྟན་པོ་ཞིག་རྙེད་ནས། བོད་རིགས་དང་མཉམ་དུ་ང་རང་གི་རིག་གཅིག་རྐང་འཛིན་གྱི་རྩོམ་ཤོག་འབྲི་བའི་ཆེད། ཧྥུལ་བེ་རེ་ཌ་ (Fulbright) གཙུག་ལག་སློབ་ཡོན་འཐོབ་སླད་སྙན་ཞུ་ཕུལ་བ་ཡིན་བ་བཞིན། སློབ་ཡོན་ཐོབ་ནས་ཕྱི་ལོ་ ༡༩༦༩ ལོར་རྒྱ་གར་དུ་བསྐྱོད་པ་ཡིན།

བཞུགས་སྒར་རྡ་རམ་ས་ལར། ང་རང་ལ་༸གོང་ས་༸ཏཱ་ལའི་བླ་མ་མཆོག་དང་ཁོང་གི་ཡོངས་འཛིན་རྣམ་གཉིས་དངོས་སུ་མཇལ་རྒྱུའི་སྐལ་བ་ཐོབ་པ་དང་། ཁོང་རྣམས་ཀྱིས་ནང་ཆོས་དང་དེའི་ཉམས་ལེན་ལ་ཡིད་ཆེས་གནང་བའི་དངོས་ཡོད་བདེན་པའི་གནས་ལུགས་ཀྱིས་ང་རང་རྦད་དེ་ཡིད་དབང་ཕྲོགས་སོང་། ཕྱི་ལོ་ ༡༩༦༠ རེ་གྲངས་སུ་ཨ་རིའི་གཙུག་ལག་སློབ་གྲྭ་ཆེན་མོའི་ནང་ནང་ཆོས་སློབ་གཉེར་བྱེད་ཕྱོགས་ནི།རྩ་བའི་ཆ་ནས་ལོ་རྒྱུས་དང་གཞུང་ཁག་གི་སྐད་རིགས་དབྱེ་ཞིབ་ཙམ་དུ་ཟད། དེ་ནི་སློབ་ཚན་སྐམ་པོ་ཞིག་དང་གནའ་བོའི་ཨི་ཇེབ་ཀྱི་ཆོས་ལུགས་དང་འདྲ་བར། ང་ཚོས་དུས་རབས་ཁ་ཤས་སྔོན་ནས་གནས་ཡོད་པའི་སྲོལ་རྒྱུན་ཞིག་སྦྱོང་གི་ཡོད་པ་ལྟར་སྣང་། འོན་ཀྱང་ད་ཆ་དེ་ལྟར་མིན་པར། རྒྱ་གར་ནང་བོད་རྒྱུད་ནང་བསྟན་གསོན་པོར་གནས་ཤིང་། དེ་ནས་བཟུང་ངས་ནང་ཆོས་ལ་དངོས་ཀྱི་མྱོང་བ་དང་རྒྱུས་མངའ་མེད་པའི་མི་ཞིག་གི་དྲུང་ནས་མ་ཡིན་པར། སངས་རྒྱས་ཀྱི་ཆོས་ལ་དད་པ་ཡོད་མཁན་དང་ཤེས་མཁན་གྱི་དྲུང་ནས་སློབ་སྦྱོང་བྱེད་ཐུབ་པ་བྱུང་། ཆོས་དེ་ནི་སངས་རྒྱས་ཉིད་ཀྱིས་གསུངས་ཏེ་ད་ལྟའི་བར་སློབ་དཔོན་རྣམས་ཀྱི་དྲུང་ནས་སོ་སོའི་དགེ་ཕྲུག་ལ་རྒྱུད་པ་ཆད་པ་མེད་པར་བཞུགས། དེར་བརྟེན་རང་གི་ཉེ་འཁོར་དུ་བཞུགས་པའི་སློབ་དཔོན་རྣམས་ཀྱིས་དྲུང་ནས་ཁ་གསལ་གཏིང་གསལ་བྱས་ནས་ཐོས་བསམ་སློབ་གཉེར་བྱ་རྒྱུའི་གནད་དོན་ཞིག་རེད་འདུག དེ་ནི་དངོས་གནས་དོ་སྣང་བྱེད་འོས་པ་ཞིག་འདུག ད་ཆ་ངས་ནང་ཆོས་ནི་ས་ཆ་གཅིག་ནས་གཅིག་ལ་དར་བ་དང་འགྱུར་བ་ཇི་བྱུང་ཙམ་མ་ཟད། ད་དུང་རང་གིས་ཉམས་ལེན་ཐུབ་པའི་ལྟ་གྲུབ་དང་ཆོས་ལུགས་གསོན་པོ་ཞིག་ཡིན་པའི་ཆ་ནས་ནང་ཆོས་ཐོག་ལ་སློབ་སྦྱོང་བྱེད་ཀྱི་ཡོད།

ང་རང་གི་གཙུག་ལག་སློབ་གྲྭ་ཆེན་མོ་སློབ་ཐོན་ཆེད་ཞིབ་འཇུག་བྱ་ཕྱིར་དགེ་བཤེས་ངག་དབང་དར་རྒྱས་ལགས་ཀྱི་དྲུང་ནས་ནང་ཆོས་སློབ་གཉེར་བྱེད་འགོ་བཙུགས་པ་ཡིན། དེ་བཞིན་ནང་ཆོས་ཉམས་ལེན་ནང་ཞུགས་འགོ་བཙུགས། ལོ་གཉིས་ཀྱི་རྗེས་༸སྤྱི་ནོར་༸གོང་ས་༸ཏཱ་ལའི་བླ་མ་མཆོག་གིས་རྡ་རམ་ས་ལར་བོད་ཀྱི་དཔེ་མཛོད་ཁང་གསར་འཛུགས་གནང་བ་དང་། ང་རང་གི་དགེ་རྒན་ལ་ཕྱི་རྒྱལ་བ་ཚོར་ནང་པའི་ལྟ་གྲུབ་དང་སྒོམ་སྒྲུབ་སྐོར་སློབ་ཁྲིད་དགོས་པར་བཀའ་ཕེབས། དེར་བརྟེན་སྐུ་ན་གཞོན་པའི་ཤར་པ་རིན་པོ་ཆེ་དང་ཁམ་ལུང་རིན་པོ་ཆེ་གཉིས་ལ་སྐད་སྒྱུར་བྱེད་དགོས་པའི་བཀའ་བསྩལ། གང་ཡིན་ཞེ་ན། ཁོང་གཉིས་ནི་ང་རང་གིས་གསུང་སྒྱུར་བྱེད་བཞིན་པའི་དགེ་བཤེས་དབང་རྒྱལ་ལགས་ཀྱི་ལམ་སྟོན་འོག་ཨ་རིར་དབྱིན་ཡིག་སློབ་སྦྱོང་གནང་མྱོང་ཡོད། སྐབས་དེར་ངས་ཐུགས་ཕན་གསོས་ན་ཕྱག་རོགས་ཞུ་རྒྱུར་འདོད་པ་ཡོད་སྐོར་སྙན་གསེང་ཞུ་སྐབས། གོང་ས་མཆོག་གིས་རོགས་པ་དགོས་ཀྱི་འདུག་ཀྱང་དང་པོ་ཁྱེད་རང་ཨ་རི་ལ་ཕྱིར་སོང་ནས་རིགས་གཅིག་རྐང་འཛིན་གྱི་རྩོམ་བྲིས་ཕུལ་རྗེས་ལག་ཁྱེར་ལེན་དགོས། ཞེས་གསུངས་བྱུང་།

ངའི་ཉམས་ཞིབ་ཆེད་རྩོམ་གོང་འབུལ་ཞུས་རྗེས། ངས་གཙུག་ལག་སློབ་གྲྭ་ཆེན་མོའི་ཤེས་ཡོན་ལམ་སྟོན་པ་ཞིག་ལ་ཐུགས་རྗེ་ཆེ་ཞུས་པ་དང་། དགེ་བཤེས་ངག་དབང་དར་རྒྱས་ལགས་ཀྱི་དྲུང་ནས་ནང་ཆོས་སློབ་གཉེར་བྱ་ཆེད་རྒྱ་གར་དུ་ཕྱིར་ལོག་བྱས། ང་ཚོས་ཡིག་སྒྱུར་གྱི་ལས་ཀ་མུ་མཐུད་བྱས་མཐར་ང་རང་གི་བོད་སྐད་ཡར་རྒྱས་ཕྱིན་སོང་། དེར་བརྟེན་མཚན་སྙན་ཤིན་ཏུ་ཆེ་བའི་བླ་མ་སྟེ་༸གོང་ས་མཆོག་གི་མཚན་ཞབས་དང་ཡོངས་འཛིན་གནང་མཁན་དང་ང་རང་གི་དགེ་བའི་བཤེས་གཉེན་གཙོ་བོ་སེར་ཀོང་མཚན་ཞབས་རིན་པོ་ཆེའི་གསུང་སྒྱུར་བྱ་རྒྱུའི་སྐལ་བཟང་ཀྱི་གོ་སྐབས་ཐོབ་བྱུང་། ངས་སེར་ཀོང་རིན་པོ་ཆེའི་གསུང་སྒྱུར་བྱས་ཏེ་ཁོང་དང་ལྷན་དུ་རྒྱལ་སྤྱིའི་ནང་ཐེངས་གཉིས་ཙམ་ཕྱིན་པ་ཡིན། ཕྱི་ལོ་ ༡༩༨༣ ལོར་ཁོང་དགོངས་པ་ཆོས་དབྱིངས་སུ་འཐིམ་པའི་རྗེས། རྒྱལ་ཁབ་མང་པོའི་ནང་ནང་པའི་ཆོས་ཚོགས་ཀྱིས་ང་རང་དེ་དག་ནང་སློབ་ཁྲིད་བྱེད་པར་སྐད་གཏོང་གི་འདུག

ང་རང་རྒྱ་གར་ནང་ཕྱིན་པའི་སྐབས་ནས་བཟུང་། ནང་ཆོས་ཀྱིས་ཉིན་རེའི་འཚོ་བའི་ཁྲོད་ཁ་ཡོད་ལག་ཡོད་ཀྱི་ཉམས་ལེན་བྱེད་སྟངས་ཙམ་མ་ཡིན་པར། ད་དུང་ངས་སྔོན་ཆད་ཤེས་རྟོགས་མི་ཐུབ་པའི་དྲི་བ་མང་པོ་ཞིག་གི་ལན་ཡང་འདེབས་པའི་དངོས་ཡོད་ཀྱི་བདེན་དོན་དེར་ང་རང་ལ་དགའ་མགུ་ཡི་རངས་ཆེན་པོ་བྱུང་། དྲི་བ་དཔེར་ན། ངའི་མི་ཚེ་འདི་འདྲ་བ་ཇི་ལྟར་ཡིན་ནམ་ཞེས་པ་དང་། ངའི་མི་ཚེའི་མཐོང་ཆོས་ཀྱི་བྱུང་བ་རྣམས་ཇི་ལྟར་ཡོང་གི་ཡོད་དམ་ཞེས་པ་ལྟ་བུ། ནང་པས་ལས་རྒྱུ་འབྲས་ཀྱི་ཐོག་ནས་དྲི་བ་དེ་དག་ལ་ལན་འདེབས་གསལ་པོ་བྱེད་ཀྱི་འདུག དེ་ཤེས་པ་ནི་དགའ་མོས་བྱ་ཡུལ་ཞིག་འདུག གང་ཡིན་ཞེ་ན། དེས་རང་གི་ཉམས་མྱོང་འདས་པའི་མྱོང་བ་སྤེལ་གྱི་འདུག དེར་མ་ཟད་ནང་ཆོས་ཀྱིས་ཧ་ཅང་གསལ་པོ་དང་རྒྱུ་མཚན་ལྡན་པའི་ཐོག་ནས་ནང་སེམས་ཀྱི་ངོ་བོ་དང་དེའི་བྱ་བ་བྱེད་ཚུལ་འགྲེལ་བརྗོད་བྱེད་ཀྱི་འདུག གཞན་ཡང་ང་ཚོས་སོ་སོའི་ཉིན་རེའི་འཚོ་བའི་ཁྲོད་ཀྱི་དཀའ་ངལ་རྣམས་ལ་གདོང་ལེན་ཆེད་ནང་ཆོས་ཀྱི་ཐབས་ལམ་ཁག་ཉམས་ལེན་བྱེད་སྐབས། ང་ཚོས་དེ་དག་གི་ཕན་ནུས་ལྡན་པའི་གྲུབ་འབྲས་དངོས་སུ་མཐོང་གི་ཡོད་ཅིང་། དེ་ལས་རང་ཉིད་ལ་འཚམ་པ་དང་ཕན་རླབས་ཆེ་བའི་ལམ་ཞིག་རྙེད་དེ་སེམས་ཤུགས་ཆེན་པོ་འཕར་སོང་།

ཡིག་སྒྱུར་བྱེད་པ་དང་སློབ་ཁྲིད་བྱེད་པའི་སྐབས། ང་རང་གིས་གང་སྦྱངས་པའི་ནང་ཆོས་དང་དེ་རིག་གཞུང་གཅིག་ནས་གཅིག་ལ་ཇི་ལྟར་དར་ཚུལ་སྐོར་གྱི་སློབ་ཚན་འཁྲིད་ཐབས་བྱེད་ཀྱི་ཡོད། ང་རང་གིས་སློབ་སྦྱོང་བྱས་པ་ལ་བརྟེན་ནས། ནུབ་ཕྱོགས་སུ་ནང་ཆོས་དར་སྤེལ་གཏོང་བ་དང་དེང་དུས་ཀྱི་སྤྱི་ཚོགས་ནང་ནང་ཆོས་འཆད་ཉན་བྱེད་སྐབས། ང་ཚོས་ངེས་པར་དུ་ཡིད་གཟབ་དགོས་པའི་གནད་དོན་ངས་ཤེས་རྟོགས་བྱུང་། འདས་པའི་རིག་གཞུང་སོ་སོའི་ཁྲོད་ནང་ཆོས་ཇི་ལྟར་གནས་པ་ཤེས་པའི་ཐོག་ནས། དེང་དུས་འཛམ་གླིང་ནང་གི་རྒྱལ་ཁབ་གཞན་ཁག་ཏུ་ནང་ཆོས་དར་ཁྱབ་འགྲོ་བཞིན་པའི་ཐད་ལེགས་སྐྱེས་ཤིག་འབུལ་ཐུབ་པའི་རེ་བ་བཅངས་ཡོད།། །།